ବେଗୁନିଆ, ୮।୪(ଡି.ଏନ୍.ଏ.): ପୁରୀ-ଶରଣକୂଳ ନୂଆ ଜଗନ୍ନାଥ ସଡ଼କ ପାଶର୍ବରେ ଛଣଗିରି ଓ ହଜ ମଧ୍ୟରେ କଳକଳ ନାଦ କରି ବହିଯାଉଛି ମଲାଗୁଣି ବା ମନ୍ଦାକିନୀ ନଦୀ। ଏହି ନଦୀକୂଳରେ ଅବସ୍ଥିତ ହଜ ଗ୍ରାମର ଉତ୍ତର ଦିଗକୁ ମାତ୍ର ୫୦୦ ମିଟର ଗଲେ ପଡ଼େ କଲରାଝର ଗ୍ରାମ। ଖୋର୍ଦ୍ଧା ଜିଲା ବେଗୁନିଆ ବ୍ଲକ ହଜ ପଞ୍ଚାୟତ ଅନ୍ତର୍ଗତ ଏହି ଗ୍ରାମର ପୂର୍ବ ଦିଗରେ ଗ୍ରାମର ଆରାଧ୍ୟ ଦେବତା ପ୍ରଭୁ ବାଲୁଙ୍କେଶ୍ବର ଦେବଙ୍କ ମନ୍ଦିର ସହ ମା’ ସିଦ୍ଧ ଖଣ୍ଡୁଆଳ ମନ୍ଦିର, ଗୋପୀନାଥ ଦେବ ମନ୍ଦିର ଏବଂ ପଶ୍ଚିମ ଦିଗରେ ମା’ ମଙ୍ଗଳା ମନ୍ଦିର ଶୋଭା ପାଉଥିବାବେଳେ କଲରାଝର-ହଜ ରାସ୍ତା ପାଶର୍ବରେ କୀର୍ତ୍ତନିଆ ହିଲ ବ୍ରାଞ୍ଚ (ସ୍ବାମୀ ଶିବାନନ୍ଦ) ନାମକ ଦିବ୍ୟ ଜୀବନ ସଂଘ ରହିଛି। ଗାଁ ପ୍ରବେଶପଥ ନିକଟରେ ନେତାଜୀ କ୍ଲବ ଅଛି। କଲରାଝର- ନିଧିପୁର ସତମାର୍ଗ ରାସ୍ତାର ପଶ୍ଚିମ ଦିଗରେ ଗ୍ରାମ୍ୟ ଜଙ୍ଗଲ ରହିଛି। ଏହି ଜଙ୍ଗଲରେ ବିଭିନ୍ନ ପ୍ରଜାତିର ବୃକ୍ଷଲତା ସାଙ୍ଗକୁ ମୟୂର, ଶୁଆ, ହାତୀ, ଠେକୁଆ, ଶାରୀ, ବାର୍ହା, ଝିଙ୍କ, ଗାଡଭାଲୁ, ବଣକୁକୁଡ଼ା, ଗୋଧି, ଅଜଗର ସାପ ଆଦି ରହୁଛନ୍ତି। ଆଶ୍ରମ ନିକଟ ଅଞ୍ଚଳ ପର୍ଯ୍ୟଟକଙ୍କୁ ବଣଭୋଜି ପାଇଁ ଆକୃଷ୍ଟ କରିଥାଏ। ବିଭିନ୍ନ କାରଣରୁ ଅଧିକାଂଶ ସ୍ଥାନରେ ଜଙ୍ଗଲ ଉଜୁଡୁଥିବାବେଳେ ସ୍ଥାନୀୟ ଗ୍ରାମବାସୀ ଓ ଯୁବକଙ୍କ ସହଯୋଗରେ ଏହି ଜଙ୍ଗଲକୁ ସୁରକ୍ଷିତ ରଖିଛନ୍ତି ଗ୍ରାମରେ ରହୁଥିବା ଅବସରପ୍ରାପ୍ତ ବନପାଳ ମାଧବ ଚନ୍ଦ୍ର ପାଇକରାୟ। ସେ ନଣ୍ଡା ପାହାଡ଼ ନିକଟରେ ଜଙ୍ଗଲ ସୃଷ୍ଟି