ପିଲାଙ୍କ ଖୁସି ବାପାମା’ଙ୍କ ପାଇଁ ସବୁକିଛି। ତାଙ୍କ ମୁହଁରେ ଚେନାଏ ହସ ଫୁଟେଇବା ଲାଗି ସେମାନେ ସବୁକିଛି କରିପାରନ୍ତି। ଠିକ୍ ଯେମିତି ଭିଏତନାମର ଟ୍ରୁଓଙ୍ଗ ଭାନ ଦାଓ ନାମକ ଜଣେ ବ୍ୟକ୍ତି ନିଜ ପୁଅ ପାଇଁ ତିଆରି କରିଛନ୍ତି ଏକ ଲକ୍ଜ୍ୟୁରୀୟସ୍ ଇଲେକ୍ଟ୍ରିକ୍ କାର। ଟ୍ରୁଓଙ୍ଗଙ୍କ ପୁଅକୁ ଲମ୍ବରଘିନି କାର୍ ବହୁତ ପସନ୍ଦ ଥିଲା। ଆଉ ସେହି ଲକ୍ଜ୍ୟୁରୀୟସ୍ କାର୍ କିଣିବାକୁ ବି ସେ କହୁଥିଲା। ହେଲେ ସେହି କାର୍ କିଣିବା ତାଙ୍କ ପାଇଁ ସମ୍ଭବ ନ ଥିଲା। ତେବେ ଟ୍ରୁଓଙ୍ଗ ଜଣେ କାଠ କାରିଗର। ସେଥିପାଇଁ ସେ କାଠର ଏକ ଲମ୍ବରଘିନି କାର୍ ତିଆରି କରିବାକୁ ଚିନ୍ତା କଲେ। ଆଉ ଅଦରକାରୀଭାବେ ପଡିଥିବା କିଛି କାଠକୁ କାଟି ତାକୁ ଲମ୍ବରଘିନି କାର୍ର ରୂପ ଦେବାକୁ ଲାଗିଲେ। ତା’ର ସମ୍ପୂର୍ଣ୍ଣ ପଦ୍ଧତିକୁ ରେକର୍ଡ କରି ସେ ନିଜ ୟୁଟ୍ୟୁବ ଚ୍ୟାନେଲରେ ବି ଅପଲୋଡ କରିଛନ୍ତି। କାର୍ର ପ୍ରତି ପାର୍ଟକୁ ସେ ଏତେ ନିଖୁଣଭାବେ କରିଛନ୍ତି ଯେ, ତାହା ବାସ୍ତବ ପରି ଲାଗେ। ଏହି କାଠର ଗାଡି ଯେ, କେବଳ ଲମ୍ବରଘିନି କାର୍ ପରି ଦେଖାଯାଉଛି ତାହା ନୁହେଁ, ବରଂ ତାହା ସତସତିକା କାର୍ ପରି ଚାଲିପାରେ ମଧ୍ୟ। କାରଣ ସେହି କାର୍ରେ ସେ ଏକ ଛୋଟ ମୋଟର ସଂଯୋଗ କରିଛନ୍ତି। କାର୍ଟି ଘଣ୍ଟା ପ୍ରତି ୨୫ କି.ମି. ବେଗରେ ଗତି କରିପାରେ। ଟ୍ରୁଓଙ୍ଗଙ୍କୁ ଉକ୍ତ କାର୍ ତିଆରି କରିବା ଲାଗି ୬୫ ଦିନ ଲାଗିଯାଇଥିଲା। କାର୍ଟି ସମ୍ପୂର୍ଣ୍ଣ ଗଢା ହେବା ପରେ ତାଙ୍କ ପୁଅ ତାକୁ ଦେଖି ବହୁତ ଖୁସି ହୋଇଯାଇଥିଲା। ଆଉ ବାପା ପୁଅ ଦୁହେଁ ମିଶି କାର୍ ରାଇଡ୍ର ମଜା ଉଠାଇଥିଲେ।
