ବମ୍ବେ: ଚାରି ବର୍ଷର ବିବାହ ପରେ ସ୍ବାମୀଙ୍କଠାରୁ ଅଲଗା ହୋଇଛନ୍ତି ଅଭିନେତ୍ରୀ କୀର୍ତ୍ତି କୁଲ୍ହାରୀ। ସୋସିଆଲ ମିଡିଆରେ ଲମ୍ବା ଚଉଡ଼ା ପୋଷ୍ଟ କରି ସେ ଏ ବିଷୟରେ ଜଣାଇଛନ୍ତି।
୨୦୧୬ରେ ସାହିଲ ସେହଗଲଙ୍କ ହାତ ଧରିଥିଲେ କୀର୍ତ୍ତି। ଏବେ ବିବାହ ବିଚ୍ଛେଦକୁ ନେଇ ସେ କହିଛନ୍ତି, ସାଙ୍ଗରେ ରହିବା ନିଷ୍ପତ୍ତିଠାରୁ ଅଲଗା ହେବା ନିଷ୍ପତ୍ତି ବହୁତ କଠିନ। ମୁଁ ଏବଂ ସାହିଲ ଅଲଗା ହେବାର ନିଷ୍ପତ୍ତି ନେଇଛୁ। କେବଳ କାଗଜରେ ନୁହେଁ ବାସ୍ତବ ଜୀବନରେ। ଏକାଠି ରହିବା ନିଷ୍ପତ୍ତିକୁ ସମସ୍ତେ ସେଲିବ୍ରେଟ୍ କରନ୍ତି। ହେଲେ ସେମାନଙ୍କୁ ଅଲଗା ହେବା ଖବର ଦୁଃଖ ଦେଇଥାଏ। ଏହା ସହଜ ନୁହେଁ। ହେଲେ ଯାହା ହେବା କଥା ହେବ। ଠିକ୍ ଅଛି। ଆଗକୁ ଏ ବିଷୟରେ କଥା ହେବାକୁ ଚାହିଁବି ନାହିଁ ବୋଲି ସେ କହିଛନ୍ତି।
ତେବେ କୀର୍ତ୍ତି ଫିଲ୍ମ ‘ପିଙ୍କ’ ରିଲିଜ ହେବାର ୩ରୁ ୪ ମାସ ପୂର୍ବରୁ ବିବାହ କରିଥିଲେ। ବ୍ୟକ୍ତିଗତ ଜୀବନକୁ ଗୋପନ ରଖିବାକୁ ଚାହୁଁଥିବାରୁ ଏହି ବିବାହ ବିଷୟରେ କେହି ଜାଣିପାରି ନ ଥିଲେ। ପରେ ଫିଲ୍ମ ରିଲିଜ ପରେ ଏକଥା ଜଣାପଡ଼ିଥିଲା।
ଅଭିନେତ୍ରୀଙ୍କ କାମ ବିଷୟରେ କଥା ହେଲେ, ସେ ପିଙ୍କ, ଇନ୍ଦୁ ସରକାର, ବ୍ଲାକମେଲ୍, ମିଶନ ମଙ୍ଗଲ, ଉରି: ଦ ସର୍ଜିକାଲ ଷ୍ଟାଇକ୍ ଏବଂ ଦ ଗର୍ଲ ଅନ୍ ଦ ଟ୍ରେନ୍ରେ ଅଭିନୟ କରିଛନ୍ତି। ଏହାଛଡ଼ା ସେ ଓ୍ବେବ୍ ସିରିଜ ‘ଫୋର ମୋର ଶର୍ଟସ’ରେ କାମ କରିଛନ୍ତି।
