ପ୍ରସିଦ୍ଧ କଙ୍ଗନା ରାଣାୱତ ନିଜ ବିବାଦୀୟ ମନ୍ତବ୍ୟ ପାଇଁ ସର୍ବଦା ଚର୍ଚ୍ଚାରେ ଥାନ୍ତି। କୃଷି ଆଇନ ପ୍ରତ୍ୟାହାର ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିଷ୍ପତ୍ତିକୁ ଲଜ୍ଜାଜନକ ବୋଲି କହି କଙ୍ଗନା ଏକ ବିବାଦୀୟ ବିବୃତ୍ତି ଦେଇଛନ୍ତି। କୃଷି ଆଇନ ପ୍ରତ୍ୟାହାର ନେଇ କଙ୍ଗନା ଭାରତକୁ ଏକ ‘ଜିହାଦୀ ରାଷ୍ଟ୍ର’ ସହ ତୁଳନା କରିଛନ୍ତି। ରାଷ୍ଟ୍ରକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦି ଆଜି ତିନୋଟି କୃଷି ଆଇନ ପ୍ରତ୍ୟାହାର ଘୋଷଣା କରିଛନ୍ତି।
କଙ୍ଗନା ଇନଷ୍ଟାଗ୍ରାମର ଷ୍ଟାଟସ ଅପଲୋଡ କରି କ୍ରମାଗତ ଭାବରେ ବିବଦୀୟ ମନ୍ତବ୍ୟ ଦେଉଛନ୍ତି। ଇନଷ୍ଟା ଷ୍ଟୋରୀରେ କୃଷି ଆଇନ ପ୍ରତ୍ୟାହାରକୁ ଦୁଃଖଦାୟକ ଏବଂ ଲଜ୍ଜାଜନକ ବୋଲି କହି କଙ୍ଗନା ଲେଖିଛନ୍ତି ଯେ, ଯଦି ରାସ୍ତାରେ ଲୋକମାନେ ସଂସଦରେ ନିର୍ବାଚିତ ସରକାରଙ୍କ ବଦଳରେ ଆଇନ ପ୍ରଣୟନ କରିବା ଆରମ୍ଭ କରନ୍ତି, ତେବେ ଏହା ଏକ ଜିହାଦୀ ରାଷ୍ଟ୍ର। ଯେଉଁମାନେ ଏହା ଚାହୁଁଛନ୍ତି ସେମାନଙ୍କୁ ଅଭିନନ୍ଦନ।
ସୂଚନାଯୋଗ୍ୟ, ପ୍ରଧାନମନ୍ତ୍ରୀ ମୋଦି କହିଛନ୍ତି, କୃଷିର ଉନ୍ନତି ପାଇଁ ତିନୋଟି ଆଇନ ଅଣାଯାଇଥିଲା। ଯାହାଦ୍ୱାରା କ୍ଷୁଦ୍ର ଚାଷୀମାନେ ଅଧିକ ଶକ୍ତି ପାଇବେ। ବର୍ଷ ବର୍ଷ ଧରି ଏହି ଚାହିଦା ଦେଶର କୃଷକ ଏବଂ ବିଶେଷଜ୍ଞ, ଅର୍ଥନୀତିଜ୍ଞଙ୍କ ଦ୍ୱାରା ଦାବି କରାଯାଉଥିଲା। ଯେତେବେଳେ ଏହି ଆଇନଗୁଡ଼ିକ ଅଣାଯାଇଥିଲା, ସଂସଦରେ ଆଲୋଚନା ହୋଇଥିଲା। ଦେଶର କୃଷକ ଏବଂ ସଂଗଠନ ଏହାକୁ ସ୍ବାଗତ କରିଥିଲେ, ଏହାକୁ ସମର୍ଥନ କରିଥିଲେ। ଆମ ସରକାର ଦେଶର କୃଷି ଜଗତର ସ୍ବାର୍ଥରେ ଏହି ନିୟମ ଆଣିଥିଲେ। କିନ୍ତୁ ଆମେ ଏପରି ଏକ ପବିତ୍ର ନିୟମକୁ କିଛି କୃଷକଙ୍କୁ ସମ୍ପୂର୍ଣ୍ଣ ଭାବରେ ବୁଝାଇ ପାରିଲୁ ନାହିଁ। ଆମେ ପ୍ରଥମେ ବୁଝାଇବାକୁ ଚେଷ୍ଟା କଲୁ। ଏହି ମାମଲା ସୁପ୍ରିମକୋର୍ଟକୁ ମଧ୍ୟ ଯାଇଥିଲା। ଏବେ ଆମେ କୃଷି ଆଇନ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛୁ। ଏଥିସହିତ ପ୍ରଧାନମନ୍ତ୍ରୀ ମୋଦି କୃଷକମାନଙ୍କୁ ନିବେଦନ କରିଛନ୍ତି, ଆପଣ ନିଜ ଘରକୁ ଫେରିଯାଆନ୍ତୁ, ଏକ ନୂତନ ଆରମ୍ଭ କରନ୍ତୁ।
