ଢେଙ୍କାନାଳ ଅଫିସ, ୧।୧୧: ଢେଙ୍କାନାଳ ସହରସ୍ଥିତ ମହିଷାପାଟ ପଲ୍ଲିଶ୍ରୀ ମେଳା ପଡ଼ିଆରେ ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଓ ଜିଲା ପ୍ରଶାସନର ମିଳିତ ଆନୁକୂଲ୍ୟରେ ସୋମବାର ଜିଲାସ୍ତରୀୟ ନିଯୁକ୍ତି ମେଳା ଅନୁଷ୍ଠିତ ହୋଇଯାଇଛି। ଢେଙ୍କାନାଳ ସଦର, ହିନ୍ଦୋଳ, ଗଁଦିଆ, ଓଡ଼ାପଡା ସମେତ ବିଭିନ୍ନ ବ୍ଲକରୁ ୧,୩୪୬ ଆଶାୟୀ ସେମାନଙ୍କ ନାମ ପଞ୍ଜୀକରଣ କରିଥିଲେ। ୩୪ ନିଯୁକ୍ତି ପ୍ରଦାନକାରୀ ସଂସ୍ଥା ଯୋଗଦେଇଥିଲେ। ୫ମରୁ ସ୍ନାତକ ପାସ୍, ବିଟେକ୍, ଏମ୍ବିଏ ଛାତ୍ରୀଛାତ୍ରଙ୍କ ପାଇଁ ନିଯୁକ୍ତି ସୁଯୋଗ ରହିଥିଲା। କେତେଜଣ ତାଲିମଧାରୀ ପିଲାଙ୍କୁ ତତ୍କାଳ ନିଯୁକ୍ତି ପ୍ରମାଣପତ୍ର ପ୍ରଦାନ କରାଯାଇଥିଲା। ଏମ୍ପି ମହେଶ ସାହୁ ମୁଖ୍ୟ ଅତିଥି ଭାବେ ଯୋଗଦେଇ ଏହାର ଶୁଭାରମ୍ଭ କରିଥିଲେ। ଜିଲାର ବେକାର ଯୁବତୀ ଯୁବକଙ୍କୁ ଯୋଗ୍ୟତା ଅନୁଯାୟୀ ଦକ୍ଷତା ବିକାଶ କରାଇ ନିଯୁକ୍ତି ଦେବା, ସେମାନେ କିଭଳି ଆତ୍ମନିର୍ଭରଶୀଳ ହୋଇପାରିବେ ସେ ଦିଗରେ କମ୍ପାନୀ କର୍ତ୍ତୃପକ୍ଷ, ଜନ ପ୍ରତିନିଧି, ପ୍ରଶାସନ ଏକାଠି ହୋଇ କାର୍ଯ୍ୟ କରିବା ଉଚିତ। ଆତ୍ମନିର୍ଭର ହେବା ଲାଗି ବ୍ୟାଙ୍କ ଋଣର ସୁଯୋଗ ସୃଷ୍ଟି କରିବା ଆବଶ୍ୟକ। ବ୍ୟାଙ୍କ କର୍ତ୍ତୃପକ୍ଷ ସକାରାତ୍ମକ ମନୋଭାବ ପ୍ରଦର୍ଶନ କରିବା ଜରୁରୀ। ନିଯୁକ୍ତି ପ୍ରକ୍ରିୟାରେ ସାମିଲ ହୋଇଥିବା କମ୍ପାନୀ ସେମାନଙ୍କ ମାନସିକତାରେ ପରିବର୍ତ୍ତନ ଆଣିବା ଜରୁରୀ। ସକାରାତ୍ମକ ମନୋଭାବ ନେଇ ନିଯୁକ୍ତି ପ୍ରଦାନ ନ କଲେ ଲୋକମାନେ ତାତିବେ। ଲୋକେ ତାତିଲେ ପରିସ୍ଥିତି ଜଟିଳ ହେବ ବୋଲି ଏମ୍ପି କହିଥିଲେ। ସମ୍ମାନିତ ଅତିଥି ଭାବେ ଜିଲା ପରିଷଦ ସଭାନେତ୍ରୀ ଅର୍ଚ୍ଚନା ପୁହାଣ, ଉପସଭାପତି ବିଳାସିନୀ ସେଠୀ ପ୍ରମୁଖ ଯୋଗଦେଇ ଯୁବତୀଯୁବକଙ୍କୁ ଆତ୍ମନିର୍ଭରଶୀଳ କରିବା ଲାଗି ସୁଯୋଗ ସୃଷ୍ଟି କରିବା ଉପରେ ପଦକ୍ଷେପ ନେବାକୁ ପରାମର୍ଶ ଦେଇଥିଲେ।
ମେଳାରେ ସଭାପତିତ୍ୱ କରି ଜିଲାପାଳ ସରୋଜ ସେଠୀ କହିଲେ, ଆସନ୍ତା ୧ ତାରିଖରେ ପରଜଙ୍ଗରେ ଅନ୍ୟ ଏକ ଜିଲାସ୍ତରୀୟ ନିଯୁକ୍ତି ମେଳା ଅନୁଷ୍ଠିତ ହେବ। ସବୁ ବ୍ଲକର ବେକାର ଯୁବତୀଯୁବକ ଏଭଳି ମେଳାର ସୁଯୋଗ ନେବା ଉଚିତ ବୋଲି ସେ କହିଥିଲେ।
ଅତିରିକ୍ତ ଜିଲାପାଳ (ସାଧାରଣ) ରମେଶ ଚନ୍ଦ୍ର ସେଠୀ, ଜିଲା ପରିଷଦ ମୁଖ୍ୟ କାର୍ଯ୍ୟନିର୍ବାହୀ ତନ୍ମୟ କୁମାର ଦରୱାନ, ଅତିରିକ୍ତ ମୁଖ୍ୟ କାର୍ଯ୍ୟନିର୍ବାହୀ ସରୋଜ କୁମାର ଦତ୍ତ ପ୍ରମୁଖ ମଞ୍ଚାସୀନ ଥିଲେ। ଜିଲା ନିୟୋଜନ ଅଧିକାରୀ କେ. ରୋଜା ଦୋରା ପ୍ରାରମ୍ଭିକ ସୂଚନା ପ୍ରଦାନ କରି କହିଲେ, ଜିଲାର ବେକାର ଯୁବତୀଯୁବକଙ୍କୁ ତାଲିମ ପ୍ରଦାନ କରି ନିଯୁକ୍ତି ସୁଯୋଗ ସୃଷ୍ଟି କରିବା ନିମନ୍ତେ ଦକ୍ଷତାବିକାଶ ପ୍ରାଧିକରଣ ପକ୍ଷରୁ ଦୁଇଟି କେନ୍ଦ୍ର ରହିଛି। ଶ୍ୟାମାଚରଣପୁର କେନ୍ଦ୍ରରେ ୧୧୧ ଏବଂ କଣ୍ଟାନାଳୀ ବାଇପାସ୍ କେନ୍ଦ୍ରରେ ୩୦ ଛାତ୍ରୀଛାତ୍ର ପ୍ରଶିକ୍ଷଣ ନେଇ ବିଭିନ୍ନ ସଂସ୍ଥାରେ ନିଯୁକ୍ତି ପାଇଛନ୍ତି। କାର୍ଯ୍ୟକ୍ରମକୁ ସଙ୍ଗୀତା ଦାସ, ସୁଶାନ୍ତ ପାଣି ସଂଯୋଜନା କରିଥିଲେ।
