ଢେଙ୍କାନାଳ ଅଫିସ,୧୧ା୨: ଜୈବ ବିବିଧତାରେ ଭରପୂର ଢେଙ୍କାନାଳ ଜିଲାର ସଂରକ୍ଷିତ ଜଙ୍ଗଲରେ ଦୀର୍ଘବର୍ଷ ହେଲା ବିଳୁପ୍ତ ହୋଇଯାଇଛି ମହାବଳ ବଂଶ। ଏହାର ଅଭାବକୁ ଏବେ ପୂରଣ କରୁଛନ୍ତି କଲରାପତରିଆ। ସାତକୋଶିଆ ସୀମାନ୍ତ ହିନ୍ଦୋଳ ରେଞ୍ଜ୍ର କୋଇ ଏବଂ କନ୍ଧରା ସଂରକ୍ଷିତ ଜଙ୍ଗଲ ଏବେ ଏମାନଙ୍କ ମୁଖ୍ୟ ବିଚରଣ ସ୍ଥଳୀ ପାଲଟିଛି। ତେବେ ମାଂସଲୋଭୀ ଶିକାରୀଙ୍କ ଫାଶ କଲରାପତରିଆଙ୍କ ପାଇଁ ବିପଦ ସାଜିଥିବାବେଳେ ବନ ବିଭାଗ ପକ୍ଷରୁ ସମ୍ପୃକ୍ତ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।
ଗତବର୍ଷ ବାଘ ଗଣନାରୁ ଜିଲାର ବିଭିନ୍ନ ଜଙ୍ଗଲରେ ୭ଟି କଲରାପତରିଆ ଥିବା ଜଣାପଡ଼ିଥିଲା। ଚଳିତବର୍ଷ ଏହି ସଂଖ୍ୟା ୯କୁ ବୃଦ୍ଧି ପାଇଥିବା ଏକ ନିର୍ଭରଯୋଗ୍ୟ ସୂତ୍ରରୁ ଜଣାପଡ଼ିଛି। ତେବେ ପୁନର୍ବାର ଗଣନା କରାଗଲେ ଏମାନଙ୍କ ପ୍ରକୃତ ସଂଖ୍ୟା କେତେ, ତାହା ଜଣାପଡ଼ିବ ବୋଲି ବନ ବିଭାଗ ପକ୍ଷରୁ କୁହାଯାଇଛି। ସାତକୋଶିଆ ସୀମାନ୍ତ ଘଞ୍ଚ କୋଇ ସଂରକ୍ଷିତ ଜଙ୍ଗଲରେ ଅଧିକାଂଶ ସମୟରେ କଲରାପତରିଆ ବିଚରଣ କରୁଥିବା ବେଳେ ଟ୍ରାପ୍ କ୍ୟାମେରାରେ ସେମାନଙ୍କ ଗତିବିଧି କଏଦ ହେଉଛି। ଜଙ୍ଗଲ ଚତୁଃପାର୍ଶ୍ୱରେ ୧୦ ଗ୍ରାମ ଥିବାବେଳେ ସମ୍ପୃକ୍ତ ଅଞ୍ଚଳବାସୀ ବାଘଙ୍କ ଗର୍ଜନ ଶୁଣୁଥିବା କହିଛନ୍ତି। ତେବେ ଶିକାରୀଙ୍କ ଉପଦ୍ରବ ଏବେ ଏହି ପ୍ରଜାତିର ବାଘଙ୍କ ପାଇଁ ବିପଦ ପାଲଟିଛି। ନିକଟରେ କୋଇ ସଂରକ୍ଷିତ ଜଙ୍ଗଲର କୋର୍ ଅଞ୍ଚଳରୁ ପଳାଇ ଆସିଥିବା ଏକ ବାଘ ଶିକାରୀଙ୍କ ବାର୍ହା ଫାଶରେ ପଡ଼ି ମରିଥିଲା। ସେହିପରି ଅସୁସ୍ଥତା କାରଣରୁ ଅନ୍ୟ ଏକ ବାଘର ମୃତ୍ୟୁ ଘଟିଥିଲା। ଲଗାତର ଦୁଇଟି ବାଘମୃତ୍ୟୁ ପରେ ବନ ବିଭାଗ ସଜାଗ ହୋଇଉଠିଛି। କୋଇ ଏବଂ କନ୍ଧରା ସଂରକ୍ଷିତ ଜଙ୍ଗଲରେ ବିଭିନ୍ନ ପଦକ୍ଷେପ ହାତକୁ ନିଆଯାଇଛି। ତୃଣଭୋଜୀଙ୍କ ସଂଖ୍ୟା ବଢ଼ିଲେ ସମାନ୍ତରାଳ ଭାବେ ବାଘଙ୍କ ସଂଖ୍ୟା ବଢ଼ିବ। ବିଶେଷ କରି ହରିଣ, କୁଟୁରା ସଂଖ୍ୟା ବୃଦ୍ଧି କରିବା ଲାଗି ଜଙ୍ଗଲରେ ଘାସ ଲଗାଯିବ। କୋଇ ସଂରକ୍ଷିତ ଜଙ୍ଗଲରେ ବନ୍ୟପ୍ରାଣୀଙ୍କ ଗତିବିଧି ଉପରେ ନଜର ରଖିବାକୁ ଏକ ଓ୍ବାଚ୍ ଟାଓ୍ବାର ନିର୍ମାଣ କରାଯିବ। ପାଟ୍ରୋଲିଂ କଡ଼ାକଡ଼ି କରାଯିବା ସହ ଆଭ୍ୟନ୍ତରୀଣ ଜଙ୍ଗଲରେ ଅଧିକ ଟ୍ରାପ୍ କ୍ୟାମେରା ଲଗାଯିବ। ପାଣି ଅଭାବ ଦୂର କରିବା ଲାଗି ମୃତ୍ତିକା ସଂରକ୍ଷଣ ବିଭାଗ ଜରିଆରେ ଜଳାଶୟ ଖନନ କରାଯିବ। ଏହାକୁ ବାଦ୍ଦେଲେ ବନ୍ୟପ୍ରାଣୀଙ୍କ ସୁରକ୍ଷା ଏବଂ ନିଅଁା ଦାଉରୁ ଜଙ୍ଗଲକୁ ସୁରକ୍ଷା ଦେବା ଲାଗି ସ୍ଥାନୀୟ ବାସିନ୍ଦାଙ୍କୁ ସଚେତନ କରାଯାଉଥିବା ଡିଏଫ୍ଓ ଡ. ପ୍ରକାଶଚାନ୍ଦ ଗୋଗିନେନି ସୂଚନା ଦେଇଛନ୍ତି।
