ଭାରତୀୟ ଦଳର ପୂର୍ବତନ ବୋଲର ଲକ୍ଷ୍ମୀପଥୀ ବାଲାଜୀ ଆଜି ତାଙ୍କର ୪୦ତମ ଜନ୍ମଦିନ ପାଳନ କରୁଛନ୍ତି। ବାଲାଜୀ ଏପରି ଏକ ବୋଲର୍ ଥିଲେ, ଯିଏ ପାକିସ୍ତାନରେ ଚହଳ ସୃଷ୍ଟି କରିଥିଲେ। ଯଦିଓ ବାଲାଜୀଙ୍କ ଅନ୍ତର୍ଜାତୀୟ କ୍ୟାରିଅର୍ ଅଧିକ ସମୟ ତିଷ୍ଠି ନଥିଲା, କିନ୍ତୁ ସେ ପାଇଥିବା ସମସ୍ତ ସୁଯୋଗରେ ସେ ଏକ ଛାପ ଛାଡିଯାଇଥିଲେ। ୨୭ ସେପ୍ଟେମ୍ବର ୧୯୮୧ରେ ଚେନ୍ନାଇରେ ଜନ୍ମଗ୍ରହଣ କରିଥିବା ବାଲାଜୀ ଭାରତ ପାଇଁ ୩୦ଟି ଦିନିକିଆ, ୮ ଟେଷ୍ଟ ଏବଂ ୫ ଟି -୨୦ ମ୍ୟାଚ ଖେଳିଥିଲେ। ବାଲାଜୀଙ୍କ ନାମରେ ମଧ୍ୟ ଆଇପିଏଲ ଇତିହାସର ପ୍ରଥମ ହ୍ୟାଟ୍ରିକ ସାମିଲ ଅଛି। ସେ ୨୦୦୮ରେ ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ଖେଳିବାବେଳେ ଏହି କମାଲ୍ କରିଥିଲେ।
ବାଲାଜୀ ତାଙ୍କ ଅନ୍ତର୍ଜାତୀୟ କ୍ୟାରିୟରରେ ୭୧ ଉଇକେଟ ନେଇଥିଲେ। ସେ ପଡ଼ିଆରେ ଏପରି ଆଶ୍ଚର୍ଯ୍ୟଜନକ କାର୍ଯ୍ୟ କରିଛନ୍ତି, ଯାହାକୁ ପ୍ରଶଂସକ ଭୁଲିପାରିବ ନାହିଁ। ବାଲାଜୀ ନିଜ ଖେଳ ଏବଂ ହସ ସହିତ ପାକିସ୍ତାନୀ ପ୍ରଶଂସକଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିଥିଲେ। ତାଙ୍କ ବିଷୟରେ ପାକିସ୍ତାନୀ ଝିଅମାନଙ୍କ ମଧ୍ୟରେ ଏତେ କ୍ରେଜ ଥିଲା ଯେ ତାଙ୍କୁ ଷ୍ଟାଡିୟମରେ ମଧ୍ୟ ଅନେକ ଥର ପ୍ରସ୍ତାବ ଦିଆଯାଇଥିଲା। ୨୦୦୪ରେ ଲକ୍ଷ୍ମୀପଥୀ ବାଲାଜୀ ଟିମ ଇଣ୍ଡିଆ ସହିତ ପାକିସ୍ତାନ ଗସ୍ତରେ ଯାଇଥିଲେ। ସେ ସେଠାରେ ଉଭୟ ବଲ ଏବଂ ବ୍ୟାଟିଂରେ ପାକିସ୍ତାନୀଙ୍କ ମନରେ କୋକୁଆ ଭୟ ସୃଷ୍ଟି କରିଥିଲେ। ସେ ଭାରତୀୟ ଦଳର ଐତିହାସିକ ସିରିଜ ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ। ପାକିସ୍ତାନ ବିପକ୍ଷ ଦୁଇଟି ମ୍ୟାଚରେ ବାଲାଜୀ ୫ ଉଇକେଟ ନେଇ ଭାରତର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ।
ଏହି ସିରିଜ ସମୟରେ ପାକିସ୍ତାନୀ ଝିଅମାନେ ତାଙ୍କୁ ବିବାହ ପାଇଁ ପ୍ରସ୍ତାବ ଦେଉଥିବାର ଦେଖାଯାଉଥିଲା। ଷ୍ଟାଡିୟମର ଝିଅମାନେ ବାଲାଜୀ ପାଇଁ ‘ୱିଲ ୟୁ ମ୍ୟାରି ମି’ ର ପୋଷ୍ଟର ଆଣିଥିଲେ, ଏହି ସିରିଜର ପଞ୍ଚମ ଦିନିକିଆରେ ମଧ୍ୟ ଏକ ମଜାଦାର ଘଟଣା ଘଟିଥିଲା। ବାଲାଜୀ ଶୋଏବ ଅଖତରଙ୍କ ବଲରୁ ଏକ ଛକା ମାରିଥିଲେ, ଯାହା ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ତେବେ ଏହି ବଲ ପରେ ଶୋଏବ ଅଖତର ତାଙ୍କ ଦ୍ରୁତ ୟକର୍ର୍ ସହିତ ବାଲାଜୀଙ୍କ ବ୍ୟାଟ ଭାଙ୍ଗିଥିଲେ। ବାଲାଜୀ ଖୁସି ମିଜାଜ୍ର ବ୍ୟକ୍ତି। ତାଙ୍କୁ ଦେଖି ଲାଗୁଥିଲା ଯେ ସେ ସବୁବେଳେ ହସୁଛନ୍ତି, କିନ୍ତୁ ଏହା ପଛର କାରଣ ହେଉଛି ଦାନ୍ତର ଅପରେସନ। ବାଲାଜୀଙ୍କ ଦାନ୍ତ ପିଲାଦିନରେ ଅପରେସନ କରାଯାଇଥିଲା। ଏହି କାରଣରୁ ତାଙ୍କ ଚେହେରା ଏପରି ହୋଇଗଲା ଯେ, ସେ ସବୁବେଳେ ହସୁଥିବା ପରି ଲାଗୁଥିଲା।
