ୱାଶିଂଟନ,୪ ।୩: ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ସ୍ୱାସ୍ଥ୍ରକୁ ନେଇ ହ୍ୱାଇଟ ହାଉସର ଡାକ୍ତର ଏକ ବଡ ଅପଡେଟ ସାମ୍ନାକୁ ଆଣିଛନ୍ତି । ହ୍ୱାଇଟ ହାଉସର ଚିକିତ୍ସକ ଡାକ୍ତର କେୱିନ ଓ’କନର ଶୁକ୍ରବାର କହିଛନ୍ତି, ଗତ ମାସରେ ବାଇଡେନଙ୍କ ଛାତିରୁ ବାହାରିଥିବା ଘା’ କ୍ୟାନସରର ‘ବେସଲ ସେଲ’ ଥିଲା । ଓ’କନର କହିଛନ୍ତି, ଯାହା ଅନୁମାନ କରାଯାଉଥିଲା କି, ବାୟୋପସିେରେ ସ୍ପଷ୍ଟ କରାଗଲା ଯେ ଛୋଟ ଘା ବେସଲ ସେଲ କାର୍ସିନୋମା ଥିଲା । ସେ କହିଛନ୍ତି ସମସ୍ତ କ୍ୟାନସରଯୁକ୍ତ ଉପକୋକୁ ସଫଳତାପୂର୍ବକ ହଟାଇ ଦିଆଯାଇଛି । ଏବେ ତାଙ୍କୁ କୌଣସି ଚିକିତ୍ସାର ଆବଶ୍ୟକତା ନାହିଁ ।
ଓ’କନର କହିଛନ୍ତି ବେସଲ ସେଲ କାର୍ସିନୋମା ଘା’ ମେଲେନୋମା ଅବା ସ୍କୱେମସ ସେଲ କାର୍ସିନୋମା ଭଳି କୌଣସି ଗୁରୁତର ଚର୍ମ କ୍ୟାନସର ଭଳି ମାଡିଯିବା ଅବା ମେଟାଷ୍ଟସାଇଜ ନୁହେଁ । କିନ୍ତୁ ବେସଲ ସେଲ ନିକଟରେ ଆକାର ବୃଦ୍ଧି କରିବାର କ୍ଷମତା ଥାଏ, ତେଣୁ ତାକୁ ସର୍ଜରୀ ମାଧ୍ୟମରେ ହଟାଇବାକୁ ପଡିଥାଏ । ନଚେତ୍ ସମସ୍ୟା ଗମ୍ଭୀର ହୋଇପାରେ । ଓ’କନର କହିଛନ୍ତି, ବାୟୋପସିର ସ୍ଥାନଟି ଭଲ ଭାବେ ଠିକ ହୋଇଯାଇଛି । ରାଷ୍ଟ୍ରପତି ବାଇଡେନ ନିଜର ବ୍ୟାପକ ସ୍ୱାସ୍ଥ୍ୟ ସେବାର ଅଂଶ ଭାବେ ଚର୍ମ ସମ୍ପର୍କିତ ସତର୍କତା ଜାରି ରଖିବେ ।
