ମୁମ୍ବାଇ,୧୬।୧୨: ବିରାଟ କୋହଲିଙ୍କ ନେତୃତ୍ୱରେ ଭାରତୀୟ କ୍ରିକେଟ ଦଳ ଗୁରୁବାର ସକାଳେ ଦକ୍ଷିଣ ଆଫ୍ରିକା ଅଭିମୁଖେ ଯାତ୍ରା କରିଛି। ଏହି ଗସ୍ତରେ ଟେଷ୍ଟ ସିରିଜ ପରେ ଟିମ ଇଣ୍ଡିଆ ମଧ୍ୟ ତିନିଟି ଦିନିକିଆ ଖେଳିବ। ଆଜି ସକାଳେ ବିରାଟ କୋହଲି ଟିମ ବସ୍ ମାଧ୍ୟମରେ ସାଥୀ ଖେଳାଳିଙ୍କ ସହ ବିମାନବନ୍ଦରରେ ପହଞ୍ଚିଥିଲେ। ଏହି ସମୟରେ ତାଙ୍କ ସ୍ତ୍ରୀ ଅନୁଷ୍କା ଶର୍ମା ମଧ୍ୟ ତାଙ୍କ ସହ ଥିଲେ। ବିରାଟ ବିମାନ ବନ୍ଦରରେ ଟିମ ବସ୍ରୁ ଓହ୍ଲାଉଥିବାବେଳେ ସେଠାରେ ବହୁ ସଂଖ୍ୟକ ଫଟୋଗ୍ରାଫର ଉପସ୍ଥିତ ଥିଲେ। ବିରାଟ ବସରୁ ଓହ୍ଲାଇ ଫଟୋଗ୍ରାଫରମାନଙ୍କୁ ଏକ ବିଶେଷ ଅନୁରୋଧ କରି କହିଥିଲେ ଯେ, ଦୟାକରି ମୋ ଝିଅର ଫଟୋ କ୍ଲିକ କରନ୍ତୁ ନାହିଁ। ତାଙ୍କ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ବିରାଟ କୋହଲି ଏବଂ ଅନୁଷ୍କା ଶର୍ମାଙ୍କ ଝିଅ ଭାମିକା ଜନ୍ମ ହେବାର ୧୧ ମାସରୁ ଅଧିକ ସମୟ ହୋଇଛି। ବିରୁଷ୍କା ଏପର୍ଯ୍ୟନ୍ତ ଝିଅର କୌଣସି ଫଟୋ ସାର୍ବଜନୀନ କରିନାହାଁନ୍ତି। ଭାମିକା ଚଳିତ ବର୍ଷ ଜାନୁୟାରୀ ୧୧ରେ ଜନ୍ମଗ୍ରହଣ କରିଥିଲେ।
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ତିନି ଟେଷ୍ଟ ସିରିଜର ପ୍ରଥମ ମ୍ୟାଚ ଡିସେମ୍ବର ୨୬ରୁ ଖେଳାଯିବ। ବିରାଟ କୋହଲି ଏବେ ବହୁ ଚର୍ଚ୍ଚାରେ ଅଛନ୍ତି। ଡିସେମ୍ବର ୮ରେ, ବିସିସିଆଇ ତାଙ୍କୁ ଦିନିକିଆ ଅଧିନାୟକତ୍ୱରୁ ହଟାଇ ରୋହିତ ଶର୍ମାଙ୍କୁ ନୂତନ ଅଧିନାୟକ କରିଥିଲା। ଏହା ପରେ ରୋହିତ ଏବଂ ବିରାଟଙ୍କ ମଧ୍ୟରେ ମତଭେଦ ଥିବା ଖବର ଆସିଥିଲା।
