ସୋନପୁର,୧ା୧୨(ନି.ପ୍ର.):ସୁବର୍ଣ୍ଣପୁର ଜିଲାର କିଡ୍ନୀ ରୋଗୀଙ୍କ ପାଇଁ ସରକାର ଆଖି ବୁଜି ଦେଇଛନ୍ତି। ଜିଲାରେ ଏ ପର୍ଯ୍ୟନ୍ତ ଡାଏଲିସିସ୍ ସେଣ୍ଟର ସ୍ଥାପନ ହୋଇପାରିନି। ଗତ ୫ମାସ ହେଲା ରୋଗୀଙ୍କୁ ମିଳୁଥିବା ସରକାରଙ୍କ ମାଗଣା ଔଷଧ ବନ୍ଦ। ରୋଗୀ ହସ୍ପିଟାଲର ନିରାମୟ କେନ୍ଦ୍ରକୁ ଆସି ଔଷଧ ନ ପାଇ ଫେରୁଛନ୍ତି। ଗରିବ ଶ୍ରେଣୀର ରୋଗୀ ଚିକିତ୍ସା ଓ ଔଷଧ ସୁବିଧା ନ ପାଇ ମୃତ୍ୟୁମୁଖରେ ପଡୁଛନ୍ତି। ସରକାର ଏଥିପ୍ରତି ଦୃଷ୍ଟି ଦେଉ ନ ଥିବା ଅଭିଯୋଗ ହେଉଛି। ସରକାରୀ ଡାକ୍ତରଖାନାରେ ନିରାମୟ ଯୋଜନାରେ ମାଗଣରେ ଔଷଧ ମିଳୁଥିବା ଓ କିଡ୍ନୀ ରୋଗୀଙ୍କୁ ମାଗଣାରେ ଡାଏଲିସିିସ୍ କରାଯାଉଥିବା କୁହାଯାଉଛି। ମାତ୍ର ବାସ୍ତବ ସ୍ଥିତି ସମ୍ପୂର୍ଣ୍ଣ ଭିନ୍ନ। କିଡ୍ନୀ ରୋଗୀଙ୍କୁ ମାସିକ ୫ ହଜାର ଟଙ୍କା ଖର୍ଚ୍ଚ କରି ଔଷଧ ଖାଇବାକୁ ପଡୁଛି। ବାହାରେ ଡାଏଲିସିସ କରିବା ପାଇଁ ବହୁଳ ଖର୍ଚ୍ଚ ହେଉଥିବାରୁ ରୋଗୀଙ୍କୁ ଜମିବାଡି ବିକ୍ରି କରିବାକୁ ପଡୁଛି। ଏହିଭଳି ଦେଖିବାକୁ ମିଳିଛି ଉଲୁଣ୍ଡା ବ୍ଲକ ମୁଣ୍ଡଘାଟ ପଞ୍ଚାୟତ ଅନ୍ତର୍ଗତ ପତ୍ରାପାଲି ଗଁାରେ। ଗଁାର ବସନ୍ତ ପାଣିଗ୍ରାହୀଙ୍କ ପୁଅ ଗୋପାଳ ଚନ୍ଦ୍ର ପାଣିଗ୍ରାହୀ(୨୮)କିଡ୍ନୀ ରୋଗରେ ଆକ୍ରାନ୍ତ ହୋଇଥିଲେ। ଏଠାରେ ଚିକିତ୍ସା ସୁବିଧା ନଥିବାରୁ ଜମି ବିକ୍ରି କରି ସେହି ଅର୍ଥରେ ବାହାରେ ପୁଅର ଚିକିତ୍ସା କରୁଥିଲେ। ହେଲେ ୨୦୨୧ ମାର୍ଚ୍ଚରେ ପୁଅର ମୃତ୍ୟୁ ହୋଇଯାଇଥିବା ବସନ୍ତ କହିଛନ୍ତି। ସେହିପରି ବୀରମହାରାଜପୁର ବ୍ଲକ ସଂଗ୍ରାମପୁର ପଞ୍ଚାୟତ ଅନ୍ତର୍ଗତ ବୁଟୁଖମନ ଗଁାର ଅଭିରାମ ପ୍ରଧାନ(୪୫) କିଡ୍ନୀ ରୋଗରେ ଆକ୍ରାନ୍ତ ହୋଇଛନ୍ତି। ସେ ଚିକିତ୍ସା ଖର୍ଚ୍ଚ ପାଇଁ ତାଙ୍କର ୨ଏକର ଜମି ବକ୍ରି କରିଥିବା କହିଛନ୍ତି।
