ଖୋର୍ଦ୍ଧା ଅଫିସ,୬ା୪: ଋଣ ଖିଲାପ ଅଭିଯୋଗରେ ବୁଧବାର ଖୋର୍ଦ୍ଧା ଜିଲା ଭାଜପା ସଭାପତି ରଶ୍ମିରଞ୍ଜନ ମହାପାତ୍ରଙ୍କ ମୁକୁନ୍ଦପ୍ରସାଦସ୍ଥିତ ସୂର୍ଯ୍ୟମୁଖୀ ହୋଟେଲକୁ ସିଲ୍ କରାଯାଇଛି। ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି) ଭୁବନେଶ୍ୱର ସର୍କଲ ଅଧିକାରୀ, ସ୍ଥାନୀୟ ଆସିଷ୍ଟାଣ୍ଟ କଲେକ୍ଟର ଶରତ ଚନ୍ଦ୍ର ଦେହୁରି ଓ ପୋଲିସ ଉପସ୍ଥିତିରେ ଉକ୍ତ ହୋଟେଲକୁ ସିଲ୍ କରାଯାଇଥିଲା। ତେବେ ହୋଟେଲ ପରିସରରେ ଭାଜପା ଜିଲା କାର୍ଯ୍ୟାଳୟ ଏବଂ ବାର୍ ଆଣ୍ଡ ରେଷ୍ଟୁରାଣ୍ଟ ଚାଲିଥିଲା। ଚଢ଼ାଉ ବେଳେ ପରିସରରେ ଭାଜପା ପତାକା ଗଦା ହୋଇଥିବା ମଧ୍ୟ ଦେଖିବାକୁ ମିଳିଛି।
ସୂଚନା ମୁତାବକ, ପିଏନବିର ଜଟଣୀ ଅରଗୁଳ ବ୍ରାଞ୍ଚରୁ ରଶ୍ମି ୨୦୧୭ରେ ଋଣ ଆଣିଥିଲେ। ମୂଳଧନ ଓ ସୁଧକୁ ମିଶାଇ ପ୍ରାୟ ସାଢ଼େ ୫କୋଟି ଟଙ୍କା ହେବ ବୋଲି ବ୍ୟାଙ୍କ ପକ୍ଷରୁ କୁହାଯାଇଛି। ବାରମ୍ବାର ନୋଟିସ ସତ୍ତ୍ୱେ ରଶ୍ମି ଏଥିପ୍ରତି କର୍ଣ୍ଣପାତ କରି ନ ଥିଲେ। ଏନେଇ ବ୍ୟାଙ୍କ କର୍ତ୍ତୃପକ୍ଷ ହୋଟେଲକୁ ନିଜ କବ୍ଜାକୁ ନେବାକୁ ଜିଲା ପ୍ରଶାସନକୁ ଅନୁରୋଧ କରିଥିଲେ। ବୁଧବାର ପୂର୍ବାହ୍ନରେ ପିଏନ୍ବି ଭୁବନେଶ୍ୱର ସର୍କଲ ପକ୍ଷରୁ ଅଧିକାରୀମାନେ ହୋଟେଲରେ ପହଞ୍ଚିଥିଲେ। ପ୍ରଶାସନ ପକ୍ଷରୁ ଆସିଷ୍ଟାଣ୍ଟ କଲେକ୍ଟର ଦେହୁରି ମାଜିଷ୍ଟ୍ରେଟ ଭାବେ ଉପସ୍ଥିତ ଥିଲେ। ଆଇନଶୃଙ୍ଖଳା ଦୃଷ୍ଟିରୁ ଥାନାଧିକାରୀ ତାରିକ ଅହମ୍ମଦ, ଅତିରିକ୍ତ ଆଇଆଇସି କୃଷ୍ଣଚନ୍ଦ୍ର ସ୍ବାଇଁ, ଏସ୍ଆଇ ପି.