ପାର୍ଲ,୧୮।୧: ଦକ୍ଷିଣ ଆଫ୍ରିକା ବିପକ୍ଷରେ ବୁଧବାର ଖେଳାଯିବାକୁ ଥିବା ପ୍ରଥମ ଦିନିକିଆରେ ଶିଖର ଧାଓ୍ବନଙ୍କ ସହ ଓପନିଂ କରିବେ ଭାରତୀୟ ଅଧିନାୟକ କେ.ଏଲ୍. ରାହୁଲ। ଏହାଛଡ଼ା ଅଲରାଉଣ୍ଡର ଭେଙ୍କଟେଶ ଆୟର ଅତିରିକ୍ତ ପେସ ବୋଲର ଭାବେ ଦଳରେ ସାମିଲ ହୋଇପାରନ୍ତି। ଏହାଦ୍ୱାରା ହାର୍ଦ୍ଦିକ ପାଣ୍ଡ୍ୟାଙ୍କ ପାଇଁ ଖାଲି ପଡ଼ିଥିବା ସ୍ଥାନ ଲାଗି ବିକଳ୍ପ ମିଳିଯିବ ବୋଲି ମଙ୍ଗଳବାର ଖବରଦାତା ସମ୍ମିଳନୀରେ ରାହୁଲ ସଙ୍କେତ ଦେଇଛନ୍ତି।
ରାହୁଲ କହିଛନ୍ତି, ଗତ ୧୨-୧୫ ମାସ ମଧ୍ୟରେ ସେ ବ୍ୟାଟିଂ କ୍ରମର ବିଭିନ୍ନ ସ୍ଥାନରେ ବ୍ୟାଟିଂ କରିଥିଲି। କାରଣ ସେହି ସମୟରେ ଦଳ ମୋଠାରୁ ତାହା ଚାହୁଁଥିଲା। ବର୍ତ୍ତମାନ ରୋହିତ ଶର୍ମାଙ୍କ ଅନୁପସ୍ଥିତି ଯୋଗୁ ସେ ଓପନିଂ କରିବେ। ଋତୁରାଜ ଗାୟକଓ୍ବାଡଙ୍କୁ ନିଜ ପାଳିକୁ ଅପେକ୍ଷା କରିବାକୁ ହେବ। ବୋଲାଣ୍ଡ ପାର୍କର ପିଚ୍କୁ ଦେଖି ପରିଚାଳନା ବିଭାଗ ସ୍ପିନର ରବିଚନ୍ଦ୍ରନ ଅଶ୍ୱିନ ଏବଂ ୟୁଜବେନ୍ଦ୍ର ଚହଲଙ୍କୁ ଏକାଦଶରେ ନେଇପାରେ ବୋଲି ସେ କହିଛନ୍ତି।
