ରାୟଗଡା,୭।୨(ସ୍ବ.ପ୍ର.): ରାୟଗଡା ଜିଲାରେ ଦିନକୁ ଦିନ ଚୋରି ବଢିବାରେ ଲାଗିଛି। ପୁଣି ସୋମବାର ଏହାର ପୁନରାବୃତ୍ତି ଘଟିଛି। ସହରର ଗାୟତ୍ରୀ ନଗର ଚତୁର୍ଥ ଲେନରେ ଜଣେ ବ୍ୟବସାୟୀଙ୍କ ଘରୁ ବଡ଼ ଧରଣର ଚୋରି ହୋଇଛି। ସୋମବାର ରାତିରେ ଚୋରମାନେ ସଂଘବଦ୍ଧ ଭାବେ ଘରେ ପଶି ସମସ୍ତ ସୁନା ଓ ରୂପା ଅଳଙ୍କାର ସମେତ ନଗଦ ଟଙ୍କା ଚୋରି କରିଛନ୍ତି। ୫ ଭରି ସୁନା ଅଳଙ୍କାର ସମେତ ୧ କେଜିରୁ ଅଧିକ ରୂପା ଓ ନଗଦ ଦେଢ ଲକ୍ଷ ଟଙ୍କା ନେଇଯାଇଥିବା ଜଣାପଡ଼ିଛି। ଘରେ ରହୁଥିବା ବ୍ୟବସାୟୀ ପି. ରାମବାବୁ ନିଜ ମା’ଙ୍କୁ ନେଇ ବିଶାଖାପାଟଣା ଚିକିତ୍ସା ପାଇଁ ଯାଇଥିବା ବେଳେ ଏହାର ସୁଯୋଗ ନେଇ ରାତିରେ ଘରେ ପଶି ଚୋରି କରିଛନ୍ତି ଲୁଟେରା। ପ୍ରଥମ ମହଲା ଘରେ ଏହି ଚୋରି ହୋଇଥିବା ବେଳେ ତଳ ମହଲାରେ ଥିବା ଘରେ ମଧ୍ୟ ଭଙ୍ଗାରୁଜା କରିଥିବା ନଜରକୁ ଆସିଛି। ତେବେ ସେହି ଘର ମାଲିକ ମଧ୍ୟ ବାହାରେ ରହୁଥିବା କାରଣରୁ ସବିଶେଷ ତଥ୍ୟ ହସ୍ତଗତ ହୋଇନାହିଁ। ତେବେ ରାୟଗଡା ପୋଲିସର ଅପାରଗତା ସ୍ପଷ୍ଟ ଦେଖାଯାଉଛି। ପୋଲିସ ସହର ଭିତରେ ନିଷ୍କ୍ରିୟ ଥିବା ଯୋଗୁ ଆଇନ ଶୃଙ୍ଖଳା ପରିସ୍ଥିତି ବିଗିଡିବାରେ ଲାଗିଛି। ଫଳରେ ଲଗାତାର ଭାବେ ଏହିଭଳି ଘଟଣା ଲୋକଙ୍କ ଚିନ୍ତା ବଢ଼ାଇଛି।
