ନୂଆଗଡ଼,୧୦ା୪: ରାଜ୍ୟ ସରକାର ଶିକ୍ଷା କ୍ଷେତ୍ରରେ ପରିବର୍ତ୍ତନ ଆଣିବା ସହ ଛାତ୍ରୀଛାତ୍ରମାନଙ୍କୁ ଉନ୍ନତ ମାନର ପାଠପଢା ସହିତ ଅନ୍ୟାନ୍ୟ ଜ୍ଞାନକୌଶଳର ଅଭିବୃଦ୍ଧି ପାଇଁ ବିଦ୍ୟାଳୟଗୁଡିକର ରୂପାନ୍ତରଣ କାର୍ଯ୍ୟ କରୁଛନ୍ତି। ଏଥିସହ ବିଭିନ୍ନ ଯୋଜନାମାନ ପ୍ରଣୟନ କରି ସରକାରୀ ବିଦ୍ୟାଳୟଗୁଡିକ ରୂପାନ୍ତରଣ କାର୍ଯ୍ୟ କରିବା ପାଇଁ ୫-ଟି ଯୋଜନା ମାଧ୍ୟମରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି। ତେବେ ଆଦିବାସୀ ଉପାନ୍ତ ଅଞ୍ଚଳରେ ସରକାରୀ ବିଦ୍ୟାଳୟର ସଫଳ ରୂପାୟନ କରିବାଲାଗି ଉପଯୁକ୍ତ ଦେଖାରଖା ତଥା ଦୂରଦୃଷ୍ଟି ଅଭାବରୁ ଉନ୍ନତ ମାନର ଏବଂ ଠିକ ଭାବେ କାର୍ଯ୍ୟ ହେଉ ନ ଥିବା ଅଭିଯୋଗ ହେଉଛି। ଗଜପତି ଜିଲା ନୂଆଗଡ଼ ବ୍ଲକ ଆଦିବାସୀ ଦୁର୍ଗମ କେରେଡାଙ୍ଗ ସରକାରୀ ଉଚ୍ଚ ବିଦ୍ୟାଳୟ ବର୍ତ୍ତମାନ ଅବ୍ୟବସ୍ଥା ଘେରରେ। ଅଚଳ ଅବସ୍ଥାରେ ଶୌଚାଳୟ ଥିବାବେଳେ ପାଣିର ବ୍ୟବସ୍ଥା ନାହିଁ। ବିଦ୍ୟାଳୟ ପରିସର ବାହାରେ ଥିବା ନଳକୂଅରୁ ମଟର ସଂଯୋଗ କରାଯାଇଛି ହେଲେ ସେଥିରୁ ମଧ୍ୟ ପାଣି ବାହାରୁ ନାହିଁ। ଛାତ୍ରୀଛାତ୍ର ବାହାରେ ଯାଇ ପରିସ୍ରା କରୁଥିବା ସହ ପିଇବା ପାଇଁ ପାଣି ମୁନ୍ଦେ ନ ଥିବା କହିଛନ୍ତି। ବିଦ୍ୟୁତର ଠିକ୍ ସଂଯୋଗ ହୋଇ ନ ଥିବାରୁ ଗ୍ରୀଷ୍ମ ଋତୁରେ ଫ୍ୟାନ ସବୁ ଅଚଳ ଅବସ୍ଥାରେ ଏବଂ କମ୍ପ୍ୟୁଟର ଶିକ୍ଷାରୁ ବଞ୍ଚିତ ହେଉଛନ୍ତି ଛାତ୍ରୀଛାତ୍ର। ବିଦ୍ୟାଳୟ ପରିସରର ଦୁଇଟି ବଖରା କାର୍ଯ୍ୟ ଅସମ୍ପୂର୍ଣ୍ଣ ଅବସ୍ଥାରେ ଥିବାରୁ ଅଫିସ କାର୍ଯ୍ୟାଳୟ ହୋଇନାହିଁ। ପଡ଼ିଆରେ ଗଦା ଗଦା ହୋଇ ମାଟି ପଡ଼ି ରହିଥିବା ବେଳେ ପଡି଼ଆର ସୋନ୍ଦର୍ଯ୍ୟକରଣ କାର୍ଯ୍ୟ ଅଧାପନ୍ତରା ଭାବେ ରହିଛି। କେଉଁଠି କାନ୍ଥ ଫାଟିଛି ତ କେଉଁଠି ତଳର ଟାଇଲ ଅଧା ପଡି଼ନି। କମ୍ପ୍ୟୁଟର ଲାବ୍ର ଝରକା କବାଟ ଚତୁଃପାର୍ଶ୍ୱରେ ଲାଗିଥିବା ଟାଇଲ ଗୋଟି ଗୋଟି ହୋଇ ଖସି ପଡୁଥିବା ବେଳେ କବାଟ ଠିକ୍ ଭାବେ ପଡୁନି। ଫଳରେ ବିଦ୍ୟାର୍ଥୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ବେଳେ ଅଞ୍ଚଳବାସୀ ଅସନ୍ତୋଷ ବ୍ୟକ୍ତ କରିଛନ୍ତି। ସୂଚନା ଅନୁଯାୟୀ, ଏହି ବିଦ୍ୟାଳୟ ନବମ, ଦଶମ ଶ୍ରେଣୀ ନିମନ୍ତେ ୨୦୦୯ରେ ସ୍ଥାପିତ ହୋଇଛି। ଏହାକୁ ଏକ ବର୍ଷ ପୂର୍ବେ ଦ୍ୱିତୀୟ ପର୍ଯ୍ୟାୟରେ ୫-ଟି ଯୋଜନାରେ ରୂପାନ୍ତରିତ କରାଯାଇଛି। କନିଷ୍ଠ ଯନ୍ତ୍ରୀଙ୍କ ନାମରେ ବିଦ୍ୟାଳୟର ରୂପାନ୍ତରଣ କାର୍ଯ୍ୟର କାର୍ଯ୍ୟାଦେଶ ଦିଆଯାଇଥିଲା। ସ୍ଥାନୀୟ ପ୍ରଶାସନର ଅବହେଳାରୁ ବିଦ୍ୟାଳୟର ଅବସ୍ଥା ଏଭଳି ସ୍ଥିତିରେ ରହିଛି ବୋଲି ଅଞ୍ଚଳରେ ଚର୍ଚ୍ଚା ଜୋର ଧରିଛି। ବିଦ୍ୟାଳୟର ସମସ୍ୟା ନେଇ ଗୋଷ୍ଠୀ ଉନ୍ନୟନ ଅଧିକାରୀ ଲୋକନାଥ ଶବରଙ୍କୁ ପଚାରି ବୁଝିବାରୁ ଏହାର ତଦନ୍ତ କରିଛି, ଶୀଘ୍ର ବିଦ୍ୟାଳୟର ସମସ୍ତ ସମସ୍ୟାର ସମାଧାନ କରାଯିବ ବୋଲି କହିଛନ୍ତି।
