ଖୋର୍ଦ୍ଧା ଅଫିସ,୧୬ା୧୨: ରାଜ୍ୟରେ କୋଭିଡ୍-୧୯ ସ୍ଥିତି ସୁଧୁରିଥିବା ବେଳେ ଏବେ ବି ଦିନ ମଜୁରିଆ, ମିସ୍ତ୍ରି କାମ ନ ପାଇ ଘରେ ବସି ରହିଛନ୍ତି। କରୋନା ଛଡ଼ାଇ ନେଇଛି ସେମାନଙ୍କ ଜୀବିକା। ଫଳରେ ଅଭାବ ଅନାଟନ ମଧ୍ୟରେ ଏମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଖୋର୍ଦ୍ଧା ସହରରେ ପ୍ରତିଦିନ ୫୦ରୁ ୬୦ ରିକ୍ସାଚାଳକ ପରିବା ମଣ୍ଡି, ଗ୍ରସେରୀ ସାମଗ୍ରୀ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ସ୍ଥାନାନ୍ତର କରି ରୋଜଗାର କରିଥାନ୍ତି। ଗତ ମାର୍ଚ୍ଚ ମାସଠାରୁ କାମ ନ ପାଇ ହାତବାନ୍ଧି ବସିଛନ୍ତି। ଏବେ ସ୍ଥିତି ସୁଧୁରିଲେ ମଧ୍ୟ ଆଗଭଳି କାମ ମିଳୁନାହିଁ। କୋଅପରେଟିଭ ଛକ ନିକଟରେ ଧାଡିବାନ୍ଧି ରିକା୍ସ ଧରି ଅପେକ୍ଷା କରି ରହୁଛନ୍ତି। ଗୋଟିଏ ଦିନରେ ଦୁଇ ଶହ ଟଙ୍କା ରୋଜଗାର ହେଉ ନ ଥିବା ଗୋପୀନାଥ ନାୟକ କହିଛନ୍ତି। ୮ମାସ ହେବ ରୋଜଗାର ନାହିଁ। ଏପରି ଆଉ କିଛିଦିନ ଜାରି ରହିଲେ, ପରିବାର ଚଳାଇବା କଷ୍ଟକର ହୋଇପଡ଼ିବ ବୋଲି ସୁଜିତ ନାୟକ କହିଛନ୍ତି। ଫୁଟପାଥ୍ରେ କଦଳୀ ବ୍ୟବସାୟ କରୁଥିବା ନାରାୟଣ ବେହେରା କୁହନ୍ତି, ବ୍ୟବସାୟୀଙ୍କଠାରୁ କଦଳୀ ଆଣି ବିକ୍ରି କରୁଛି। ଡଜନ ପିଛା ୧୫ରୁ ୨୦ଟଙ୍କାରେ ବିକ୍ରି କଲେ ମଧ୍ୟ ବେପାର ହେଉନାହିଁ। ଗତ ତିନି ମାସ ହେଲାଣି ଦିନକୁ ୧୫୦ଟଙ୍କା ବିକ୍ରି ହେବା କଷ୍ଟକର ହୋଇପଡୁଛି। ସେହିପରି ରଞ୍ଜନ ସାହୁ କୁହନ୍ତି, କରୋନାକୁ ନେଇ ଏବେ ବି କଟକଣା ରହିଛି। ଆଗଭଳି ବେପାର ନାହିଁ। ପରିବାର କିପରି ଚଳିବ ଆଶଙ୍କା ରହିଛି। ଗତ କିଛି ମାସ ହେବ ଧାରକରଜରେ ଚାଲିଛି। ରାସ୍ତାକଡ଼ରେ ପନିପରିବା ଆଣି ବିକ୍ରି କରୁଥିବା ସୁଜିତ ସାହୁ କୁହନ୍ତି, ଫାଇଲିନ ଦୁଃଖ ସରି ନ ଥିବା ବେଳେ ଏବେ କରୋନା ଦୁଃଖ ବଳିଗଲାଣି। ଆଗଭଳି ପନିପରିବା ବଜାରକୁ ଆସୁନାହିଁ। ଯାହା ବି ଆସୁଛି, ବହୁତ କମ୍। ଦିନକୁ ଦିନ ବେପାର ମାନ୍ଦା ରହୁଛି। ବିକ୍ରି ନ ହେଲେ ଧାରକରଜ ଶୁଝିବି କିପରି ଚିନ୍ତା ଘାରିଲାଣି। ଏସବିଆଇ ଛକ ନିକଟରେ ଖୋର୍ଦ୍ଧା ଅଞ୍ଚଳରୁ ଶତାଧିକ ମିସ୍ତ୍ରି, ମଜୁରିଆ କାର୍ଯ୍ୟ ଲାଗି ଛିଡ଼ା ହୋଇଥାନ୍ତି। କାମକୁ ଗଲେ ଠିକାଦାରମାନେ ମାସ୍କ ପିନ୍ଧିବାକୁ ବାଧ୍ୟ କରୁଛନ୍ତି। ଆମେ ଗରିବ ଲୋକ, ପ୍ରତିଦିନ ମାସ୍କ କେଉଁଠୁ ଆଣିବୁ। କରୋନା ଜୀବନ ଜୀବିକାକୁ ବଦଳାଇ ଦେଇଛି ବୋଲି କେତେଜଣ ମିସ୍ତ୍ରି କହିଛନ୍ତି। ରିକ୍ସାଚାଳକ ରାଜୁ ନାୟକ କୁହନ୍ତି, ମନ୍ଦିର ବନ୍ଦ, ସରକାରୀ କାର୍ଯ୍ୟାଳୟକୁ ପ୍ରବେଶ ମନା। ଲୋକେ ଆଗଭଳି ଆସୁନାହାନ୍ତି। ଦିନସାରା ବଜାରରେ ବୁଲିଲେ ମଧ୍ୟ ଗ୍ରାହକ ମିଳୁନାହାନ୍ତି। ବହୁ ସମୟରେ କୌଣସି କାମ ନ ପାଇ ଘରକୁ ଘରକୁ ଫେରିଯାଉଛୁ ବୋଲି ସେ କହିଛନ୍ତି।
