ନୂଆଦିଲ୍ଲୀ,୩୦।୭:ସୋସିଆଲ ମିଡିଆ ଜଗତରେ ଗୋଟିଏ ‘ଲାଇକ’ କାହାର ଜୀବନ ବଦଳାଇପାରେ। ଏହାର ଏକ ପ୍ରମୁଖ ଉଦାହରଣ ହେଉଛନ୍ତି ଲିଜ। ଜଣେ ଦକ୍ଷିଣ ଆଫ୍ରିକାରେ ଜନ୍ମିତ ଜର୍ମାନ ମଡେଲ, ଗାୟିକା ଏବଂ କ୍ରୀଡା ଉପସ୍ଥାପିକା ଲିଜ କୁହନ୍ତି ଯେ, ବିରାଟ କୋହଲି ତାଙ୍କର ଏକ ଇନଷ୍ଟାଗ୍ରାମ ପୋଷ୍ଟକୁ ଲାଇକ କରିବା ପରେ ତାଙ୍କ ଜୀବନ ସମ୍ପୂର୍ଣ୍ଣ ଭାବରେ ପରିବର୍ତ୍ତନ ହୋଇଥିଲା। ଆଜି, ଇନଷ୍ଟାଗ୍ରାମରେ ତାଙ୍କର ୫ ଲକ୍ଷରୁ ଅଧିକ ଫଲୋଅର୍ସ ଅଛନ୍ତି ଏବଂ ସେ କ୍ରିକେଟ ଜଗତରେ ଜଣେ ଜଣାଶୁଣା ଚେହେରା ପାଲଟିଛନ୍ତି।
ଲିଜ ବର୍ଣ୍ଣନା କରିଛନ୍ତି, ବିରାଟ କୋହଲି ତାଙ୍କ ଇନଷ୍ଟାଗ୍ରାମ ଫଟୋକୁ ଲାଇକ କରିବାର କିଛି ଘଣ୍ଟା ମଧ୍ୟରେ ତାଙ୍କ ସୋସିଆଲ ମିଡିଆ ଆକାଉଣ୍ଟ ନୂତନ ଫଲୋଅର୍ସଙ୍କ ସୁଅ ଛୁଟୁଛି। ଜର୍ମାନୀ ଏବଂ ଦକ୍ଷିଣ ଆଫ୍ରିକାର ଗଣମାଧ୍ୟମ ତାଙ୍କ ବିଷୟରେ କାହାଣୀ ପ୍ରକାଶ କରିଥିଲା ଏବଂ ସେ ଚର୍ଚ୍ଚାର ପରିସରକୁ ଆସିଥିଲେ।
ଲିଜଙ୍କ ଅନୁଯାୟୀ, ସେ ପୂର୍ବରୁ ମଡେଲିଂ ଏବଂ ବ୍ଲଗିଂରେ ଜଡିତ ଥିଲେ। କିନ୍ତୁ ଏତେ ପ୍ରସିଦ୍ଧି ଅର୍ଜନ କରି ନ ଥିଲେ। ବିରାଟ କୋହଲିଙ୍କ ସେହି ‘ଲାଇକ’ ତାଙ୍କୁ ଅନ୍ତର୍ଜାତୀୟ ସ୍ତରରେ ସ୍ବୀକୃତି ପ୍ରଦାନ କରିଥିଲା, ଯାହା ସେ କେବେ କଳ୍ପନା ମଧ୍ୟ କରି ନ ଥିଲେ।
ଲୋକପ୍ରିୟତା ହାସଲ କରିବା ପରେ, ଅନେକ ସାମ୍ବାଦିକ ତାଙ୍କ ସହିତ ଯୋଗାଯୋଗ କରିଥିଲେ। ଜଣେ ସାମ୍ବାଦିକ ବିରାଟ କୋହଲିଙ୍କ ପ୍ରତିଛବିକୁ ଖରାପ କରିବା ପାଇଁ ତାଙ୍କୁ ଟଙ୍କା ମଧ୍ୟ ଦେଇଥିଲେ। ସେ ତୁରନ୍ତ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ।
ଲିଜ କହିଛନ୍ତି ଯେ, ମିଛ କହିବା କିମ୍ବା କାହାର ପ୍ରତିଷ୍ଠାକୁ କ୍ଷତି ପହଞ୍ଚାଇବା ପାଇଁ ମିଛ ପ୍ରଚାର କରିବା ତାଙ୍କ ନୀତିଶାସ୍ତ୍ର ବିରୋଧରେ। ସେ କେବଳ ଲୋକପ୍ରିୟତା କିମ୍ବା ଟଙ୍କା ପାଇଁ ତାଙ୍କ ନୀତି ସହିତ ସାଲିସ କରିବେ ନାହିଁ।
ଲିଜ ଇଂଲଣ୍ଡରେ ଅନୁଷ୍ଠିତ ICC ମହିଳା T20 ବିଶ୍ୱକପ ସମୟରେ ଜଣେ ଉପସ୍ଥାପିକା ଭାବରେ କାର୍ଯ୍ୟ କରିଥିଲେ। ଏହି ସମୟ ମଧ୍ୟରେ ସେ ଅନେକ ଅନ୍ତର୍ଜାତୀୟ ଖେଳାଳିଙ୍କ ସାକ୍ଷାତକାର ନେଇଥିଲେ। ବ୍ୟାଟ୍ସମ୍ୟାନ ସ୍ମୃତି ମନ୍ଧାନା ଏବଂ ଅଧିନାୟିକା ହରମନପ୍ରୀତ କୌରଙ୍କ ପରି ଭାରତୀୟ ଦଳର ତାରକାଙ୍କୁ ଭେଟିଥିଲେ।
IPL ବିଷୟରେ କହିବାକୁ ଗଲେ, ଲିଜଙ୍କ ପ୍ରିୟ ଦଳ ହେଉଛି ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB)। ସେ RCB କୁ ସମର୍ଥନ କରନ୍ତି ଏବଂ ସମଗ୍ର ଟୁର୍ନାମେଣ୍ଟରେ ଦଳର ପ୍ରଦର୍ଶନ ଉପରେ କଡ଼ା ନଜର ରଖନ୍ତି।
Dharitri – Odisha’s No.1 Odia Daily
