କୋରାପୁଟ,୨୨ା୧୦(ଅମିତାଭ ବେହେରା )କୋରାପୁଟ କୋଲାବ ଜଳଭଣ୍ଡାର ଏବେ ଦଳ ଭଣ୍ଡାରରେ ପରିଣିତ ହୋଇଛି। କୋରାପୁଟ ଜିଲାର ଜୟପୁର, ଲମତାପୁଟ, ବୈପାରିଗୁଡା, ନନ୍ଦପୁର, ସେମିଳିଗୁଡା ଓ କୋରାପୁଟ ବ୍ଲକର ବିଭିନ୍ନ ଅଞ୍ଚଳକୁ ସ୍ପର୍ଶ କରି ୧୬୩୦ ବର୍ଗ କିଲୋମିଟର ଜାଗାରେ ବିସ୍ତିର୍ଣ୍ଣ ଏହି ଜଳଭଣ୍ଡାରରେ ଏବେ ଦଳ ମାଡିବା ଆରମ୍ଭ କରି ସମସ୍ୟା ସୃଷ୍ଟି କରିଛି। ଜଳଭଣ୍ଡାରର ଉପର ମୁଣ୍ଡରେ ଥିବା ଅଞ୍ଚଳରେ ବୃକ୍ଷରୋପଣ ତଥା ଅନ୍ୟାନ୍ୟ ମୃତ୍ତିକା ସଂରକ୍ଷଣ ପଦକ୍ଷେପ ନିଆ ଯାଇ ନ ଥିବାରୁ ଜଳଭଣ୍ଡାର ମଧ୍ୟକୁ ବର୍ଷା ଜଳ ସାଙ୍ଗକୁ ମାଟି ପଶି ଆସି ଜଳଭଣ୍ଡାରର ଭୂତଳର ଉଚ୍ଚତା ଧୀରେ ଧୀରେ ବୃଦ୍ଧି କରୁଛି। ତେବେ ଜଳ ସମ୍ପଦ ବିଭାଗ ଏହାକୁ ଏକ ସାମାନ୍ୟ ସମସ୍ୟା ଭାବେ ଭାବିନେଇ ଅଣଦେଖା କରୁଥିବା ଅଭିଯୋଗ ହେଉଛି। ଗତ କିଛିଦିନ ଧରି ସୁନାବେଡା ନିକଟସ୍ଥ କୋଲାବ ଜଳଭଣ୍ଡାରର ଅଂଶରେ ଦଳ ଯେପରି ଭାବେ ବ୍ୟାପିବାରେ ଲାଗିଛି ସେଥିପ୍ରତି ସରକାର ଦୃଷ୍ଟି ନ ଦେଲେ ସମଗ୍ର ଜଳଭଣ୍ଡାର ଦଳମୟ ହୋଇଯିବା ପାଇଁ ଅଧିକ ଦିନ ଲାଗିବ ନାହିଁ ବୋଲି ସୁନାବେଡାର ପରିବେଶବିତ ସୁନିଲ ବିଶ୍ୱାଳ କହିଛନ୍ତି। ଜୟପୁରସ୍ଥିତ ଜଗନ୍ନାଥ ସାଗର ଭଳି ଜଳାଶୟରେ ଦଳ ବାହାର କରିବା ପାଇଁ ପ୍ରଶାସନ ଅସୁବିଧାର ସମ୍ମୁଖୀନ ହେଉଥିବା ବେଳେ ୧୬୩୦ ବର୍ଗ କିଲୋମିଟର ବ୍ୟାପ୍ତ କୋଲାବ ଜଳଭଣ୍ଡାରରେ ଦଳ ମାଡିଗଲେ ଏହାକୁ ସଫା କରିବା ଏକ ପ୍ରକାର ଅସମ୍ଭବ ହୋଇପଡିବ ବୋଲି ବିଶ୍ୱାଳ ମତ ରଖିଛନ୍ତି। କୋଲାବ ଜଳଭଣ୍ଡାର ଉପରେ ଏହାକୁ ସଂଲଗ୍ନ କରୁଥିବା ସମସ୍ତ ସହର ପାନୀୟ ଜଳ ପାଇଁ ନିର୍ଭର କରୁଥିବା ବେଳେ ଏଚଏଏଲ(ହାଲ୍) ଏବଂ ନାଲ୍କୋ ଭଳି ଶିଳ୍ପ ସଂସ୍ଥା ଏହି ଜଳଭଣ୍ଡାରରୁ ଜଳ ନେଇ ସେମାନଙ୍କ କାରଖାନାର ଆବଶ୍ୟକତା ମଧ୍ୟ ପୂରଣ କରିଥାନ୍ତି। ଏହି ଜଳଭଣ୍ଡାରରୁ ମାଛ ଧରି ଅନେକ ଆଦିବାସୀ ଧୀବର ଗୁଜୁରାଣ ମେଣ୍ଟାଇଥାନ୍ତି। ଜଳଭଣ୍ଡାରରେ ଦଳ ଭର୍ତ୍ତି ହୋଇଗଲେ ଏହାର ଜଳ ପାନୀୟ ଉପଯୋଗୀ ହେବନାହିଁ। ମାଛ ଭଳି ଜଳଜୀବଙ୍କ ଜୀବନ ଧାରଣରେ ସମସ୍ୟା ଉପୁଜିବ ବୋଲି କେନ୍ଦ୍ରୀୟ ବିଶ୍ବବିଦ୍ୟାଳୟର ଜୈବ ବିବିଧତା ବିଭାଗ ଆସିଷ୍ଟାଣ୍ଟ ପ୍ରଫେସର ଦେବବ୍ରତ ପଣ୍ଡା ପ୍ରକାଶ କରିଛନ୍ତି। ଦଳ ମାଡିଗଲେ ଜଳଭଣ୍ଡାରର ଜଳରୁ ଅମ୍ଳଜାନ ପରିମାଣ କମିଜିବ ଏବଂ ଜଳର ଶୁଦ୍ଧତା ପ୍ରଭାବିତ ହେବ ବୋଲି ପଣ୍ଡା ସୂଚନା ଦେଇଛନ୍ତି। ରାଜ୍ୟ ସରକାର ଏବଂ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ସାଧାରଣରେ ଦାବି ହେଉଛି।
