ନୂଆଦିଲ୍ଲୀ,୨୮।୧୦: କରୱାଚୌଥ ଅବସରରେ ମହିଳାଙ୍କ ସହ ପୁରୁଷଙ୍କୁ ମଧ୍ୟ ମିଳିବ ଛୁଟି । ଏନେଇ ହିମାଚଳ ପ୍ରଦେଶ ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ଖବର ସାମ୍ନାକୁ ଆସିଛି । ମୁଖ୍ୟମନ୍ତ୍ରୀ ଠାକୁର ସୁଖବିନ୍ଦର ସିଂ ସୁଖୁ ଏହି ଘୋଷଣା କରିଥିବା ଉଲ୍ଲେଖ ରହିଛି । ଏହା ଫଳରେ ଏହି ପର୍ବକୁ ସ୍ୱାମୀ-ସ୍ତ୍ରୀ ଏକାଠି ପାଳନ କରିବାର ସୁଯୋଗ ପାଇବେ ବୋଲି କୁହାଯାଉଛି।
ସାଧାରଣତଃ କରୱାଚୌଥ ଅବସରରେ ମହିଳା କର୍ମଚାରୀଙ୍କୁ ଛୁଟି ମିଳୁଥିବା ବେଳେ ଏଥର ପୁରୁଷଙ୍କୁ ମଧ୍ୟ ଛୁଟି ଦେବା ନେଇ ଘୋଷଣା କରାଯାଇଥିବା ଖବର ପ୍ରକାଶ ପାଇଛି । ଏହି ନିଷ୍ପତ୍ତି ଦ୍ୱାରା ଉଭୟ ମହିଳା ଓ ପୁରୁଷ କର୍ମଚାରୀ ପରିବାର ସହ ସମୟ ବିତାଇପାରିବେ।ସୂଚନା ଅନୁସାରେ, ଚଳିତ ବର୍ଷ ଅକ୍ଟୋବର ୨୯ ତାରିଖରେ କରୱା ଚୌଥ ପାଳନ କରାଯିବ । ଏହି ଅବସରରେ ହିମାଚଳ ପ୍ରଦେଶରେ ସାର୍ବଜନୀନ ଛୁଟି ଘୋଷଣା କରାଯାଇଥିବା ଦାବି କରାଯାଇଛି। ଏଥିସହ ସରକାରୀ କାର୍ଯ୍ୟାଳୟ, ସ୍କୁଲ୍ ଓ କଲେଜ ବନ୍ଦ ରହିବା ନେଇ ମଧ୍ୟ ସୂଚନା ଦିଆଯାଇଛି।
ଉଲ୍ଲେଖଯୋଗ୍ୟ, ଏହା ପୂର୍ବରୁ ହିମାଚଳ ପ୍ରଦେଶରେ ରକ୍ଷାବନ୍ଧନ ଅବସରରେ ମଧ୍ୟ ପୁରୁଷଙ୍କୁ ଛୁଟି ଦିଆଯାଇଥିବା କୁହାଯାଇଛି। କରୱାଚୌଥରେ ମଧ୍ୟ ଏଭଳି ଘୋଷଣା ହୋଇଥିଲେ, ପର୍ବ ପାଳନ ପାଇଁ ଉଭୟ ମହିଳା ଓ ପୁରୁଷ କର୍ମଚାରୀଙ୍କୁ ସୁବିଧା ମିଳିବ।