ସହ ଏହାର ରକ୍ଷଣାବେକ୍ଷଣ କରି ଅନ୍ୟ ପାଇଁ ପ୍ରେରଣା ପାଲଟିଛନ୍ତି। ଜଙ୍ଗଲରୁ ସଂଗୃହୀତ ଅଦରକାରୀ କାଠକୁ ବିକ୍ରି କରାଯାଇ ଲବ୍ଧ ଅର୍ଥରେ ଠାକୁରାଣୀ ମନ୍ଦିରକୁ ରାସ୍ତା ତିଆରି କରାଯାଇଛି। କିମ୍ବଦନ୍ତୀ ଅନୁଯାୟୀ, ଏହି ଜଙ୍ଗଲରେ ଜଣେ ଋଷି ସର୍ବଦା ତପସ୍ୟାରେ ମଜ୍ଜିରହି ସଂକୀର୍ତ୍ତନ କରୁଥିଲେ। ତାଙ୍କର ଦେହାନ୍ତ ପରେ ସେହି ସ୍ଥାନରେ ଏକ ବିରାଟ ଉଇହୁଙ୍କା ହୋଇଥିଲା। ଏହାର ଚାରିପଟେ ଧଳା ରଙ୍ଗର ବସ୍ତ୍ର ଘୋଡ଼ାଯାଇ ଲୋକେ କୀର୍ତ୍ତନିଆ ବାବା ନାମରେ ପୂଜା କରିଆସୁଛନ୍ତି। ଏଠାକାର ମଲାଗୁଣି ନଦୀରେ କୀର୍ତ୍ତନିଆ ବାବା ସ୍ନାନ ତର୍ପଣ କରିବା ପରେ କୀତ୍ତର୍ର୍ନିଆ ପାହାଡ଼ର ବଟବୃକ୍ଷ ମୂଳେ ଥିବା କଲରା ଗୁମ୍ଫା (ମାଳିକାରେ ବର୍ଣିତ) ରେ ତପସ୍ୟା କରୁଥିଲେ। ଏଠାରେ ପଥର ଖୋଦିତ ପୁରାତନ କୁଣ୍ଡ ଥିବାବେଳେ ଗୁମ୍ଫା ଦ୍ବାର ଦେଶରେ ମହାବୀର ମୂର୍ତ୍ତି ପୂଜା ପାଉଛନ୍ତି। ସାଧାରଣତଃ ମାଟି ଥିବା ସ୍ଥାନରେ ଦୀର୍ଘଦିନ ଧରି ବସ୍ତ୍ର ପଡ଼ିରହିଲେ ଉଇ ଲାଗି ନଷ୍ଟ ହୋଇଯାଇଥାଏ। ମାତ୍ର ଏଠାକାର ଉଇହୁଙ୍କାରେ ବର୍ଷତମାମ ଧଳାବସ୍ତ୍ର ରହିଥାଏ ବୋଲି କୁହାଯାଏ। ସରକାରଙ୍କ ଆମ ଗାଁ ଆମ ବିକାଶ ଯୋଜନାରେ ୩ ଲକ୍ଷ ଟଙ୍କା ବ୍ୟୟରେ ୨୦୧୮-୧୯ ଆର୍ଥିକ ବର୍ଷରେ ଏଠାରେ କମ୍ୟୁନିଟି ଘର ନିର୍ମାଣ କରାଯାଇଛି। ଏହା ରାଜ୍ୟ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଥିବାରୁ ବିକାଶ ହୋଇପାରିନାହିଁ। ରାଜ୍ୟ ସରକାର ଏହାକୁ ପର୍ଯ୍ୟଟନ ସ୍ଥଳୀର ମାନ୍ୟତା ଦେବାକୁ ସାଧାରଣରେ ଦାବି ହେଉଛି।
