ଢେଙ୍କାନାଳ ଅଫିସ୍, ୨୩।୪: ତଳେ ଯିବ ଟ୍ରେନ୍। ଉପରେ ଓଭରପାସ୍ ରାସ୍ତାଦେଇ ଚଳପ୍ରଚଳ କରିବେ ହାତୀ। ଫଳରେ ହ୍ରାସ ପାଇବ ରେଳଧାରଣାରେ ଟ୍ରେନ୍ ଧକ୍କାଜନିତ ହାତୀମୃତ୍ୟୁ। ହାତୀ ପାଇଁ ପ୍ରସିଦ୍ଧ ଢେଙ୍କାନାଳ ଜିଲାର କପିଳାସ ଅଭୟାରଣ୍ୟରେ ଏଭଳି ଅଭିନବ ପ୍ରକଳ୍ପ କାମ ଖୁବ୍ଶୀଘ୍ର ଆରମ୍ଭ ହେବ। ନ୍ୟାଶନାଲ ବୋର୍ଡ ଅଫ୍ ୱାଇଲ୍ଡ ଲାଇଫ୍ (ଏନ୍ବିଡବ୍ଲ୍ୟୁଏଲ୍) ପକ୍ଷରୁ ଏଥିଲାଗି ମଞ୍ଜୁରୀ ମିଳିବା ପରେ ସର୍ଭେ କାର୍ଯ୍ୟ ସରିଛି। ଅଭୟାରଣ୍ୟରେ ବନ୍ୟଜନ୍ତୁଙ୍କ ଜୀବନ ସୁରକ୍ଷିତ ରଖିବାକୁ ଏଭଳି ପାଇଲଟ୍ ପ୍ରକଳ୍ପ ଭାରତରେ ପ୍ରଥମ। କପିଳାସ ଅଭୟାରଣ୍ୟ ସମେତ ବିହାର ରାଜ୍ୟର ଏକ ସଂରକ୍ଷିତ ଜଙ୍ଗଲରେ ଏହାକୁ କାର୍ଯ୍ୟକାରୀ କରାଯିବ। କପିଳାସ ଅଭୟାରଣ୍ୟରେ ହେବାକୁ ଥିବା ପ୍ରକଳ୍ପରେ ରେଳପଥ ୪ ଲାଇନ୍ (୨ଟି ଅପ୍ ଓ ୨ଟି ଡାଉନ୍) ବିଶିଷ୍ଟ ହେବ। ଢେଙ୍କାନାଳରୁ କଟକ ଜିଲା ଆଠଗଡ଼ ବନଖଣ୍ଡର ଖୁଣ୍ଟୁଣୀକୁ ବ୍ୟାପିଛି କପିଳାସ ଅଭୟାରଣ୍ୟ। ଏହି ସଂରକ୍ଷିତ ଜଙ୍ଗଲ ମଧ୍ୟ ଦେଇଯାଇଛି ଭୁବନେଶ୍ୱର-ଢେଙ୍କାନାଳ-ତାଳଚେର-ଅନୁଗୋଳ-ସମ୍ବଲପୁର ରେଳପଥ। ତେବେ ଚନ୍ଦକାରୁ ଆଠଗଡ଼ ବନଖଣ୍ଡ ଦେଇ କପିଳାସ ଅଭୟାରଣ୍ୟକୁ ପ୍ରବେଶ କରୁଥିବା ଏବଂ କପିଳାସରୁ ଆଠଗଡ଼ ବନଖଣ୍ଡକୁ ଚଳପ୍ରଚଳ କରୁଥିବା ହାତୀପଲ ପାଇଁ ବିପଜ୍ଜନକ ସାଜିଛି ଏହି ରେଳଧାରଣା। ଅନେକ ସମୟରେ ଟ୍ରେନ୍ ଧକ୍କାରେ ହାତୀମୃତ୍ୟୁ ଘଟୁଛି। ଏହା ଏକ ସମ୍ବେଦନଶୀଳ ପ୍ରସଙ୍ଗ ହୋଇଥିବାରୁ ଗତ ଡିସେମ୍ବର ୩୧ରେ ଏନ୍ବିଡବ୍ଲ୍ୟୁଏଲ୍ର ୬୬ତମ ବୈଠକରେ କପିଳାସ ଓଭରପାସ୍ ପ୍ରକଳ୍ପକୁ ଅନୁମୋଦନ ମିଳିଥିଲା। କଟକ ଜିଲା ରାଜଆଠଗଡ଼ ରେଳ ଷ୍ଟେଶନରୁ ଢେଙ୍କାନାଳ ଜିଲା ଗୋବିନ୍ଦପୁରସ୍ଥିତ ଯୋରନ୍ଦାରୋଡ୍ ରେଳ ଷ୍ଟେଶନ ମଧ୍ୟରେ ଏହି ଓଭରପାସ୍ ନିର୍ମାଣ ହେବ। ଓଭରପାସ୍ ନିର୍ମାଣ ହେଲେ ରେଳଧାରଣାର ଗୋଟିଏ ପାର୍ଶ୍ୱରୁ ଅନ୍ୟପାର୍ଶ୍ୱକୁ ହାତୀପଲ ସହଜରେ ଚଳପ୍ରଚଳ କରିପାରିବେ ବୋଲି ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି ସୂଚନା ଦେଇଛନ୍ତି।
