ସେଣ୍ଟ୍ରାଲ ଏସିଆର ଧନୀ ଦେଶଗୁଡ଼ିକ ମଧ୍ୟରେ କାଜାଖସ୍ତାନ ଅନ୍ୟତମ। ଏହା ପୃଥିବୀର ନବମ ବୃହତ୍ତମ ଦେଶ। ନୁର-ସୁଲତାନ ଏହାର ରାଜଧାନୀ ହୋଇଥିବା ବେଳେ ଆଲ୍ମାଟି ହେଉଛି ଏହାର ସବୁଠୁ ବଡ଼ ସହର। କାଜାଖ୍ ଏବଂ ରଷିଆନ୍ ଏହାର ସରକାରୀ ଭାଷା। ତେବେ ଜାଣନ୍ତୁ ଆଉ କିଛି ଅଧିକ ତଥ୍ୟ ଏହି ଦେଶ ସମ୍ପର୍କରେ…
କାଜାଖସ୍ତାନ ହେଉଛି ଏପରି ଏକ ଦେଶ, ଯାହାର ସୀମାକୁ ଲାଗି କୌଣସି ଜଳଭାଗ ନାହିଁ। ଅର୍ଥାତ୍ ଏହାକୁ ଚାରିପଟୁ ଚାଇନା, ରୁଷିଆ, ତୁର୍କୀମେନ୍ସ୍ତାନ, ଉଜ୍ବେକିସ୍ତାନ ଆଦି ଦେଶ ଘେରି ରହିଛି।
ରୁଷିଆ ଏବଂ କାଜାଖସ୍ତାନ ମଧ୍ୟରେ ଥିବା ସୀମା ହେଉଛି ପୃଥିବୀର ସବୁଠାରୁ ବଡ଼ ସୀମା, ଯାହାର ଲମ୍ବ ରହିଛି ୭,୫୧୨ କିଲୋମିଟର।
ପୃଥିବୀର ସବୁଠୁ ବଡ଼ ଚିମିନି ‘ଏକିବାସ୍ତୁଚ୍ ଗ୍ରେସ୍-୨’ ମଧ୍ୟ ଏଠାରେ ରହିଛି, ଯାହାର ଉଚ୍ଚତା ହେଉଛି ୪୨୦ ମିଟର।
୨୦୦୯ ମସିହାରେ ୟୁରାନିୟମ୍ ଉତ୍ପାଦନରେ ସମଗ୍ର ବିଶ୍ୱରେ କାଜାଖସ୍ତାନ ଥିଲା ପ୍ରଥମ ଦେଶ, ଯାହାର ପରିମାଣ ଥିଲା ୧୪ ହଜାର ୨୦ ଟନ୍। ପରେ ୨୦୧୧ ମସିହାରେ ଦେଶର ଶତକଡ଼ା ପ୍ରାୟ ୩୫ ଭାଗ ଏଠାରେ ଉତ୍ପାଦିତ ହୋଇଥିଲା। ଏବେ ୟୁରାନିୟମ୍ ସଂରକ୍ଷିତ କରିବାରେ ଏହା ପୃଥିବୀର ଦ୍ୱିତୀୟ ବୃହତ୍ତମ ଦେଶ ଭାବେ ପରିଚିତ।
ଖାଲି ସେତିକି ନୁହେଁ ପାରଦ, ଜିଙ୍କ୍, କ୍ରୋମିୟମ୍ ଉତ୍ପାଦନରେ ମଧ୍ୟ ଏହା ପୃଥିବୀରେ ଦ୍ୱିତୀୟ ସ୍ଥାନ ଅଧିକାର କରିଛି। ଏହାଛଡ଼ା କୋଇଲା, ଲୁହା, କପର୍, ମାଙ୍ଗାନିଜ୍, ସୁନା, ପେଟ୍ରୋଲିୟମ୍, ନାଚୁରାଲ ଗ୍ୟାସ ଆଦି ଏଠାରେ ବହୁ ପରିମାଣରେ ଉତ୍ପାଦନ ହୁଏ।
ପ୍ରଥମ ଆର୍ଟିଫିସିଆଲ ସାଟେଲାଇଟ୍ ସ୍ପୁଟନିକ୍-୧ ଏବଂ ପ୍ରଥମ ବ୍ୟକ୍ତି ୟୁରି ଗାଗାରିନ୍, କାଜାଖସ୍ତାନର ବେକନର୍ କସ୍ମୋଡ୍ରୋମ୍ ସହରରୁ ମହାକାଶକୁ ଯାଇଥିଲେ।
ପୃଥିବୀର ବଡ଼ ହ୍ରଦମାନଙ୍କ ମଧ୍ୟରେ କାଜାଖସ୍ତାନରେ ଥିବା ‘ବଲ୍ଖାସ୍’ ହେଉଛି ଅନ୍ୟତମ, ଯାହାର ଅଧା ଜଳ ମଧୁର ଏବଂ ଅଧା ଜଳ ଲୁଣି।
ମାଣ୍ଡେଲିଭ୍ ପିରିୟଡିକ୍ ଟେବୁଲରେ ଥିବା ୧୧୮ଟି ଏଲିମେଣ୍ଟ ମଧ୍ୟରୁ ପ୍ରାୟ ୯୯ଟି ଏଲିମେଣ୍ଟ ଏଠାରୁ ହିଁ ଆବିଷ୍କାର ହୋଇଛି।
