ଥିରୁଭାନନ୍ତପୁରମ: ପନିପରିବା ଉପରେ କେରଳ ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି) ପ୍ରଦାନ କରିବ। ଏଭଳି ବ୍ୟବସ୍ଥା ଗ୍ରହଣ କ୍ଷେତ୍ରରେ କେରଳ ପ୍ରଥମ ରାଜ୍ୟ ବୋଲି ଜଣାପଡିଛି। ନୂଆ ବ୍ୟବସ୍ଥା ସମ୍ପର୍କରେ କେରଳ ମୁଖ୍ୟମନ୍ତ୍ରୀ ପିନାରାୟୀ ବିଜୟନ ଘୋଷଣା କରାଯାଇଛି। ଏହା ମଧ୍ୟରେ ୧୬ଟି ବର୍ଗର ପନିପରିବାକୁ ସାମିଲ କରାଯାଇଛି। ନଭେମ୍ବର ପହିଲାରୁ ଏହି ସ୍କିମ୍କୁ କାର୍ଯ୍ୟକାରୀ କରାଯିବ ବୋଲି ଜଣାପଡିଛି। କୃଷିକ୍ଷେତ୍ରର ବିକାଶ ଲାଗି ବିଭିନ୍ନ ଯୋଜନା ହାତକୁ ନିଆଯାଉଥିବା ବେଳେ ଏଭଳି ଯୋଜନା ଦ୍ୱାରା କୃଷକମାନେ ବିଶେଷ ଭାବେ ଲାଭବାନ ହେବେ ବୋଲି ବିଜୟନ ଭିଡିଓ କନ୍ଫରେନ୍ସ ଯୋଗେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସୂଚନା ଦେଇଛନ୍ତି। ବର୍ତ୍ତମାନ ସାରା ଦେଶରେ ଡାଲି ଏବଂ ଖାଦ୍ୟ ସାମଗ୍ରୀ ଉପରେ ଏମ୍ଏସ୍ପି ପ୍ରଦାନ କରାଯାଉଛି। ଫଳ ଏବଂ ପନିପରିବାକୁ ଏହା ପରିସରରେ ରଖାଯାଇନାହିଁ। ଉତ୍ପାଦନ ମୂଲ୍ୟଠାରୁ ଫ୍ଲୋର ପ୍ରାଇସ ପ୍ରାୟ ୨୦% ଉଚ୍ଚରେ ରଖିବାକୁ କେରଳ ଯୋଜନା ରଖିଛି। ଫ୍ଲୋର ପ୍ରାଇସଠାରୁ ବଜାର ମୂଲ୍ୟ କମିଲେ ମଧ୍ୟ କୃଷକଙ୍କଠାରୁ ଫ୍ଲୋର ପ୍ରାଇସରେ ଉତ୍ପାଦିତ ପନିପରିବା କିଣିବାକୁ ଯୋଜନା ରଖାଯାଇଛି। ସେହିଭଳି ଗୁଣବତ୍ତା ହିସାବରେ ଉତ୍ପାଦିତ ସାମଗ୍ରୀକୁ ବର୍ଗୀକରଣ କରାଯିବ। ପ୍ରାଥମିକ ପର୍ଯ୍ୟାୟରେ ୧୬ ବର୍ଗର ପନିପରିବାକୁ ଯୋଜନାରେ ସାମିଲ କରାଯାଇଛି। ନିୟମିତ ଭିତ୍ତିରେ ଫ୍ଲୋର ପ୍ରାଇସରେ ପରିବର୍ତ୍ତନ କରିବା ନେଇ ମଧ୍ୟ ଯୋଜନା ରହିଛି। ସିଜନ ପିଛା ଅନୂ୍ୟନ ୧୫ ଏକର ଜମିରେ ପନିପରିବା ଚାଷ କରୁଥିବା ଚାଷୀଙ୍କୁ ଏହି ଯୋଜନାରେ ବିଶେଷ ଲାଭ ମିଳିପାରିବ।
