ନୂଆଦିଲ୍ଲୀ,୩୦।୭: କଥାରେ ଅଛି ନିଆଁ ନ ଥିଲେ ଧୂଆଁ ଉଠେନି। କିଛି ସେଭଳି ଦେଖିବାକୁ ମିଳେ ଭାରତୀୟ କ୍ରିକେଟ ଟିମ୍ର ବ୍ୟାଟ୍ସମ୍ୟାନ୍ କେ.ଏଲ୍ ରାହୁଲଙ୍କ କ୍ଷେତ୍ରରେ। ଅଭିନେତା ସୁନିଲ ସେଟ୍ଟୀଙ୍କ ଝିଅ ଆଥିୟା ସେଟ୍ଟୀଙ୍କୁ ସେ ପ୍ରେମ କରୁଥିବା ନେଇ ଚର୍ଚ୍ଚା ହୋଇଆସୁଛି। ହେଲେ ଉଭୟ ଏଥିରେ ହଁ ଭରୁ ନ ଥିଲେ। ଏବେ କଥା ଭିନ୍ନ ହୋଇଛି। ଅଧିନାୟକ ବିରାଟ କୋହଲିଙ୍କ ସ୍ତ୍ରୀ ତଥା ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମା ଏବେ ଏକ ଫଟୋ ଶେୟାର କରିଛନ୍ତି। ଏହାକୁ ଦେଖିବା ପରେ ଉଭୟଙ୍କ ଲଭ୍ଷ୍ଟୋରୀ ସତ ମନେ ହେଉଛି। ନିଜର ଆଧିକାରିକ ଟୁଇଟର ହ୍ୟାଣ୍ଡେଲରେ ଏକ ଫଟୋ ଶେୟାର କରିଛନ୍ତି ଅନୁଷ୍କା। ଏହାର କ୍ୟାପଶନରେ ସେ ଲେଖିଛନ୍ତି, ‘ଡର ‘ହମ୍’ ସାଥ୍ ସାଥ୍ ହୈ’।
ଏବେ ଭାରତୀୟ ଖେଳାଳି ଡରହମରେ ସେମାନଙ୍କ ସ୍ତ୍ରୀଙ୍କ ସହ ଅଛନ୍ତି। ଏହାକୁ ଅନୁଷ୍କା ଡର ‘ହମ୍’ ବୋଲି ଲେଖିଛନ୍ତି। ଫଟୋରେ ବିରାଟଙ୍କ ସହ ଈଶାନ୍ତ ଶର୍ମା ଏବଂ ଉମେଶ ଯାଦବ ନିଜ ନିଜ ସ୍ତ୍ରୀଙ୍କ ସହ ଥିବା ଦେଖାଯାଉଛି। ହେଲେ ସମସ୍ତଙ୍କ ଦୃଷ୍ଟି ଆକର୍ଷଣ କରୁଛନ୍ତି ରାହୁଲ ଏବଂ ଆଥିୟା। ଫଟୋରେ ଉଭୟ ବେଶ ନିକଟତର ନଜର ଆସୁଛନ୍ତି। ଏଣୁ ଉଭୟ ପ୍ରେମ ଉପରେ ମୋହର ମାରିଥିବା ନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି।
କେ.ଏଲ୍ ମଧ୍ୟ ଇନ୍ଷ୍ଟାଗ୍ରାମରେ ଦୁଇଟି ଫଟୋ ଶେୟାର କରିଛନ୍ତି। ଗୋଟିଏରେ ପୁଅମାନଙ୍କୁ ଦେଖିବାକୁ ମିଳୁଥିବା ବେଳେ ଅନ୍ୟଟିରେ ସେମାନଙ୍କ ପାର୍ଟନରଙ୍କୁ ଦେଖିବାକୁ ମିଳୁଛି। ଏଥିରେ ମଜାଳିଆ ପୋଷ୍ଟ କରି ଦିନେଶ କାର୍ତ୍ତିକ ଲେଖିଛନ୍ତି, ସବୁ ସଫଳ ପୁରୁଷଙ୍କ ପଛରେ ଜଣେ ମହିଳାଙ୍କ ହାତ ରହିଛି। ଦ୍ୱିତୀୟ ଥର ଏପରି କରିବା କଷ୍ଟକର ହୋଇଥାଏ।