ଏଲ୍. ବେହେରାଙ୍କ ସମେତ ଏକ ପ୍ଲାଟୁନ ଫୋର୍ସ ମୁତୟନ ରହିଥିଲେ। ପିଏନ୍ବି ଅଧିକାରୀ ହୋଟେଲରେ ତନ୍ନତନ୍ନ ଯାଞ୍ଚ କରିଥିଲେ। ୪ ମହଲାବିଶିଷ୍ଟ ଏହି ହୋଟେଲରେ ୧୪ରୁ ଊର୍ଦ୍ଧ୍ୱ ରୁମ୍ ରହିଛି। ତଳ ମହଲାରେ ବାର୍ ଆଣ୍ଡ ରେଷ୍ଟୁରାଣ୍ଟ ଚାଲିଥିବା ବେଳେ ଦୁଇ ମହଲା ଲୋକଙ୍କ ପାଇଁ ଉଦ୍ଦିଷ୍ଟ ରହିଥିଲା। ହୋଟେଲ ପରିସରରେ ରଶ୍ମି ଭାଜପା ଜିଲା କାର୍ଯ୍ୟାଳୟ କରିଥିବା ବେଳେ ଅନେକଥର ସାଙ୍ଗଠନିକ ବୈଠକ, କାର୍ଯ୍ୟକ୍ରମ ମଧ୍ୟ ଆୟୋଜନ କରାଯାଇଛି। ଚଢ଼ାଉ ବେଳେ ୬ଟି ରୁମ୍ରେ ଲୋକେ ରହିଥିଲେ। ସେମାନଙ୍କୁ ତୁରନ୍ତ ରୁମ୍ ଖାଲି କରିବାକୁ କୁହାଯାଇଥିଲା। ପରେ ସମସ୍ତ କୋଠରି ସିଲ୍ କରାଯିବା ସହ ମୁଖ୍ୟ ଫାଟକରେ ଜଉମୁଦ ଦେଇ ସିଲ୍ କରିଥିଲେ। ତେବେ ଚଢ଼ାଉ ବେଳେ ହୋଟେଲ ପରିସରରେ ଚାଲିଥିବା ସୂର୍ଯ୍ୟମୁଖୀ ବାର୍ ଲାଗି ରୁମ ଲିଜ୍ ନେଇଥିବା ମାଲିକ ସୁଦର୍ଶନ ସୁନ୍ଦରାୟ ଏବଂ ବ୍ୟାଙ୍କ କତ୍ତୃର୍ର୍ପକ୍ଷ ମୁହଁାମୁହିଁ ହୋଇଥିଲେ। ଏଠାରେ ବାର୍ ଖୋଲିବା ପାଇଁ ହୋଟେଲ ମାଲିକଙ୍କ ସହ ଚୁକ୍ତିନାମା ଏବଂ ଅନ୍ୟ କାଗଜପତ୍ର ଦେଖାଇଥିଲେ। ବାର୍ରେ ଲକ୍ଷାଧିକ ଟଙ୍କାର ବିଦେଶୀ ମଦ ରହିଥିବାରୁ ତାହାକୁ ଅନ୍ୟତ୍ର ସ୍ଥାନାନ୍ତର ଲାଗି ସମୟ ମାଗିଥିଲେ। ତେବେ ହୋଟେଲକୁ ବ୍ୟାଙ୍କ ନିଜ କବ୍୍ଜାକୁ ନେଇଯାଇଥିବାରୁ ବାର୍ ଖୋଲିବା କିମ୍ବା ସାମଗ୍ରୀ ନେଇପାରିବେ ନାହିଁ ବୋଲି ମନା କରିଥିଲେ। ଏ ସମ୍ପର୍କରେ ଆସିଷ୍ଟାଣ୍ଟ କଲେକ୍ଟର ଦେହୁରି କହିଛନ୍ତି, ଜିଲାପାଳଙ୍କ ନିର୍ଦ୍ଦେଶକ୍ରମେ ମାଜିଷ୍ଟ୍ରେଟ ଦାୟିତ୍ୱରେ ରହିଥିଲି। ଋଣ ଖିଲାପ ନେଇ ବ୍ୟାଙ୍କ କର୍ତ୍ତୃପକ୍ଷ ହୋଟେଲକୁ ସିଲ୍ ଲାଗି ଜିଲାପାଳଙ୍କୁ ଜଣାଇଥିଲେ। ପ୍ରଶାସନର ନିର୍ଦ୍ଦେଶକ୍ରମେ ବ୍ୟାଙ୍କ କର୍ତ୍ତୃପକ୍ଷ ପୋଲିସ ଉପସ୍ଥିତିରେ ସିଲ୍ କରିଥିଲେ ବୋଲି ସେ କହିଛନ୍ତି।
