ବରଗଡ଼,୧୭।୬(ପ୍ରେମାନନ୍ଦ ଖମାରୀ):ବିକଶୀତ ବରଗଡ଼ ଲକ୍ଷ୍ୟ ନେଇ ସହରର ବିଭିନ୍ନ ରାସ୍ତାପାର୍ଶ୍ୱରେ ଆଲୋକୀକରଣ ବ୍ୟବସ୍ଥା କରାଯାଇଛି। ମାତ୍ର ରକ୍ଷଣାବେକ୍ଷଣ ଅଭାବରୁ ବାରମ୍ବାର ଏହି ଆଲୋକୀକରଣ ବ୍ୟବସ୍ଥା ଠପ୍ ପଡ଼ି ଯାଇଛି। କେଉଁଠି ଅଧେ ଅଂଶ ଆଲୋକିତ ହୋଇଥିବାବେଳେ ଅଧେ ଅଂଶ ଦୀର୍ଘଦିନ ଧରି ଅନ୍ଧାରରେ ରହୁଛି। ସହର ଉପକଣ୍ଠ ଜୀରାନଦୀ ବ୍ରିଜ, ଭଟଲି ଛକରୁ ଆଶାକିରଣ ପଟକୁ ଯାଇଥିବା ଆଲୋକୀକରଣ ବ୍ୟବସ୍ଥାରେ ଏଭଳି ସମସ୍ୟା ରହିଛି। ସମ୍ପୃକ୍ତ ଅଞ୍ଚଳର ଅନେକ ସ୍ଥାନ ଅନ୍ଧାରରେ ରହୁଥିବାରୁ ଚୋରି, ଲୁଟ୍ପାଟ୍ର ଆଶଙ୍କା ବଢ଼ିବାରେ ଲାଗିଛି। ତେବେ ଲକ୍ଷାଧିକ ଟଙ୍କା ବ୍ୟୟ ଅଟକଳରେ ଆଲୋକୀକରଣ ବ୍ୟବସ୍ଥା କରାଯାଇ ଥିବାବେଳେ ବାରମ୍ବାର ତାହା ଠପ୍ ପଡ଼ି ଯାଉଥିବା ଏବଂ ଏହାର ରକ୍ଷଣାବେକ୍ଷଣ ଦାୟିତ୍ୱରେ ରହିଥିବା ଲୋକେ ମଧ୍ୟ ସେଥିପ୍ରତି ଆଖିବୁଜି ଦେବା ଘଟଣାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି। ଏହାର ତୁରନ୍ତ ମରାମତି କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।
