ମୁମ୍ବାଇ: ଏବେ ଫିଲ୍ମ ‘ଚନ୍ଦ୍ରମୁଖୀ ୨’ ସହିତ ବଲିଉଡ ଅଭିନେତ୍ରୀ କଙ୍ଗନା ରାନାଓ୍ବତ ବକ୍ସ ଅଫିସରେ ଧମାଲ କରୁଛନ୍ତି। ତାଙ୍କ ଅଭିନୀତ ଫିଲ୍ମ ‘ତେଜସ’ ଅକ୍ଟୋବରରେ ମୁକ୍ତିଲାଭ କରିବ ଯେଉଁଥିରେ ଅଭିନେତ୍ରୀ ପୁଣି ଥରେ ଏକ ଦମଦାର ଚରିତ୍ରରେ ଅଭିନୟ କରିବେ। କଙ୍ଗନାଙ୍କୁ ବାୟୁସେନା ପାଇଲଟ ଭୂମିକାରେ ଦେଖିବାକୁ ମିଳିବ। ଫିଲ୍ମରୁ ତାଙ୍କର ପ୍ରଥମ ଲୁକ ସାମ୍ନାକୁ ଆସିଛି ଏବଂ ବର୍ତ୍ତମାନ ଟିଜର ଆସିବା ବାକି ରହିଛି।
ସର୍ଭେଶ ମେୱାରଙ୍କ ନିର୍ଦ୍ଦେଶିତ ଫିଲ୍ମ ‘ତେଜସ’ରେ ପାଇଲଟ ତେଜସ ଗିଲ ଭୂମିକାରେ ନଜର ଆସିବେ କଙ୍ଗନା। ଅଭିନେତ୍ରୀ ଟିଜର ରିଲିଜ ଡେଟ ଘୋଷଣା କରିଛନ୍ତି। ଏହା ସହିତ ପ୍ରଶଂସକମାନେ ଫିଲ୍ମର ନାମ ପରିବର୍ତ୍ତନ କରିବାକୁ ଦାବି କରିଛନ୍ତି ବୋଲି ମଧ୍ୟ କୁହାଯାଇଛି।
ଆକର୍ଷଣୀୟ ପ୍ରଥମ ଲୁକ ସହିତ ପ୍ରଶଂସକଙ୍କୁ ମନୋରଞ୍ଜନ କରିବା ପରେ କଙ୍ଗନା ରାନାୱତଙ୍କ ତେଜସ ମୁଭିର ଟିଜର ନ୍ୟାଶନାଲ ହଲିଡେ ଗାନ୍ଧୀ ଜୟନ୍ତୀରେ ମୁକ୍ତିଲାଭ କରିବ।
କଙ୍ଗନା ଇନଷ୍ଟାଗ୍ରାମ ଷ୍ଟୋରୀରେ ସୂଚନା ଦେଇଛନ୍ତି ଯେ ଫିଲ୍ମର ଟିଜର ଅକ୍ଟୋବର ୨ରେ ମୁକ୍ତିଲାଭ କରିବ। ସେ ଏହି ଫିଲ୍ମରୁ ତାଙ୍କ ଲୁକର ଏକ ଫଟୋ ସେୟାର କରିଛନ୍ତି ଯେଉଁଥିରେ ଲେଖାଯାଇଛି ଯେ ‘ତେଜସ’ର ନାମକୁ ‘ଉରି ୨’ରେ ପରିବର୍ତ୍ତନ କରିବାକୁ ପ୍ରଶଂସକମାନେ ଦାବି କରିଛନ୍ତି।
କଙ୍ଗନା ରାନାୱତର ଏହି ବହୁ ପ୍ରତୀକ୍ଷିତ ମୁଭି ୨୦ ଅକ୍ଟୋବରରେ ରିଲିଜ ହେବ। ଏହି ମୁଭିରେ ‘ଗଣପତ’, ‘ଟାଇଗର ନାଗେଶ୍ୱର ରାଓ’ ଏବଂ ‘ୟାରିୟାଂ ୨’ ସହିତ ସିଧାସଳଖ ଟକ୍କର ରହିଛି। ‘ତେଜସ’ ହେଉଛି ପ୍ରଥମ ହଓ୍ବାଇ ଆକ୍ସନ ଫିଲ୍ମ, ଯେଉଁଥିରେ ବାୟୁସେନା ଅଧିକାରୀ ତେଜସ ଗିଲଙ୍କ କାହାଣୀ ଏବଂ ଅନେକ ଆହ୍ବାନର ସମ୍ମୁଖୀନ ହେବାବେଳେ ଆମର ବାୟୁସେନା ପାଇଲଟ କିପରି ନିରନ୍ତର ଭାବରେ କାର୍ଯ୍ୟ କରିଥିଲେ ତାହା ଚିତ୍ରଣ କରାଯାଇଛି।
