ଭୁବନେଶ୍ୱର,୧୩।୩(ବ୍ୟୁରୋ): ଗୋଟିଏ ଅଞ୍ଚଳର ମାତୃଭାଷା ସେହି ଅଞ୍ଚଳର ମାତୃ ସଂସ୍କୃତିକୁ ଜନ୍ମ ଦିଏ। ଯେପରି ପଶ୍ଚିମ ଓଡ଼ିଶାର କୋସଲି ମାତୃଭାଷା କୋସଲି ମାତୃ ସଂସ୍କୃତିକୁ ଜନ୍ମ ଦେଇଛି। କୋସଲି ସଂସ୍କୃତି ହେଉଛି ମୂଳତଃ ଯୋଗ ସଂସ୍କୃତି। ପଶ୍ଚିମ ଓଡ଼ିଶାବାସୀଙ୍କ ସବୁଠାର ବଡ଼ ସମ୍ବଳ ହେଉଛି ସେମାନଙ୍କ ଭାଷା ସଂସ୍କୃତି। ପ୍ରାଥମିକ ସ୍ତରରେ ଶିଶୁମାନଙ୍କୁ ସେମାନଙ୍କ ମାତୃଭାଷାରେ ଶିକ୍ଷା ଦିଆଯାଉ ନ ଥିବାରୁ ସେମାନଙ୍କ ବୌଦ୍ଧିକ ବିକାଶ ହେଉନାହିଁ। ଶିଶୁମାନେ ଅଧାରୁ ପାଠପଢା ଛାଡିଦେଉଛନ୍ତି କିମ୍ବା ନିରକ୍ଷର ରହିବାକୁ ପସନ୍ଦ କରୁଛନ୍ତି। ତେଣୁ କୋସଲି ଭାଷାକୁ ଗୁରୁତ୍ୱ ଦେବାକୁ କୋସଲ ସାହିତ୍ୟ ସଂସ୍କୃତି ଏକାଡେମୀ ତରଫରୁ ରାଜ୍ୟ ସରକାରଙ୍କଠାରେ ୩ ଦାବି ଉପସ୍ଥାପନ କରାଯାଇଛି। ଏନେଇ ଶନିବାର ଉତ୍କଳ ସାମ୍ବାଦିକ ଭବନରେ ଆୟୋଜିତ କାର୍ଯ୍ୟକ୍ରମରେ ଏକାଡେମୀ ଦାବି କରିଛି ଯେ, କୋସଲି ଭାଷାକୁ ସାମ୍ବିଧାନିକ ମାନ୍ୟତା ମିଳୁ। ଏହାକୁ ଓଡ଼ିଶାର ଅନ୍ୟତମ ସରକାରୀ ଭାଷାଭାବେ ଗ୍ରହଣ କରାଯିବା ସହ
ପ୍ରାଥମିକ ସ୍ତରରେ ପଶ୍ଚିମ ଓଡ଼ିଶାର ଶିଶୁମାନଙ୍କୁ କୋସଲି ଭାଷାରେ ଶିକ୍ଷା ଦିଆଯାଉ। ଓଡ଼ିଶା ତଥା ଭାରତର ସାଂସ୍କୃତିକ ନାଭିକେନ୍ଦ୍ର ସୁବଣ୍ଣର୍ର୍ପୁରରେ କୋସଲ ବିଶ୍ବବିଦ୍ୟାଳୟ ସ୍ଥାପନ କରାଯାଉ।
ଅବସରରେ ଏକାଡେମୀ ଓ କୋସଲ ହେରିଟେଜ ଟ୍ରଷ୍ଟ ପକ୍ଷରୁ ଏକ ପୁସ୍ତକ ଲୋକାର୍ପଣ ଉତ୍ସବ ଅନୁଷ୍ଠିତ ହୋଇଥିଲା। ହିନ୍ଦୀ, ଓଡ଼ିଆ ଓ କୋସଲି ଭାଷାରେ ତିନୋଟି ପୁସ୍ତକ ‘ଅଦ୍ୱୟ ସିଦ୍ଧି’, ‘ମନଗହନ’ ଓ ‘ପ୍ରଜ୍ଞାଲୋକ’ ଲୋକାର୍ପିତ ହୋଇଥିଲା। ଏକାଡେମୀର କାର୍ଯ୍ୟକାରୀ ସଭାପତି ଅବସରପ୍ରାପ୍ତ ଆଇଏଏସ୍ ଅଫିସର ନରେନ୍ଦ୍ର କୁମାର ମିଶ୍ର ଅଧ୍ୟକ୍ଷତା କରି କହିଲେ, ଓଡ଼ିଶାର ପ୍ରାୟ ଦୁଇକୋଟିରୁ ଅଧିକ ଲୋକ ଏହି ଭାଷା ବ୍ୟବହାର କରୁଥିବାରୁ ଏହାକୁ ଓଡ଼ିଶାର ଅନ୍ୟତମ ସରକାରୀ ଭାଷା ଭାବେ ସରକାର ଗ୍ରହଣ କରିବା ଉଚିତ। ସାରସ୍ବତ ସାଧକ ପଣ୍ଡିତ ଡ. ପ୍ରବୋଧ ମିଶ୍ର ମୁଖ୍ୟ ଅତିଥି ଭାବେ ଯୋଗଦେଇ କୋସଲି ଭାଷା ଅତ୍ୟନ୍ତ ପ୍ରାଚୀନ ଓ ସମୃଦ୍ଧ ବୋଲି ମତବ୍ୟକ୍ତ କରିବା ସହିତ ତା’ର ମହନୀୟତା ଉପରେ ଆଲୋକପାତ କରିଥିଲେ। ଉତ୍କଳ ବିଶ୍ୱବିଦ୍ୟାଳୟ ସଂସ୍କୃତ ଓ ଯୋଗ ବିଭାଗ ମୁଖ୍ୟ ପ୍ରଫେସର ଡ. ସୁବାସ ଚନ୍ଦ୍ର ଦାଶ ମୁଖ୍ୟବକ୍ତା ଭାବେ ଯୋଗଦେଇ ଅଧିକ ଭାଷା ମାଧ୍ୟମରେ କିଭଳି ଅଧିକ ଜ୍ଞାନ ଲାଭ କରାଯାଇପାରିବ ତାହାର ଅନେକ ଉଦାହରଣ ଦେଇଥିଲେ। ସମ୍ମାନିତ ଅତିଥି ଉତ୍କଳ ସାମ୍ବାଦିକ ସଂଘ ସଭାପତି ବିଭୂତି ଭୂଷଣ କର ଏବଂ ସମ୍ମାନିତ ବକ୍ତା ଶିଳ୍ପୀ ସଞ୍ଜୟ ଭଟ୍ଟ ଭାଷା ଓ ପୁସ୍ତକ ସମ୍ପର୍କରେ କହିଥିଲେ। ପ୍ରଶାସକ ଆଜାଦହିନ୍ଦ୍ ପାଣିଗ୍ରାହୀ ପୁସ୍ତକଗୁଡ଼ିକର ସମୀକ୍ଷା କରିଥିବାବେଳେ ଖବରଦାତା ଗୋରେଖନାଥ ସାହୁ ସଂଯୋଜନା କରିଥିଲେ।
