ମୁମ୍ବାଇ: ‘ମେରି ଆୱାଜ ହି ପେହେଚାନ ହୈ ମେରି..’ ବାସ୍ ଏଇ ଗୋଟିଏ ଧାଡି ହିଁ ତାଙ୍କର ପରିଚୟ । ଭାରତ ରତ୍ନ, ସୁର ସାମ୍ରାଜ୍ଞୀ ଲତା ମଙ୍ଗେସକରଙ୍କ ପ୍ରଥମ ଶ୍ରାଦ୍ଧ ବାର୍ଷିକୀରେ ପୁଣି ମନେ ପଡିଛନ୍ତି କୋକିଳ କଣ୍ଠି ଗାୟିକା ଲତା ମଙ୍ଗେସକର । ୬ ଫେବୃୟାରୀ ୨୦୨୨ରେ ସବୁଦିନ ପାଇଁ ଆଖିବୁଜି ଦେଇଥିଲେ ଲତା ଦିଦି । ଆଉ ତାଙ୍କର ଅନୁପସ୍ଥିତି ବଲିଉଡ ଦୁନିଆରେ ସୃଷ୍ଟି କରିଥିଲା ଏକ ଅପୂରଣୀୟ କ୍ଷତି । ଯାହାକୁ ହୁଏତ କେବେ ଭରଣା କରାଯାଇ ନ ପାରେ ।ଲତା ଦିଦିଙ୍କ ଜୀବନି ଏକ ଖୋଲା ବହି ବୋଲି କୁହାଯାଏ । ହେଲେ ଏମିତି ଆହୁରି କିଛି କଥା ରହିଛି ଯାହା ଅନେକଙ୍କୁ ଆଜି ବି ଅଜଣା ।
ଲତା ମଙ୍ଗେସକର ପ୍ରଥମେ ଏକ ମରାଠି ଗୀତ ଗାଇଥିବା ବେଳେ ଏହା କିନ୍ତୁ କେବେ ରିଲିଜ୍ ହୋଇ ନ ଥିଲା । ପରେ ତାଙ୍କୁ ଆକ୍ଟିଂ ଡେବ୍ୟୁ ମିଳିଥିଲା । ସରସ୍ୱତୀ ଲତା ଦିଦିଙ୍କ କଣ୍ଠରେ ବସିଥିଲେ ବି ସେ ଖେଳ ପ୍ରିୟ ଥିଲେ । କ୍ରିକେଟ ସହ ଟେନିସ ଓ ଫୁଟବଲ ଦେଖିବାକୁ ସେ ବେଶ ପସନ୍ଦ କରୁଥିଲେ । ଅନେକଙ୍କୁ ଏହା ଅଜଣା ଥିଲା ଯେ ଲତା ମଙ୍ଗେସକର ନନଭେଜ ଖାଇବାକୁ ପସନ୍ଦ କରୁଥିଲେ । ତେବେ ପରିବାରର ଆର୍ଥିକ ଅବସ୍ଥା ଭଲ ନ ଥିବାରୁ ସେ ତାଙ୍କ ମନ ପସନ୍ଦ ଖାଦ୍ୟ ବି ଛାଡି ଦେଇଥିଲେ । ହେଲେ ଯେତେବେଳେ ସେ ମୁମ୍ବାଇରେ ରହି ସଙ୍ଗିତ ଶିକ୍ଷା କରୁଥିଲେ ସେତେବେଳେ ତାଙ୍କ ଗୁରୁ ନିଜ ହାତରେ ନନଭେଜ ପ୍ରସ୍ତୁତ କରି ଖୁଆଉଥିଲେ ।
ଲତା ଦିଦି ମାତ୍ର ଗୋଟିଏ ଦିନ ପାଇଁ ସ୍କୁଲ ଯାଇଥିଲେ । କାରଣ ତାଙ୍କ ପରିବାରର ଆର୍ଥିକ ସମସ୍ୟା କାରଣରୁ ସେ ପାଠ ନ ପଢି ବରଂ ଭଉଣୀ ଆଶା ଭୋସଲେ ପାଠ ପଢନ୍ତୁ ବୋଲି ଚାହିଁଥିଲେ । ହେଲେ ମ୍ୟୁଜିକ ପାଇଁ ତାଙ୍କୁ ୬ଟି ଭିନ୍ନ ଭନ୍ନ ବିଶ୍ୱବିଦ୍ୟାଳୟରୁ ମିଳିଛି ଡକ୍ଟରେଟ ଡିଗ୍ରୀ ।
କୋଳିକ କଣ୍ଠି ଗାୟିକା ଲତା ମଙ୍ଗେସକର ଆଜି ଆମ ଗହଣରେ ନାହାନ୍ତି ସତ ହେଲେ ଆଜିବି ତାଙ୍କ ସଙ୍ଗିତ ପ୍ରତିଟି ଭାରତୀୟଙ୍କ ମନ ପ୍ରାଣରେ ଭରି ହୋଇ ରହିଛି ।
