ଆରଡ଼ି, ୨୧।୯( ଡି.ଏନ.ଏ.): ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଆରଡ଼ି ପଞ୍ଚାୟତର ଶୀତଳପୁରଠାରେ ସାଳନ୍ଦୀ ନଦୀକୂଳରେ ମଙ୍ଗଳବାର ସକାଳେ ପୁଣି ଭୁସ୍ଖଳନ ହୋଇଛି। ଫଳରେ ନଦୀକୂଳବର୍ତ୍ତୀ ଜଣେ ବ୍ୟକ୍ତିଙ୍କ ୨ ବଖରା ଘର ସମ୍ପୂର୍ଣ୍ଣ ଭୁଶୁଡ଼ି ପଡ଼ିଛି। ଲଗାଣ ବର୍ଷା ଓ ନଦୀ ଜୁଆରିଆ ଯୋଗୁ ଏହି ଭୁସ୍ଖଳନ ହୋଇଥିବା ଜଣାପଡ଼ିଛି।
ପ୍ରକାଶ ଯେ, ପୂର୍ବରୁ ଗତ ଫେବୃୟାରୀରେ ଏଠାରେ ଭୁସ୍ଖଳନ ଯୋଗୁ ବିରାଟ ଗର୍ତ୍ତ ସୃଷ୍ଟି ହୋଇଥିଲା। ଏଥିରେ କେତୋଟି ତାଳଗଛ ଉପୁଡ଼ି ପଡ଼ିବା ସହ ଘର ଦବି ଯାଇଥିଲା। ତତ୍କାଳୀନ ଜିଲାପାଳ ତ୍ରିଲୋଚନ ମାଝି ଘଟଣାସ୍ଥଳକୁ ଆସି ଅନୁଧ୍ୟାନ କରି ସ୍ଥାୟୀ ପଥରବନ୍ଧ ନିର୍ମାଣ ନିମନ୍ତେ ଯାଜପୁର ଜଳସେଚନ ବିଭାଗ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଏଥିସହ ନଦୀକୂଳିଆ ୫ ପରିବାରକୁ ଅନ୍ୟତ୍ର ବସବାସ କରିବାକୁ ସେ ପରାମର୍ଶ ଦେଇଥିଲେ। ଜଣେ ଠିକାଦାର କେଇ ଟ୍ରିପ୍ ପଥର ପକାଇ ଚୁପ୍ ହୋଇ ବସିଥିବା ଗ୍ରାମବାସୀ କହିଛନ୍ତି। କିଛିଦିନ ତଳେ ବିଭାଗୀୟ ଅଧିକାରୀମାନେ ଆସି ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଭୁସ୍ଖଳନ ଯୋଗୁ ବାସଗୃହ ହରାଇଥିବା ପରିବାରକୁ ଆବଶ୍ୟକ ଅନୁଯାୟୀ ଆର୍ଥିକ ସହାୟତା ଯୋଗାଇ ଦେବା କଥା ମଧ୍ୟ ଆଲୋଚନା କରାଯାଇଥିଲା। ଆସନ୍ତା ନଭେମ୍ବରରେ ବନ୍ଧ ନିର୍ମାଣ କାର୍ଯ୍ୟ ହେବ ବୋଲି ଅଧିକାରୀମାନେ କହିଥିଲେ। ହେଲେ ତା’ ପୂର୍ବରୁ ବାସଗୃହ ଭୁଶୁଡ଼ିବା ଗ୍ରାମବାସୀଙ୍କ ଚିନ୍ତା ବଢ଼ାଇ ଦେଇଛି। ଏ ସମ୍ପର୍କରେ ଜଳସେଚନ ବିଭାଗ କନିଷ୍ଠ ଯନ୍ତ୍ରୀ କିଶୋର ଦାସ କହିଛନ୍ତି, ମଙ୍ଗଳବାର ଭୁସ୍ଖଳନ ବିଷୟରେ ସେ ଜାଣିନାହାନ୍ତି। ତେବେ ସେଠାରେ ଥିବା ବାସ ଅନୁପଯୋଗୀ ଗୃହ ଭୁଶୁଡ଼ି ପଡ଼ିବାର ସମ୍ଭାବନା ଥିଲା। ୮ ଦିନ ତଳେ ସେହି ଘରର ପରିବାର ଲୋକଙ୍କ ସହ ଆଲୋଚନା କରାଯାଇଥିଲା। ଆସନ୍ତା ଦୁଇମାସ ମଧ୍ୟରେ ନଦୀକୂଳରେ ସ୍ଥାୟୀ ବନ୍ଧ ନିର୍ମାଣ ଆରମ୍ଭ ହେବ।
