ପ୍ୟୋଙ୍ଗୟାଙ୍ଗ,୧୦।୭ : ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ ଆମେରିକାକୁ ଧମକ ଦେଇଛନ୍ତି। ଯଦି ଆମେରିକା ଉତ୍ତରକୋରିଆ ବାୟୁମଣ୍ଡଳରେ ଗୁପ୍ତଚର ବିମାନ ଉଡ଼ାଇବାରେ ଭୁଲ କରେ, ତେବେ ସେଗୁଡ଼ିକୁ ଗୁଳି କରି ଖସାଇ ଦିଆଯିବ। ଉତ୍ତର କୋରିଆ ସୋମବାର ଆମେରିକା ବିରୋଧରେ ଅଭିଯୋଗ କରିଛି ଏହାର ଗୁପ୍ତଚର ବିମାନଗୁଡ଼ିକ ଉତ୍ତର କୋରିଆ ବାୟୁ ସୀମାରେ ପ୍ରବେଶ କରିଛି।
ଏହା ସହ କିମ୍ ଚେତାବନୀ ଦେଇଛନ୍ତି ପ୍ୟୋଙ୍ଗୟାଙ୍ଗ ବର୍ତ୍ତମାନ ମଧ୍ୟ ସଂଯମତା ଜାରି ରଖିଛି । ଏହିପରି ବିମାନ ଉଡ଼ାଣକୁ ଆମେରିକା ବନ୍ଦ କରିବା ଉଚିତ। ସରକାରୀ କେକେଏନଏ ନ୍ୟୁଜ ଏଜେନ୍ସି ସ୍ବାରା ଜାରି ଏକ ବିବୃତ୍ତିରେ ଉତ୍ତର କୋରିଆର ଜାତୀୟ ପ୍ରତିରକ୍ଷା ମନ୍ତ୍ରଣାଳୟର ମୁଖପାତ୍ର କହିଛନ୍ତି ଆମେରିକା ଦ୍ୱାରା ଉତ୍ତେଜନାମୂଳକ ସାମରିକ କାର୍ଯ୍ୟ କୋରିଆ ଉପଦ୍ୱୀପକୁ ଆଣବିକ ବିବାଦର ନିକଟତର କରୁଛି।
ଏହି ରିପୋର୍ଟରେ ଆମେରିକାର ଗୁପ୍ତଚର ବିମାନ ଏବଂ ଡ୍ରୋନର ବ୍ୟବହାର ମଧ୍ୟ ଉଲ୍ଲେଖ କରାଯାଇଛି ଏବଂ ୱାଶିଂଟନ ଉପଦ୍ୱୀପ ନିକଟରେ ଆଣବିକ ବୁଡ଼ାଜାହାଜ ପଠାଇ ଉତ୍ତେଜନା ବୃଦ୍ଧି କରୁଛି ବୋଲି କୁହାଯାଇଛି। ମୁଖପାତ୍ର କହିଛନ୍ତି ଆମେରିକାର ବାୟୁସେନା ରଣନୈତିକ ଗୁପ୍ତଚର ବିମାନର ଅବତରଣ ଭଳି ଏକ ଭୟଙ୍କର ଦୁର୍ଘଟଣା କୋରିଆ ସମୁଦ୍ରରେ ଘଟିବ ନାହିଁ ବୋଲି କୌଣସି ଗ୍ୟାରେଣ୍ଟି ନାହିଁ। ଏହି ବିବୃତ୍ତିରେ ଉତ୍ତର କୋରିଆର ଦକ୍ଷିଣ କୋରିଆର ସୀମା ଏବଂ ଉପକୂଳରେ ଆମେରିକୀୟ ବିମାନକୁ ଗୁଳି ଚଳାଇବା କିମ୍ବା ଅଟକାଇବା ଭଳି ଘଟଣା ମଧ୍ୟ ଉଲ୍ଲେଖ କରାଯାଇଛି। ଉତ୍ତର କୋରିଆ ଆମେରିକା ଉପରେ ଏପରି ଅଭିଯୋଗ ଆଣିବା ପ୍ରଥମ ଘଟଣା ନୁହେଁ। ଉତ୍ତର କୋରିଆ ପ୍ରାୟତଃ ଉପଦ୍ୱୀପ ନିକଟରେ ଆମେରିକାର ନୀରିକ୍ଷଣ ବିମାନ ଉପରେ ଅଭିଯୋଗ କରିଥାଏ।
ଉତ୍ତର କୋରିଆର ଏହି ଚେତାବନୀ ପରେ ଦକ୍ଷିଣ କୋରିଆରେ ଅବସ୍ଥାପିତ ଆମେରିକୀୟ ସେନା ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ। ଅନ୍ୟପକ୍ଷରେ ଦକ୍ଷିଣ କୋରିଆ ସେନା କହିଛି ଉତ୍ତର କୋରିଆର ବାୟୁସେନା ଉଲ୍ଲଂଘନ ଦାବି ସତ୍ୟ ନୁହେଁ। ଆମେରିକାର ଏରିଏଲ ସିସିଟିଭି ଉପଦ୍ୱୀପରେ ନିୟମିତ ଅନୁସନ୍ଧାନ ଉଡ଼ାଣ କରିଥାଏ। ଏହା ସହିତ ଦକ୍ଷିଣ କୋରିଆ କହିଛି ସେମାନେ ଏବଂ ସେମାନଙ୍କର ସହଯୋଗୀ ଆମେରିକା ମିଳିତ ଭାବେ ଉତ୍ତର କୋରିଆ ଉପରେ ନଜର ରଖିଛନ୍ତି।
