ନ୍ୟୁୟର୍କ,୧ା୬: ଟି୨୦ ବିଶ୍ୱକପ୍ ଖେଳିବା ଲାଗି ଭାରତର ଷ୍ଟାର ବ୍ୟାଟର ବିରାଟ କୋହଲି ନ୍ୟୁୟର୍କରେ ପହଞ୍ଚିଛନ୍ତି। ଅନ୍ୟ ସାଥୀ ଖେଳାଳିମାନେ ଏଠାରେ ପହଞ୍ଚିବାର ୫ ଦିନ ପରେ ସେ ଆସିଛନ୍ତି।
କୋହଲି ଶନିବାର ବାଂଲାଦେଶ ବିପକ୍ଷରେ ଭାରତର ଓ୍ବାର୍ମଅପ୍ ମ୍ୟାଚରେ ଖେଳିବେ କି ନା ତାହା ସ୍ପଷ୍ଟ ହୋଇନାହିଁ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଜଣେ ବରିଷ୍ଠ କର୍ମକର୍ତ୍ତାଙ୍କ ସୂଚନା ଅନୁସାରେ କୋହଲି ଟିମ୍ ହୋଟେଲରେ ପ୍ରବେଶ କରିଛନ୍ତି। ଲମ୍ବା ବିମାନଯାତ୍ରା ଯୋଗୁ ସେ ବିଶ୍ରାମ ନେବେ। ‘ବିଗ୍ ଆପଲ’ରେ ପହଞ୍ଚିବା ଲାଗି କୋଲହିଙ୍କୁ ୧୬ ଘଣ୍ଟା ଧରି ଯାତ୍ରା କରିବାକୁ ପଡ଼ିଥିଲା।
ନାସାଉ କାଉଣ୍ଟି କ୍ରିକେଟ ଗ୍ରାଉଣ୍ଡରେ ବାଂଲାଦେଶ ବିପକ୍ଷ ମ୍ୟାଚରେ ସେ ଖେଳିବେ କି ନା ତାହା ତାଙ୍କ ଉପରେ ନିର୍ଭର କରେ। କୋହଲି ୧୫ଟି ଆଇପିଏଲ ଗେମ୍ରେ ୭୪୧ ରନ୍ ସଂଗ୍ରହ କରିଛନ୍ତି। ତାଙ୍କୁ ଅଧିକ ମ୍ୟାଚ ପ୍ରାକ୍ଟିସର ଆବଶ୍ୟକତା ପଡ଼ିବ ନାହିଁ। କିନ୍ତୁ ଜୁନ୍ ୫ ଆୟର୍ଲାଣ୍ଡ ବିପକ୍ଷ ପ୍ରଥମ ଗେମ୍ ପୂର୍ବରୁ ତାଙ୍କୁ ୩ଟି କ୍ୱାଲିଟି ନେଟ୍ ସେସନରେ ଅଂଶଗ୍ରହଣ କରିବାକୁ ପଡ଼ିବ।
ଏହି ଅବସରରେ ଏକ ଅତିରିକ୍ତ ଟ୍ରେନିଂ ସେସନ ହୋଇଥିଲା। ସପୋର୍ଟ ଷ୍ଟାଫ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ରିଙ୍କୁ ସିଂ, ଶିବମ ଦୁବେ ଓ ମହମ୍ମଦ ସିରାଜ ଏଥିରେ ଜୋରଦାର ଅଭ୍ୟାସ କରିଥିଲେ।
