କୋରାପୁଟ,୧୦।୬ (ଅମିତାଭ ବେହେରା): କୋରାପୁଟରେ ବଣଭୋଜି ବେଳେ ଏକ ଦୁଃଖଦ ଅଘଟଣ ଘଟିଛି। କାଳବୈଶାଖୀ ପ୍ରଭାବରେ ପ୍ରବଳ ପବନ ବହିବା ସମୟରେ ଗଛର ଏକ ବଡ଼ ଡାଳ ଭାଙ୍ଗି ପଡ଼ିବାରୁ ଜଣେ ମହିଳାଙ୍କ ମୃତ୍ୟୁ ଘଟିଛି। ମୃତକ ହେଲେ କୋରାପୁଟ ମୁନିସିପାଲିଟିର ପିଏଚଡ଼ି କଲୋନୀର ବାସିନ୍ଦା ସୁଶାନ୍ତ ସାହୁଙ୍କ ସହଧର୍ମିଣୀ କନିକା ସାହୁ (୩୫)।
ସୂଚନା ଅନୁସାରେ, କୋରାପୁଟ ମୁନିସିପାଲିଟିର ପିଏଚଡ଼ି କଲୋନୀର ସୁଶାନ୍ତ କୁମାର ସାହୁଙ୍କ ପରିବାର ବୁଧବାର ଅପରାହ୍ନରେ ଦୟାନିଧିଗୁଡ଼ା ନିକଟସ୍ଥ ଜଙ୍ଗଲକୁ ବଣଭୋଜି ପାଇଁ ଯାଇଥିଲେ। ରୋଷେଇ କାମ ଶେଷ ହେବା ପରେ ସମସ୍ତେ ଖାଦ୍ୟ ଗ୍ରହଣ ପାଇଁ ପ୍ରସ୍ତୁତି ଚଳାଇଥିବା ବେଳେ ହଠାତ୍ କାଳବୈଶାଖୀ ପ୍ରଭାବରେ ପ୍ରବଳ ପବନ ବହିଥିଲା। ଏହି ସମୟରେ ଏକ ବିରାଟ ଗଛ ଡାଳ ଭାଙ୍ଗି ଅନିକାଙ୍କ ଉପରେ ପଡ଼ିଥିଲା। ଫଳରେ ସେ ଗୁରୁତର ଆହତ ହୋଇ ଘଟଣାସ୍ଥଳରେ ଅଚେତ ହୋଇପଡ଼ିଥିଲେ। ପରିବାର ଲୋକେ ତାଙ୍କୁ ତୁରନ୍ତ କୋରାପୁଟ ଜିଲ୍ଲା ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲକୁ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ବର୍ତ୍ତମାନ ମୃତଦେହ କୋରାପୁଟ ମୃତଦେହ ବ୍ୟବଚ୍ଛେଦ ଗୃହରେ ରଖାଯାଇଥିବା ବେଳେ ଗୁରୁବାର ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ଜଣାପଡ଼ିଛି। ଏହି ଅକାଳ ବିୟୋଗ ପରେ ପରିବାର ଓ ଅଞ୍ଚଳରେ ଶୋକର ଛାୟା ଖେଳିଯାଇଛି।
