ପୋୟଙ୍ଗୟାଙ୍ଗ୍,୧୬।୯: ଉତ୍ତର କୋରିଆର ଏକ ଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ ଆମେରିକାର ବାରମ୍ବାର ବାରଣ ସତ୍ତ୍ୱେ ଆଣବିକ ଅସ୍ତ୍ରଶସ୍ତ୍ରର ପରୀକ୍ଷଣ ଜାରି ରଖିଛନ୍ତି। ଏବେ କିମ୍ ଏକ ନୂଆ କ୍ଷେପଣାସ୍ତ୍ର ପରୀକ୍ଷା କରି ଅନ୍ତର୍ଜାତୀୟସ୍ତରରେ ଚହଳ ସୃଷ୍ଟି କରିଛନ୍ତି। ସେ ଏକ ଟ୍ରେନ୍ରୁ କ୍ଷେପଣାସ୍ତ୍ର ପରୀକ୍ଷଣ କରିଛନ୍ତି। ଟ୍ରେନ୍ ମିଜାଇଲ ଳଞ୍ଚର ଦ୍ୱାରା ଏହି କ୍ଷେପଣାସ୍ତ୍ର ଉତକ୍ଷେପଣ ହୋଇଛି। ଉତ୍ତର କୋରିଆ କମ ମୂଲ୍ୟରେ ଅଧିକ କ୍ଷେପଣାସ୍ତ୍ର ଉତ୍କ୍ଷେପଣ କରିବା ଲାଗି ଏଭଳି କରୁଥିବା କୁହାଯାଉଛି। କ୍ଷେପଣାସ୍ତ୍ରକୁ ଉତ୍ତର କୋରିଆ ସୈନ୍ୟବାହିନୀର ରେଳବାଇ ମୋବାଇଲ ମିଜାଇଲ ରେଜିମେଣ୍ଟ ଦ୍ୱାରା ଲଞ୍ଚ କରାଯାଇଥିଲା। ଏହି କ୍ଷେପଣାସ୍ତ୍ରର ଳକ୍ଷ୍ୟଭେଦ କ୍ଷମତା ୮୦୦ କିଲୋମିଟର ରହିଛି। ଉତ୍କ୍ଷେପଣ ପରେ ଏହା ଦେଶର ପୂର୍ବ ଉପକୂଳରେ ଥିବା ସମୁଦ୍ରରେ ପଡ଼ିିଛି।
ଦକ୍ଷିଣ କୋରିଆ ସୈନ୍ୟବାହିନୀ କହିଛି ଯେ, ଉତ୍ତର କୋରିଆ ଦୁଇଟି ସ୍ବଳ୍ପ ଦୂରଗାମୀ ବାଲିଷ୍ଟିକ କ୍ଷେପଣାସ୍ତ୍ର ପରୀକ୍ଷା କରିଛି। ସୋମବାର ଉତ୍ତର କୋରିଆ ଏକ ନୂତନ ବିକଶିତ କ୍ରୁଜ କ୍ଷେପଣାସ୍ତ୍ର ପରୀକ୍ଷା କରଥିଲା। ବିଶେଷଜ୍ଞମାନେ କହିଛନ୍ତି ଯେ ଆଣବିକ କଥାବାର୍ତ୍ତା ଉପରେ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ଉପରେ ଚାପ ପକାଇବା ପାଇଁ ଉତ୍ତର କୋରିଆ ଏଭଳି ଲଗାତାର କ୍ଷେପଣାସ୍ତ୍ର ପରୀକ୍ଷା କରୁଥିବା ଅନୁମାନ କରାଯାଉଛି।
