ରୂପସା,୧।୨(ଡି.ଏନ୍.ଏ.): ବାଲେଶ୍ୱର ଜିଲା ୬୦ ନମ୍ବର ଜାତୀୟ ରାଜପଥର ସଦର ବ୍ଲକ ଅନ୍ତର୍ଗତ ହଳଦୀପଦା ବାଇପାସ ନିକଟରେ ବୁଧବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ଅଜଣା ଗାଡି ଧକ୍କାରେ ଜଣେ ଆଇନ କଲେଜ ଛାତ୍ରଙ୍କ ମୃତ୍ୟୁ ଘଟିଛି । ମୃତ ଛାତ୍ର ହେଲେ ପଶ୍ଚିମବଙ୍ଗ କଲିକତା ଅଞ୍ଚଳର ଅରୁଣ ଚାଟାର୍ଜୀଙ୍କ ପୁଅ ଅଭି ଚାଟାର୍ଜୀ (୪୧) । ସେ ବାଲେଶ୍ୱର ଆଇନ କଲେଜରେ ଅଧ୍ୟୟନ କରୁଥିବା ଜଣାପଡିଛି । ସେ ତାଙ୍କ ସ୍କୁଟି ନଂ ଡବ୍ଲ୍ୟୁବି୦୧ଏଏନ୍୫୨୫୫ ଯୋଗେ ବାଲେଶ୍ୱର ଯାଉଥିବାବେଳେ ଏହି ଦୁର୍ଘଟଣା ଘଟିଥିଲା । ଛାତ୍ରଜଣକର ମୁଣ୍ଡକୁ ଚାପି ଦେଇ ଅଜଣା ଗାଡିଟି ଚମ୍ପଟ ମାରିଥିଲା । ଘଟଣାସ୍ଥଳରେ ବସ୍ତା ଥାନା ପୋଲିସ ଓ ରାଜପଥ ଆମ୍ବୁଲାନ୍ସ ପହଞ୍ଚି ମୃତଦେହ ଜବତ କରିଥିଲେ। ଏ ସଂକ୍ରାନ୍ତରେ ପୋଲିସ ଏକ ମାମଲା ରୁଜୁ କରି ତଦନ୍ତ ଜାରିରଖିଛି । ମୃତକଙ୍କ ଠାରୁ ମିଳିଥିବା ଆଇନ କଲେଜର ଆଇଡେଣ୍ଟିଟି କାର୍ଡରୁ ତାଙ୍କର ପରିଚୟ ମିଳିଥିବା ପୋଲିସ କହିଛି।
