ଭୁବନେଶ୍ୱର,୨୩।୧୦: ଭୁବନେଶ୍ୱର ଡିଭିଜନ ଜୀବନ ବୀମା କର୍ମଚାରୀ ସଂଘର ୧୫ତମ ବାର୍ଷିକ ସମ୍ମିଳନୀ ଶନିବାର ସ୍ଥାନୀୟ ସୂର୍ଯ୍ୟନଗରସ୍ଥିତ ଏଲ୍ଆଇସି କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି। ଏହି ୨ ଦିନିଆ କର୍ମଶାଳାକୁ ଅଖିଳ ଭାରତ ବୀମା କର୍ମଚାରୀ ସଂଘର ସାଧାରଣ ସମ୍ପାଦକ ଶ୍ରୀକାନ୍ତ ମିଶ୍ର ଉଦ୍ଘାଟନ କରିଛନ୍ତି। ଏହି ପରିପ୍ରେକ୍ଷୀରେ ମିଶ୍ର କେନ୍ଦ୍ର ସରକାରଙ୍କ ରାଷ୍ଟ୍ରାୟତ୍ତ ଶିଳ୍ପ ବିରୋଧୀ ମନୋଭାବକୁ କଟୁ ସମାଲୋଚନା କରିଥିଲେ। ସେହିଭଳି ଏଲ୍ଆଇସିରୁ ୩.୫%ର ଶେୟାର ବିନିବେଶକୁ ସେ ଘୋର ନିନ୍ଦା କରିଥିଲେ। ଏପରିକି ଏଲ୍ଆଇସି ଆଜି ରାଷ୍ଟ୍ରର ଗର୍ବ ଏବଂ ଦେଶର ସମୁଦାୟ ଆଭ୍ୟନ୍ତରୀଣ ଋଣର ୨୫% ପୂରଣ କରିଚାଲି ଥିବାବେଳେ ଏଭଳି ଏକ ବୀମା ଶିଳ୍ପକୁ କେନ୍ଦ୍ର ସରକାର ଘରୋଇକରଣ କରିବା ପାଇଁ ଯେଉଁ ମସୁଧା କରି ଚାଲିଛନ୍ତି ତାକୁ ମିଶ୍ର ବିରୋଧ କରିଥିଲେ। ସେହିପରି କର୍ମଚାରୀମାନଙ୍କ ବହୁ ପ୍ରତୀକ୍ଷିତ ମଜୁରି ସଂଶୋଧନର ସୁସମାଧାନ ପାଇଁ ସେ କର୍ମଶାଳାରେ ଦାବି ଉପସ୍ଥାପନ କରିଥିଲେ। ଅନ୍ୟମାନଙ୍କ ମଧ୍ୟରେ ବିଡିଏଲ୍ଆଇଇଏର ସାଧାରଣ ସମ୍ପାଦକ ବି. ବି. ନାୟକ ସଂଘର ବାର୍ଷିକ ବିବରଣୀ ପାଠ କରିଥିଲେ। ଅପରପକ୍ଷରେ ସଂଘର କୋଷାଧ୍ୟକ୍ଷ ଅରୁଣ ମହାନ୍ତି ସଂଘର ଆୟବ୍ୟୟର ବିବରଣୀ ପ୍ରଦାନ କରିଥିଲେ।
ଉକ୍ତ କର୍ମଶାଳାରେ ପୂର୍ବ କେନ୍ଦ୍ରାଞ୍ଚଳ ବୀମା କର୍ମଚାରୀ ସଂଘର ସାଧାରଣ ସମ୍ପାଦକ ତ୍ରିନାଥ ଦୋରା ନିଜ ବକ୍ତବ୍ୟରେ କେନ୍ଦ୍ର ସରକାରଙ୍କ କର୍ମଚାରୀ ଓ ଶ୍ରମିକ ମାରଣ ନୀତିର ତୀବ୍ର ବିରୋଧ କରିଥିଲେ। ଏହି ଅବସରରେ ସଂଗଠନର ସଭାପତି ଚନ୍ଦ୍ରମୋହନ ହାଇବ୍ରୁଙ୍କୁ ଅବସରକାଳୀନ ବିଦାୟୀ ସମ୍ବର୍ଦ୍ଧନା ଦିଆଯାଇଥିଲା। ସେହିଭଳି କଟକ ଡିଭିଜନ ବୀମା କର୍ମଚାରୀ ସଂଘର ପୂର୍ବତନ ସଭାପତି ମାନ ଗୋବିନ୍ଦ ବାରିକଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା। ଉକ୍ତ ସମ୍ମିଳନୀରେ ୩୦୦ରୁ ଅଧିକ କର୍ମଚାରୀ ଯୋଗଦାନ କରିଥିଲେ। ପରିଶେଷରେ ସାଙ୍ଗଠନିକ ସମ୍ପାଦକ ରମାକାନ୍ତ ଦାସ ଧନ୍ୟବାଦ ପ୍ରଦାନ କରିଥିଲେ। ସୂଚନାଯୋଗ୍ୟ , ଏହି ସମ୍ମିଳନୀ ଜରିଆରେ ସଂଘ ୧୭ ଦଫା ଦାବି ନେଇ କେନ୍ଦ୍ର ସରକାରଙ୍କ ଉଦ୍ଦେଶ୍ୟରେ ଏକ ରିଜୋଲ୍ୟୁଶନ ଗ୍ରହଣ କରିଥିଲା। ରବିବାର ମଧ୍ୟ କର୍ମଶାଳା ପୂର୍ବ ସୂଚୀ ମୁତାବକ ଜାରି ରହିବ ବୋଲି ସଂଘର ସଦସ୍ୟ ସୁଧାଂଶୁ ମିଶ୍ର ମତବ୍ୟକ୍ତ କରିଛନ୍ତି।
