ରାଜନଗର,୫ା୮(ଡି.ଏନ.ଏ.): ବଙ୍ଗୋପସାଗର ଆଁ ମୁହଁରେ ଥିବା ରାଜନଗର ବ୍ଲକ ସାତଭାୟାର ୫୭୧ ପରିବାରକୁ ବଗପାଟିଆଠାରେ କଲୋନୀରେ ଥଇଥାନ କରାଯାଇଛି। ଅନ୍ୟପକ୍ଷେ ୨୪୭ ପରିବାର ଏବେବି ଥଇଥାନ ଅପେକ୍ଷାରେ ରହିଥିଲେ। ସାତଭାୟା ପଞ୍ଚାୟତର କାନପୁରର ୬୬ ପରିବାରକୁ ୧୦ନଂ. ରୁ ୧୯ ନଂ. ଲେନରେ, ସାତଭାୟାର ୮୨ ପରିବାରକୁ ୧ ନଂ.ରୁ ୯ନଂ. ଲେନରେ ଓ ଚାରିଘରିଆର ୯୯ ପରିବାରକୁ ୧୪ନଂ.ରୁ ୧୯ନଂ. ଲେନ ମଧ୍ୟରେ ଜାଗା ଚିହ୍ନଟ ଦିଆଯାଇଛି। ପ୍ରତ୍ୟେକ ପରିବାରକୁ ୧୦୦ କଡି ଲମ୍ବା ଓ ୧୦୦ କଡି ଚଉଡାରେ ଜାଗା ଚିହ୍ନଟ ଦିଆଯାଇଛି। ଏହି ୨୪୭ ପରିବାରକୁ ବିଜୁ ପକ୍କାଘର ଯୋଗାଇ ଦେବାକୁ ଜିଲା ପ୍ରଶାସନ ପକ୍ଷରୁ ରାଜ୍ୟ ସରକାରଙ୍କୁ ଚିଠି ଲେଖାଯାଇଛି। ବର୍ତ୍ତମାନ ବର୍ଷାଦିନ ହୋଇଥିବାରୁ ପରେ ବିଜୁ ପକ୍କାଘର ଯୋଗାଇ ଦିଆଯିବ ବୋଲି ଜଣାପଡିଛି। କେନ୍ଦ୍ରାପଡ଼ା ଉପଜିଲାପାଳ ନିରଞ୍ଜନ ବେହେରା, ତହସିଲଦାର ଭୋଳାନାଥ ସେଠୀ, ବିଡିଓ ରବୀନ୍ଦ୍ର କୁମାର ପ୍ରଧାନ, ଆଇଆଇସି ତପନ କୁମାର ନାୟକ, ସରପଞ୍ଚ ପ୍ରସନ୍ନ କୁମାର ପରିଡା, ସମିତିସଭ୍ୟ କୌଶିକ ବେହେରା, ସାତଭାୟା ଥଇଥାନ କମିଟିର ସଦସ୍ୟ କରୁଣାକର ସ୍ବାଇଁ, ନିରଞ୍ଜନ ସ୍ବାଇଁ, ସୁଦର୍ଶନ ରାଉତ, ମଙ୍ଗୁଳି ଚରଣ ଦାସ, ଅକ୍ଷୟ କୁମାର ପରିଡା ପ୍ରମୁଖ ଏହି ଜାଗା ଚିହ୍ନଟ କାର୍ଯ୍ୟକ୍ରମରେ ଉପସ୍ଥିତ ଥିଲେ।
