କଲ୍ୟାଣସିଂହପୁର,୨୫।୮(ଦୀପକ କୁମାର ପରିଡ଼ା): ରାୟଗଡ଼ା ଜିଲା କାଶୀପୁର ବ୍ଲକ କଣ୍ଟାମାଳ ଗ୍ରାମରେ ଘଟିଥିବା ବହୁଚର୍ଚ୍ଚିତ ପୋଲିସ-ଜନତା ସଂଘର୍ଷ ଘଟଣାରେ ତଦନ୍ତ ପ୍ରକ୍ରିୟା ତ୍ୱରାନ୍ୱିତ ହୋଇଛି। ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଆଜି ରାୟଗଡ଼ା ଏସ୍ପି ଶ୍ରୀ ରାଜ ପ୍ରସାଦ କଣ୍ଟାମାଳ ଓ ଶାଗବାରୀ ଗ୍ରାମ ଗସ୍ତ କରି ସ୍ଥାନୀୟ ଲୋକଙ୍କ ସହ ଆଲୋଚନା କରିବା ସହ ଘଟଣାର ସରଜମିନ ତଦନ୍ତ କରିଛନ୍ତି।
ସୂଚନାଯୋଗ୍ୟ ଯେ, ଗତ ଏପ୍ରିଲ ୬ ତାରିଖରେ ଏକ ୱାରେଣ୍ଟ ବଳରେ ଜଣେ ବ୍ୟକ୍ତିଙ୍କୁ ଗିରଫ କରିବାକୁ ଯାଇଥିବା ବେଳେ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଖଣ୍ଡଯୁଦ୍ଧ ଘଟିଥିଲା। ଏଥିରେ ଉଭୟ ପକ୍ଷରୁ ଅନେକ ଲୋକ ଆହତ ହୋଇଥିଲେ। ଏହି ଘଟଣାର ନିରପେକ୍ଷ ତଦନ୍ତ ପାଇଁ ହାଇକୋର୍ଟ ସ୍ପଷ୍ଟ ନିର୍ଦ୍ଦେଶ ଦେଇଥିଲେ।
ତଦନ୍ତ ବେଳେ ସୁଙ୍ଗେର ସରପଞ୍ଚଙ୍କ ଉପସ୍ଥିତିରେ ଏସ୍ପି ବିଭିନ୍ନ ତଥ୍ୟ ସଂଗ୍ରହ କରିଥିଲେ ହେଁ, ତାଙ୍କର ଏହି ଗସ୍ତକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ବିନା ପୂର୍ବ ସୂଚନାରେ ଆସିବା, ଗ୍ରାମବାସୀଙ୍କ ପାଲଟା ଅଭିଯୋଗ ଉପରେ ପର୍ଯ୍ୟାପ୍ତ ଆଲୋଚନା ନକରିବା ଏବଂ ଭିଜିଟର୍ ନୋଟ୍ରେ ଦସ୍ତଖତ ନକରି ଚାଲିଯିବାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ କ୍ଷୋଭ ଦେଖାଦେଇଛି। ମାମଲାଟି ହାଇକୋର୍ଟଙ୍କ ପ୍ରତ୍ୟକ୍ଷ ନଜରରେ ଥିବାରୁ ଏହି ତଦନ୍ତ ମାଧ୍ୟମରେ ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି ଅଞ୍ଚଳରେ ଚର୍ଚ୍ଚା ହେଉଛି।
