ବ୍ରହ୍ମପୁର ଅଫିସ୍,୨୨ା୫: ଅନ୍ତର୍ଜାତୀୟ କଳା ସଂସ୍କୃତି ଚଳଚ୍ଚିତ୍ର ମହୋତ୍ସବରେ ବ୍ରହ୍ମପୁରର କଣ୍ଢେଇ ଯାତ୍ରା ଚଳଚ୍ଚିତ୍ର ସଫଳତା ହାସଲ କରିଛି। ଏହି ଚଳଚ୍ଚିତ୍ର ଭିନ୍ନତା ତଥା ସ୍ବତନ୍ତ୍ରତାକୁ ଅନୁଭବ କରି ଶ୍ରେଷ୍ଠ କ୍ରିଟିକ୍ସ ଚଏସ୍ ଆୱାର୍ଡ ପାଇଥିବା ଚଳଚ୍ଚିତ୍ର ନିର୍ଦ୍ଦେଶକ ସନ୍ନ୍ୟାସୀ ମହାରଣା ସୂଚନା ଦେଇଛନ୍ତି। ଶୁକ୍ରବାର ଆମେରିକାଠାରେ ଆୟୋଜିତ ଚଳଚ୍ଚିତ୍ର ମହୋତ୍ସବରେ ଅନ୍ଲାଇନ୍ ମାଧ୍ୟମରେ ୨ ହଜାରରୁ ଊର୍ଦ୍ଧ୍ୱ ଚଳଚ୍ଚିତ୍ର ୧୯୫ ଦେଶରେ ପ୍ରଦର୍ଶିତ ହୋଇଥିଲା। ଏଥିରେ ବ୍ରହ୍ମପୁର ସହରର ୩୦୦ ବର୍ଷ ପୁରୁଣା କଳା ସଂସ୍କୃତିସମ୍ପନ୍ନ ଲୋକାଭିମୁଖୀ ଥିବା କଣ୍ଢେଇ ଯାତ୍ରା ବିଶେଷାଙ୍କର ଚିତ୍ରଣ ଦର୍ଶକ ଏବଂ ବିଚାରକଙ୍କୁ ମନ୍ତ୍ରମୁଗ୍ଧ କରିଥିଲା। ତେବେ ଏହି ଚଳଚ୍ଚିତ୍ର ନିର୍ମାଣରେ ନିୟୋଜିତ ସମ୍ପୂର୍ଣ୍ଣ ଟିମ୍କୁ ଶନିବାର ବ୍ରହ୍ମପୁର ସମେତ ସାରା ଓଡ଼ିଶା ଓ ଦେଶବିଦେଶରୁ ଅନେକ ସିନେଜଗତ ସହିତ ଜଡିତ ବ୍ୟକ୍ତିତ୍ୱ ଅନେକ ଶୁଭେଚ୍ଛା ଜଣାଇଛନ୍ତି। ଏହି ଚଳଚ୍ଚିତ୍ର ନିର୍ମାଣ ପାଇଁ ତ୍ରିପତି ନାୟକ ମାର୍ଗଦର୍ଶନ ଦେଇଥିଲେ। ଏଥିସହ ଚିତ୍ରୋତ୍ତୋଳନରେ ଟୁଟୁ ପ୍ରଧାନ, ପୋଷ୍ଟର ଡିଜାଇନରେ ଟିକିରି ବେହେରା, ସମ୍ପାଦନା ରିପନ ଓ ଜ୍ୟୋତିର୍ମୟୀ ପାତ୍ରଙ୍କ ପ୍ରଚ୍ଛଦ କଣ୍ଠ ସଂଯୋଜନା ଭିନ୍ନତା ପାଇଁ ସ୍ବତନ୍ତ୍ର ବିଚାରକ ପସନ୍ଦ ବିଭାଗରେ ଶ୍ରେଷ୍ଠ ପ୍ରତିପାଦିତ ହୋଇପାରିଛି। ଆଗାମୀ ଦିନରେ କଣ୍ଢେଇ ଯାତ୍ରା ଅଶୋକା ଜାତୀୟ ଚଳଚ୍ଚିତ୍ର ମହୋତ୍ସବ ଭଳି ଜାତୀୟସ୍ତରର ଏକ ନାମୀ ଚଳଚ୍ଚିତ୍ର ମହୋତ୍ସବ ପାଇଁ ମନୋନୟନ ପ୍ରକ୍ରିୟାରେ ଥିବା ନିର୍ଦ୍ଦେଶକ ସନ୍ନ୍ୟାସୀ ମହାରଣା ସୂଚନା ଦେଇଛନ୍ତି।
