ଗୁଣପୁର,୨୩ା୯(ଡି.ଏନ୍.ଏ.): ଆଦିମ ଜନଜାତି ଲାଞ୍ଜିଆ ସୌରା ବର୍ଗର ଲୋକଙ୍କ ଜୀବନ ଜୀବିକା, ସାମାଜିକ, ଆର୍ଥିକ, କୃଷି ଭିତ୍ତିକ ଉନ୍ନତି ସାଧନ ପାଇଁ ରାଜ୍ୟ ସରକାର ସ୍ବତନ୍ତ୍ର ଭାବେ ଲାଞ୍ଜିଆ ସୌରା ଉନ୍ନୟନ ସଂସ୍ଥା(ଏଲ୍ଏସ୍ଡିଏ), ଓଡ଼ିଶା ସଶକ୍ତୀକରଣ ଓ ଜୀବିକା ମିଶନ ଭଳି ଅନେକ ଉପ ବିଭାଗ କରିଛନ୍ତି। ଏଥିରେ ଅନେକ କର୍ମଚାରୀ କାର୍ଯ୍ୟ କରୁଥିବା ବେଳେ ଏ ବାବଦରେ ଅନୁଦାନ ମଧ୍ୟ ଯୋଗାଇ ଦିଆଯାଉଛି। ହେଲେ ସଂସ୍ଥାରେ କାର୍ଯ୍ୟରତ କର୍ମଚାରୀଙ୍କ କାର୍ଯ୍ୟଧାରାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଆଦିମ ଜନଜାତିର ଲୋକେ। କର୍ମଚାରୀମାନେ ମନମୁଖୀ କାର୍ଯ୍ୟ କରୁଥିବା ଅଭିଯୋଗ କରି ଶୁକ୍ରବାର ପୁଟାସିଂ ସ୍ଥିତ ଏଲ୍ଏସ୍ଡିଏ କାର୍ଯ୍ୟାଳୟ ସମ୍ମୁଖରେ ଲାଞ୍ଜିଆ ସୌରା ବର୍ଗର ଲୋକେ ଧାରଣାରେ ବସିଥିଲେ। ସମସ୍ୟା ସମାଧାନର ପ୍ରତିଶ୍ରୁତି ପରେ ଧାରଣାରୁ ହଟିଛନ୍ତି।
କର୍ମଚାରୀ ମାନେ କାର୍ଯ୍ୟାଳୟରେ ଅନୁପସ୍ଥିତ ରହିବା, ଶଗଡ଼ା ଗ୍ରାମର ହିଲ୍ କିଙ୍ଗ୍ ଏସ୍ଏଚ୍ଜି ମହିଳାଙ୍କୁ ଧାନକଟା ଯନ୍ତ୍ର ପ୍ରଦାନ କରାଯିବାକୁ ପ୍ରତିଶ୍ରୁତି ଦେଇ ଭଣ୍ଡେଇବା, ଏମ୍ଜିଏନ୍ଆର୍ଇଜିଏସ୍ରେ ପଥର ବନ୍ଧ କାର୍ଯ୍ୟର ପ୍ରାପ୍ୟ ନ ଦେବା, ଉନ୍ନୟନ ସଂସ୍ଥାରେ କାର୍ଯ୍ୟ କରୁଥିବା ପିଅନ, ଗାଡ଼ି ଚାଳକ, ରାତ୍ରି ଜଗୁଆଳି ଓ ୫ ଏମ୍ପିଡବ୍ଲୁଙ୍କୁ ବିନା ସର୍ତ୍ତରେ କାର୍ଯ୍ୟରୁ ଅନ୍ତର କରିବା, ସମସ୍ତ ଭିଡିସି କମିଟି ସଭାପତି ଭାବେ ଅଶିକ୍ଷିତ ମହିଳାଙ୍କୁ ରଖିବା ଯୋଗୁ କାର୍ଯ୍ୟରେ ବାଧା ସୃଷ୍ଟି ହେବା ଭଳି ଗୁରୁତର ଅଭିଯୋଗ ଲାଞ୍ଜିଆ ସୌରା ବର୍ଗର ଲୋକଙ୍କ ପକ୍ଷରୁ କରାଯାଇଥିଲା। ଶଗଡ଼ା ଓ ପୁଟାସିଂ ପଞ୍ଚାୟତର ଜନ ପ୍ରତିନିଧି ଏବଂ ଅଞ୍ଚଳବାସୀ ଦିବସ ରାଇକା, ମାଥ୍ୟୁ ଦଳବେହେରା, ଜୁନେସ ଶବର, ମିଖାଏଲ ଗମାଙ୍ଗ, ଇର୍ଫାନ ଗମାଙ୍ଗ, ସୁରିନ କାର୍ଯୀ, ସୋମନାଥ ଗମାଙ୍ଗ ଓ ରାଜେଶ ଗମାଙ୍ଗଙ୍କ ନେତୃତ୍ୱରେ ଲାଞ୍ଜିଆ ସୌରା ଲୋକେ ଶାନ୍ତିପୂର୍ଣ୍ଣ ଧାରଣା ଦେଇଥିଲେ। ପରେ ଉନ୍ନୟନ ସଂସ୍ଥାର ସ୍ବତନ୍ତ୍ର ଅଧିକାରୀ ଓ ଜୀବିକା ମିଶନର ଅଧିକାରୀ ସମସ୍ୟା ସମାଧାନର ଲିଖିତ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
