ମୋରଡା,୨୨/୬(ସ୍ମାରକ ମାଜୀ): ଜୁନ କୋଡିଏ ତାରିଖରେ ମୟୂରଭଞ୍ଜ ଜିଲାରେ ଭାଜପା ସରକାର ୨ ବର୍ଷ ପୂର୍ତ୍ତି ପାଳନ କରି ସଫଳତାର ଗାଥା ଗାଉଥିବା ବେଳେ ମୋରଡା ନିର୍ବାଚନମଣ୍ଡଳୀ ଅଧୀନ ରାସଗୋବିନ୍ଦପୁର ବ୍ଲକରେ ଦେଖିବାକୁ ମିଳିଛି ଭାଜପା ସରକାରର ଅସଲ ଚିତ୍ର। ମୟୂରଭଞ୍ଜ ଜିଲା ରାସଗୋବିନ୍ଦପୁର ବ୍ଲକ ଅଧୀନ ଗାଁଅମର୍ଦା ପଞ୍ଚାୟତର ନୂଆସାହିରେ ପାଣିର ଉତ୍କଟ ସମସ୍ୟା ଦେଖିବାକୁ ମିଳିଛି। ଉକ୍ତ ସାହିରେ ପଚାଶରୁ ଊର୍ଦ୍ଧ୍ବ ପରିବାର ବସବାସ କରୁଥିବା ବେଳେ ଉକ୍ତ ସାହିକୁ ବସୁଧା ପାନୀୟ ଜଳ ସଂଯୋଗ ହୋଇନାହିଁ। ସାହିରେ ଦୁଇଟି ନଳକୂପ ଥିଲେ ମଧ୍ୟ ଗୋଟିଏ ସମ୍ପୂର୍ଣ ଖରାପ ହୋଇଥବା ବେଳେ ଅନ୍ୟ ଗୋଟିଏ ନଳକୂପରେ ଗୋଳିଆ ନାଲି ପାଣି ବାହାରୁଥିବାରୁ ଏହା ସମ୍ପୂର୍ଣ ଅନୁପଯୋଗୀ ବୋଲି ଗ୍ରାମବାସୀ କହିଛନ୍ତି। ସେହିପରି ଅନ୍ୟ ଏକ ପରିତ୍ୟକ୍ତ କୂଅରୁ ଲୋକେ ପାଣି ବ୍ୟବହାର କରୁଥିବା ଦେଖିବାକୁ ମିଳିଛି। ତେବେ ପିଇବା ପାଇଁ ଲୋକେ ପଡୋଶୀ ବାଲେଶ୍ଵର ଜିଲା ବସ୍ତା ବ୍ଲକର ସୁନ୍ଦରକୁଲି ଗ୍ରାମରୁ ପାଣି ଆଣୁଛନ୍ତି।
ତେବେ ଏତିକିରେ ଉକ୍ତ ସାହିର ସମସ୍ୟା ସରି ନାହିଁ। ଉକ୍ତ ସାହିରେ ଥିବା ନୂଆସାହି ସରକାରୀ ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଥିବା ଛାତ୍ରୀଛାତ୍ର ମାନେ ମଧ୍ୟ ପାଣି ପାଇଁ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଉକ୍ତ ବିଦ୍ୟାଳୟରେ ଶିଶୁ ବାଟିକାରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଥିବା ବେଳେ ମୋଟ ୪୧ପିଲା ପାଠ ପଢୁଛନ୍ତି। ତେବେ ପାଣି ସମସ୍ୟା ଯୋଗୁ ପିଲାମାନେ ମଧ୍ୟାହ୍ନ ଭୋଜନ ଖାଇବା ପାଇଁ ବ୍ୟବହୃତ କରୁଥିବା ଥାଳି ସ୍ଥାନୀୟ ପୋଖରୀ ପାଣିରେ ଧୋଉଛନ୍ତି ଏବଂ ପିଲା ମାନେ ଶୌଚ ହେବା ପାଇଁ ମଧ୍ୟ ଉକ୍ତ ପୋଖରୀକୁ ଯାଉଛନ୍ତି, ଯାହା ଫଳରେ ହଇଜା, ଟାଇଫଏଡ ଭଳି ରୋଗ ସଂକ୍ରମଣର ଆଶଙ୍କା ଦେଖା ଦେଇଛି।
ଉକ୍ତ ସମସ୍ୟା ବାବଦରେ ଗ୍ରାମ୍ୟ ପାନୀୟ ଜଳ ଯୋଗାଣର କନିଷ୍ଠ ଯନ୍ତ୍ରୀ ଏବଂ ପରେ ରାସଗୋବିନ୍ଦପୁର ବିଡିଓଙ୍କୁ ଜଣାଇଥିଲେ ମଧ୍ୟ ସମସ୍ୟା ସମାଧାନ ହୋଇ ପାରିନାହିଁ। ଶେଷରେ ବିଦ୍ୟାଳୟ କର୍ତ୍ତୃପକ୍ଷ ଓ଼ ଗ୍ରାମବାସୀ ଲିଖିତ ଭାବେ ମୋରଡା ବିଧାୟକ ତଥା ଗୃହ ଓ଼ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ରଙ୍କୁ ଗତ ଏପ୍ରିଲ ୧୩ ତାରିଖରେ ଜଣାଇଥିଲେ ମଧ୍ୟ ସମସ୍ୟା ସମଧାନ ନହେବାରୁ ସୋମବାର ବାଧ୍ୟ ହୋଇ ଅଭିଭାବକ ଓ଼ ଛାତ୍ରୀଛାତ୍ର ମାନେ ବିଦ୍ୟାଳୟ ଆଗରେ ଧାରଣାରେ ବସିଛନ୍ତି। ଏବାବଦରେ ବିଡିଓ ଅନନ୍ତ କୁମାର ହାଁସଦାଙ୍କୁ ପଚାରିବାରୁ ବିଦ୍ୟାଳୟରେ ଏକ ନୂତନ ନଳକୂପ ସ୍ଥାପନ ପାଇଁ ଟଙ୍କା ମଞ୍ଜୁରୀ ହୋଇଛି, ଯଥାଶୀଘ୍ର ନଳକୂପ ସ୍ଥାପନ ହେବ ବୋଲି କହିଛନ୍ତି। ସେପଟେ ମୋରଡା ବିଧାୟକ ମହାପାତ୍ର ସୋସିଆଲ ମିଡ଼ିଆରେ ଭାଇରାଲ ହେବାରେ ବ୍ୟସ୍ତ ବୋଲି ଅଞ୍ଚଳବାସୀ ଆଲୋଚନା କରୁଛନ୍ତି।
Dharitri – Odisha’s No.1 Odia Daily