ରାଜ୍ୟର ବିଭିନ୍ନ ଜିଲା ମୁଖ୍ୟ ଚିକିତ୍ସାଳୟରେ କିଡ୍ନୀ ରୋଗୀଙ୍କ ପାଇଁ ଡାଏଲିସିସ୍ ସେଣ୍ଟର ଖୋଲିଛି। ମାତ୍ର ସୁବର୍ଣ୍ଣପୁରରେ ତାହା ନ ଥିବାରୁ ଅଧିକାଂଶ ରୋଗୀ ନିୟମିତ ଡାଏଲିସିସ୍ କରି ପାରୁନାହାନ୍ତି। ଆର୍ଥିକ ସ୍ବଚ୍ଛଳ ବର୍ଗର ରୋଗୀ କଟକ, ବୁର୍ଲା ଓ ଭୁବନେଶ୍ୱର ଯାଇ ଚିକିତ୍ସିତ ହେଉଛନ୍ତି। ହେଲେ ଗରିବ ରୋଗୀମାନେ ଚିକିତ୍ସା ତଥା ଡାଏଲିସିସ୍ ପାଇଁ ଖର୍ଚ୍ଚାନ୍ତ ହେଉଛନ୍ତି। ଏପରି କି ବାଧ୍ୟ ହୋଇ ସେମାନେ ସୁନାରୁପା ଗହଣା, ଜମିବାଡ଼ି ବିକ୍ରି କରୁଥିବା ଖବର ମିଳିଛି। ସୂଚନା ଅନୁଯାୟୀ, ଜିଲାର ସୋନପୁର ବ୍ଲକ ମୟୂରଉଡାନ, ଅର୍ଜୁନପୁର, ପ୍ରତାପପୁର, ରୁଗୁଡିପାଲି, କୀର୍ତ୍ତିପୁର, ବୀରମହାରାଜପୁର ବ୍ଲକର ଘଣ୍ଡପାଲି, କଦଳିପାଲି, କେନ୍ଝିରିଆପାଲି, ଅମରପାଲି, ଗୌଡଗାଡ, ବହଲପଦର, ଦାଦରପାଲି ଓ ଉଲୁଣ୍ଡା ବ୍ଲକର ଡାଲଡବା, ଝାରବାହାଲି ଓ ସୁନାପାଲି ଆଦି ଅନେକ ଗ୍ରାମରେ ୪ଶହରୁ ଊର୍ଦ୍ଧ୍ୱ କିଡ୍ନୀ ରୋଗୀ ଅଛନ୍ତି। ଅମ୍ଳଯୁକ୍ତ ପାଣି ପିଇବା ଓ ମଧୁମେହ ପାଇଁ କିଡ୍ନୀ ରୋଗୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଗ୍ରାମାଞ୍ଚଳରେ ପାନୀୟ ଜଳର ନମୂନା ପରୀକ୍ଷା ନିୟମିତ ହେଉ ନ ଥିବାରୁ ଏହି ରୋଗ ବଢ଼ିବାରେ ଲାଗିଛି।
ଏ ସଂକ୍ରାନ୍ତରେ ଉଲୁଣ୍ଡା ବ୍ଲକ ଡାଲଡବା ଗ୍ରାମର ଗରିବ ନାଗ୍ କୁହନ୍ତି, ମୁଁ ଜଣେ କିଡ୍ନୀ ରୋଗୀ। ଜିଲା ମୁଖ୍ୟ ଚିକିତ୍ସାଳୟର ନିରାମୟ କେନ୍ଦ୍ରରୁ ଔଷଧ ନେଇ ଖାଉଥିଲି। ଗତ ୫ ମାସ ହେଲା ଔଷଧ ଦିଆଯାଉ ନାହିଁ। କେନ୍ଦ୍ରକୁ ଗଲେ କେବଳ ଏସିଡ୍ ଔଷଧ ଦିଆଯାଉଛି। ଏଣୁ କିଡ୍ନୀ ଔଷଧ ପାଇଁ ଧାରକରଜ କରି ଏବେ ମାସିକ ୫ହଜାର ଟଙ୍କା ଖର୍ଚ୍ଚ କରିବାକୁ ପଡୁଛି। ନିରାମୟ ଯୋଜନାରେ ମାଗଣାରେ ଔଷଧ ଯୋଗାଇବାକୁ ମୁଁ ସରକାରଙ୍କୁ ଲେଖି କରି ଜଣାଇଛି। କିନ୍ତୁ ଆମ ଦୁଃଖ କେହି ଶୁଣୁନାହାନ୍ତି। ଜିଲା ମୁଖ୍ୟ ଚିକିତ୍ସାଳୟର ଏପିଡୋମିଓଲୋଜିଷ୍ଟ ଡାକ୍ତର ବିଷ୍ଣୁଚରଣ ମାଝି କୁହନ୍ତି, କିଡ୍ନୀ ରୋଗୀଙ୍କୁ ଡାଏଲିସିସ୍ ସୁବିଧା ଯୋଗାଇ ଦେବା ପାଇଁ ସୁବର୍ଣ୍ଣପୁର ଜିଲାକୁ ବୌଦ୍ଧ ଜିଲା ସହିତ ସଂଯୋଗ କରାଯାଇଥିବାରୁ ସମସ୍ୟା ହେଉଛି। ସେହିପରି ରୋଗୀଙ୍କୁ ପ୍ରଦାନ କରାଯାଉଥିବା ଟଉରିନ୍ ଔଷଧ ଜିଲାରେ ମହଜୁଦ୍ ନାହିଁ। ରାଜ୍ୟ ଔଷଧ ନିଗମ ଏହି ଔଷଧ ପ୍ରଦାନ କଲେ ହିଁ ନିରାମୟ ଯୋଜନାରେ ରୋଗୀଙ୍କୁ ଦିଆଯିବ।
