ମେଲବୋର୍ନ,୧୧।୧୧(ପି.ଟି.): ସିରିଜର ଅନ୍ତିମ ୩ଟି ଟେଷ୍ଟରୁ ଭାରତୀୟ ଅଧିନାୟକ ବିରାଟ କୋହଲି ଖେଳିବେ ନାହିଁ। ପିତୃତ୍ୱ ଛୁଟିରେ ଯାଉଥିବାରୁ ସେ ଟେଷ୍ଟ ସିରିଜର ଅଧିକାଂଶ ମ୍ୟାଚ୍ ଖେଳିବେ ନାହଁ। କିନ୍ତୁ ଏଥିରେ ଆଦୌ ଆଶ୍ଚର୍ଯ୍ୟ ନୁହେଁ ବୋଲି କ୍ରିକେଟ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ ନିକ୍ ହୋକ୍ଲି କହିଛନ୍ତି। ଯେତେବେଳେ କୋହଲି ପିତା ହେବେ ବୋଲି ଘୋଷଣା କରିଥିଲେ ସେତେବେଳେ ସେ ସବୁ ଟେଷ୍ଟ ନ ଖେଳିବା ନିଶ୍ଚିତ ହୋଇଥିଲା। ପିତୃତ୍ୱ ଲାଭ ପାଇଁ ଛୁଟି ନେଇଥିବାରୁ କୋହଲିଙ୍କ ନିଷ୍ପତ୍ତିକୁ ସମ୍ମାନ ଦିଆଯିବା ଦରକାର। କୋହଲି ୩ଟି ଦିନିକିଆ, ୩ଟି ଟି୨୦ ଓ ଏକମାତ୍ର ପିଙ୍କ୍ ବଲ ଟେଷ୍ଟ ଖେଳିବେ। ତେଣୁ ସେ ଗସ୍ତର ଅଧିକାଂଶ ମ୍ୟାଚ୍ ଅର୍ଥାତ ୧୦ଟିରୁ ୭ଟି ମ୍ୟାଚ୍ ଖେଳିବେ ଓ ଏହା ଖୁସିର କଥା ବୋଲି ହୋକ୍ଲି କହିଛନ୍ତି। ଆଡିଲେଡ୍ରେ ଡିସେମ୍ବର ୧୭ରୁ ଆରମ୍ଭ ହେବାକୁଥିବା ପ୍ରଥମ ତଥା ପିଙ୍କ ବଲ ଟେଷ୍ଟ ଖେଳିବା ପରେ ସେ ସ୍ବଦେଶ ପ୍ରତ୍ୟାବର୍ତ୍ତନ କରିବେ।
ଏବେ କୋହଲି ସାରା ବିଶ୍ୱରେ ସବୁଠାରୁ ବଡ଼ ସୁପରଷ୍ଟାର ବିବେଚିତ ହେଉଛନ୍ତି। ସେ ଏହି ଗସ୍ତରେ ୭ଟି ମ୍ୟାଚ୍ ଖେଳିବେ। ଅବଶ୍ୟ ଉଭୟ ଦଳରରେ ଏକାଧିକ ସୁପରଷ୍ଟାର ଓ ଉଚ୍ଚକୋଟୀର ଖେଳାଳି ରହିଛନ୍ତି ଓ ପ୍ରଶଂସକମାନଙ୍କୁ ଏମାନେ ବାନ୍ଧି ରଖିବାରେ ସଫଳ ହେବେ। ତେଣୁ ଏହି ସିରିଜ ନିଶ୍ଚିତ ଭାବେ ରୋମାଞ୍ଚକ ଓ ଉପଭୋଗ୍ୟ ହେବ। ପୁଣି ପିତୃତ୍ୱ ଲାଭ କରିବା ପରେ କୋହଲି ପୁଣି ଅଷ୍ଟ୍ରେଲିଆ ଆସି ବାକି ଟେଷ୍ଟ ମ୍ୟାଚ୍ ଖେଳିବାର ସମ୍ଭାବନା ପ୍ରାୟ ନାହିଁ ବୋଲି ହୋକ୍ଲି କହିଛନ୍ତି। ସେ ପ୍ରତ୍ୟାବର୍ତ୍ତନ କଲେ ତାଙ୍କୁ ପୁଣି ଥରେ ବାଧ୍ୟତାମୂଳକ ୧୪ ଦିନିଆ କ୍ୱାରାଣ୍ଟାଇନ୍ରେ ରହିବାକୁ ପଡିବ। କିନ୍ତୁ ୩ଟି ଫର୍ମାଟ୍ର ସିରିଜ୍ଗୁଡିକ ମଜାଦାର ନିଶ୍ଚିତ ହେବ ବୋଲି ସେ ଆଶା ପ୍ରକାଶ କରିଛନ୍ତି।
