ରାୟଗଡ଼ା,୧୦ା୪(ସ୍ବ.ପ୍ର.): ରାୟଗଡ଼ାର ଅଧିଷ୍ଠାତ୍ରୀ ଦେବୀ ମା’ ମଝିଘରିଆଣିଙ୍କ ମନ୍ଦିର ରସିଦ୍ ବହିରେ ଜାଲିଆତି କରାଯାଇଛି। ମନ୍ଦିରର କେତେଜଣ ଅସାଧୁ କର୍ମଚାରୀ ମା’ଙ୍କ ନିକଟକୁ ମୁଣ୍ଡନ ପାଇଁ ଆସୁଥିବା ମାନସିକଧାରୀଙ୍କୁ ନକଲି ଟିକେଟ ଦେଇ ଲକ୍ଷାଧିକ ଟଙ୍କା ଲୁଟ୍ କରିଛନ୍ତି। ମନ୍ଦିର ଟ୍ରଷ୍ଟ ଦ୍ୱାରା ନିୟୋଜିତ କର୍ମଚାରୀ ଏହି ଜାଲିଆତି କରିଥିବା ଅଭିଯୋଗ ହୋଇଛି।
ମା’ ମଝିଘରିଆଣିଙ୍କ ମନ୍ଦିରରେ ପ୍ରତିଦିନ ମାନସିକଧାରୀମାନେ ମୁଣ୍ଡନ କରିଥାଆନ୍ତି। ମୁଣ୍ଡନ ପାଇଁ ମନ୍ଦିର ତରଫରୁ ଜଣ ପିଛା ୫୦ ଟଙ୍କା ଧାର୍ଯ୍ୟ କରାଯାଇଛି। ମୁଖ୍ୟତଃ ମଙ୍ଗଳବାର, ବୁଧବାର, ଶୁକ୍ରବାର ଓ ରବିବାର ମୁଣ୍ଡନ ପାଇଁ ବହୁ ଶ୍ରଦ୍ଧାଳୁ ଆସିଥାଆନ୍ତି। ଏସବୁ ବାରରେ ୩୦୦ରୁ ଅଧିକ ଶ୍ରଦ୍ଧାଳୁ ମୁଣ୍ଡନ ହେଉଛନ୍ତି। ଏହାର ସୁଯୋଗ ନେଇ ମନ୍ଦିରର କେତେଜଣ କର୍ମଚାରୀ ନକଲି ରସିଦ୍ ବହି ମୁଦ୍ରଣ କରି ଟିକେଟ ଦେଉଛନ୍ତି। ଗତ କିଛି ଦିନ ହେବ ମୁଣ୍ଡନ ଶ୍ରଦ୍ଧାଳୁଙ୍କ ସଂଖ୍ୟା କମ ରହିବାରୁ ସନ୍ଦେହ ଉପୁଜିଥିଲା। ମୁଣ୍ଡନ ବାବଦ ଅର୍ଥ ଆଦାୟ କେଉଁ କାରଣରୁ କମୁଛି ଜାଣିବା ପାଇଁ ମନ୍ଦିର ପରିଚାଳନା କମିଟି ଗୁପ୍ତ ଭାବେ ତଦନ୍ତ କରିଥିଲା। ଚଳିତଥର ଚୈତ୍ର ପର୍ବରେ ମା’ଙ୍କ ନିକଟରେ ଅଧିକ ସଂଖ୍ୟାରେ ଶ୍ରଦ୍ଧାଳୁ ମୁଣ୍ଡନ ହୋଇଥିଲେ ମଧ୍ୟ ଟଙ୍କା ବୃଦ୍ଧି ଘଟି ନଥିବାରୁ ଜାଳିଆତି ସ୍ପଷ୍ଟ ହୋଇଛି। ୯୪ ନମ୍ବର ବହିର ୧୪୩୬୧ ନଂ ରସିଦ୍ରେ ଦୁଇ ଜଣଙ୍କୁ ଟିକେଟ ଦିଆଯାଇଛି। କେବଳ ଏହି ଗୋଟିଏ ଘଟଣା ନୁହେଁ କିଛି ମାସ ପୂର୍ବରୁ ମନ୍ଦିର ପରିସରରୁ ମୁଣ୍ଡନ ଚୁଟି ମଧ୍ୟ ଚୋରି ହୋଇଥିଲା। ଯାହାର ମୂଲ୍ୟ ପ୍ରାୟ ୭ ଲକ୍ଷ ଟଙ୍କା ହେବ। ହେଲେ ମନ୍ଦିର ତରଫରୁ ଏ ନେଇ କୌଣସି କାର୍ଯ୍ୟାଷ୍ଠାନ ଗ୍ରହଣ କରାଗଲାନାହିଁ। ଦେବୋତ୍ତର ବିଭାଗ ଏସବୁ ଘଟଣାର ଉଚ୍ଚସ୍ତରୀୟ ତଦନ୍ତ କରିବା ଜରୁରୀ ହୋଇପଡିଛି। ଘଟଣା ସମ୍ପର୍କରେ ମନ୍ଦିର ପରିଚାଳନା କମିଟି ଟ୍ରଷ୍ଟି ରାଇସିଂ ବିଡିକା କହିଛନ୍ତି, ଗଣମାଧ୍ୟମରୁ ଏହି ଘଟଣା ଜାଣିବାକୁ ପାଇଲି। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
