ନୂଆଦିଲ୍ଲୀ, ୨।୬ : ଦିଲ୍ଲୀର ଦକ୍ଷିଣ ଜିଲାର ହୌଜଖାସ ପୋଲିସ ଷ୍ଟେଶନ ପକ୍ଷରୁ ଏକ ବଡ଼ କିଡ୍ନୀ ର଼୍ୟାକେଟର ପର୍ଦ୍ଦାଫାଶ କରାଯାଇଛି। ଓଟି ଟେକ୍ନିସିଆନ, ଦୁଇ ଡାକ୍ତରଙ୍କ ସମେତ ୧୦ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରିଛି। ସେମାନେ ସୋସିଆଲ ମିଡିଆ ମାଧ୍ୟମରେ ସେମାନଙ୍କର ବ୍ୟବସାୟ ଚଳାଉଥିଲେ। କିଡନୀ ଡୋନରଙ୍କ ନାମରେ ବିଭିନ୍ନ ପେଜ୍ ସୋସିଆଲ ମିଡ଼ିଆରେ ତିଆରି କରାଯାଇଥିଲା । ଗରିବଙ୍କ ଅସହାୟତାର ସୁଯୋଗ ନେଇ ଅଭିଯୁକ୍ତମାନେ କିଛି ଟଙ୍କା ଦେଇ ସେମାନଙ୍କର କିଡ୍ନୀ ବିକ୍ରି କରୁଥିଲେ।
ଅଭିଯୁକ୍ତମାନେ ଏପର୍ଯ୍ୟନ୍ତ ପ୍ରାୟ ୨୦ ଜଣଙ୍କ କିଡ୍ନୀକୁ ବାହାର କରି ବିକ୍ରି କରିଥିବା ଜଣାପଡ଼ିଛି। ଦକ୍ଷିଣ ଜିଲ୍ଲା ପୋଲିସର ଡେପୁଟି କମିଶନର ବେନିଟା ମେରି ଜ୍ୟାକର୍ କହିଛନ୍ତି ଯେ ହୌଜଖାସ ଅଞ୍ଚଳରେ ଏକ କିଡ୍ନୀ ର଼୍ୟାକେଟ ଚାଲିଥିବାର ସୂଚନା ସ୍ଥାନୀୟ ପୋଲିସ ଷ୍ଟେଶନକୁ ମେ ୨୬ରେ ମିଳିଥିଲା।
ଏହି ଗ୍ୟାଙ୍ଗ ଅଭାବୀ ଏବଂ ଗରିବ ଲୋକଙ୍କୁ ଟାର୍ଗେଟ କରି ଟଙ୍କାର ପ୍ରଲୋଭନ ଦେଖାଇ ସେମାନଙ୍କର କିଡ୍ନୀ କାଢ଼ି ବିକ୍ରି କରୁଥିଲେ। ଏହା ପରେ, ଅନ୍ୟ ଲୋକଙ୍କୁ ଅଧିମ ଦାମରେ ଏହାକୁ ବିକ୍ରି କରୁଥିଲେ।
ସୂଚନା ପରେ ଇନ୍ସପେକ୍ଟର ଭରତଲାଲ, ଇନ୍ସପେକ୍ଟର ରୋହିତ ଏବଂ ଏସଆଇ ଦୀପକଙ୍କର ଏକ ସ୍ବତନ୍ତ୍ର ଦଳ ହୌଜଖାସ ଏସଏଚଓ ଶିବାନୀ ସିଂଙ୍କ ତତ୍ତ୍ୱାବଧାନରେ ଗଠନ କରାଯାଇଥିଲା। ପୋଲିସ ଟିମ ଜାଣିବାକୁ ପାଇଥିଲେ ଯେ ଗ୍ୟାଙ୍ଗର ସଦସ୍ୟମାନେ ଡାକ୍ତରୀ ପରୀକ୍ଷା ପାଇଁ ହୌଜଖାସର ଏକ ଲ୍ୟାବକୁ ଜଣେ ଡୋନରଙ୍କୁ ନେଇଛନ୍ତି। ପୋଲିସ ଲ୍ୟାବ ନିକଟରେ ପିଣ୍ଟୁ କୁମାର ଯାଦବଙ୍କୁ ପାଇଥିଲେ। ପେଟ ଯନ୍ତ୍ରଣା ହେବାର ବାହାନା କରି ସରବଜିତ ଏବଂ ଭିପିନ ତାଙ୍କୁ ଆଣିଥିଲେ। ପରେ ଯେତେବେଳେ ପିଣ୍ଟୁ ଜାଣିବାକୁ ପାଇଲେ ଯେ ତାଙ୍କ କିଡ୍ନୀ ଅପସାରିତ ହେବ, ସେ ସେହି ସ୍ଥାନ ଛାଡି ଭୟରେ ଚାଲିଯାଇଥିଲେ। ହୌଜଖାସ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ସରବଜିତଙ୍କୁ ଗିରଫ କରାଯାଇଥିଲା। ପଚରାଉଚରା ପରେ ରଘୁଶର୍ମା ନାମକ ଜଣେ ବ୍ୟକ୍ତିଙ୍କୁ ମଧ୍ୟ ପୋଲିସ ଭେଟିଥିଲେ। ରଘୁ କହିଛନ୍ତି ଯେ ଏହି ଗ୍ୟାଙ୍ଗ ତାଙ୍କ କିଡ୍ନୀକୁ ବାହାର କରି ବିକ୍ରି କରିଛି। ରଘୁଙ୍କ ସହାୟତାରେ ପୋଲିସ ଟିମ ପଶ୍ଚିମ ବିହାରରେ ଏକ ଫ୍ଲାଟରେ ପହଞ୍ଚିଥିଲେ। ପୋଲିସ ସେଠାରେ ଶୈଳେଶ ପଟେଲଙ୍କ ସମେତ ୪ ଜଣଙ୍କ ସନ୍ଧାନ ପାଇଥିଲେ। କିଡନୀ ଅପସାରଣ ପାଇଁ ଆବଶ୍ୟକ ଔପଚାରିକତା ଶୈଳେଶ, ଦିବାକର, ସରକାର, ଅଶ୍ୱିନୀ ପାଣ୍ଡେ ଏବଂ ରିଜୱାନ ପୂରଣ କରୁଥିଲେ। କାଗଜପତ୍ର ପ୍ରସ୍ତୁତ କରିବା ବ୍ୟତୀତ ଏଠାରେ ଡାକ୍ତରୀ ପରୀକ୍ଷା କରାଯାଉଥିଲା।
ତଦନ୍ତ ପରେ ପୋଲିସ ମୁଖ୍ୟ ଅଭିଯୁକ୍ତ ଶୈଳେଶ ପଟେଲ, ସରବଜିତ ଜୈସୱାଲ, ମହମ୍ମଦ ଲତିଫ, ବିକାଶ, ରଣଜିତ୍ ଗୁପ୍ତା, ଡାକ୍ତର ସୋନୁ ରୋହିଲାକ୍, ଡାକ୍ତର ସୌରଭ ମିତ୍ତଲ, କୁଲଦୀପ ରାୟ ବିଶ୍ୱକର୍ମା, ଓମପ୍ରକାଶ ଶର୍ମା ଏବଂ ମନୋଜ ତିୱାରୀଙ୍କୁ ଗିରଫ କରିଛି।
