ଭୁବନେଶ୍ୱର,୧୧।୬:(ବ୍ୟୁରୋ): ଜ୍ୟୋତିକଳା ମନ୍ଦିର ଏବଂ କଳିଙ୍ଗ ସଂସ୍କୃତି ଓ ଐତିହ୍ୟ ସୁରକ୍ଷା ମଞ୍ଚ(କାପୋକ) ପକ୍ଷରୁ ଶନିବାର ଭଞ୍ଜକଳା ମଣ୍ଡପରେ ‘ଜେକେଏମ୍ ଓଡ଼ିଶୀ ସମ୍ମାନ’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଅନୁଷ୍ଠାନର ବାର୍ଷିକ ଉତ୍ସବ ଅବସରେ ଆୟୋଜିତ ଏହି କାର୍ଯ୍ୟକ୍ରମରେ ନୃତ୍ୟଶିଳ୍ପୀ ଅରୁଣା ମହାନ୍ତି, ସଙ୍ଗୀତଗୁରୁ ଅଖିଳ କୁମାର ଲେଙ୍କା ଓ ମର୍ଦ୍ଦଳ ବାଦକ ଗୁରୁ ବିଜୟ କମାର ବାରିକଙ୍କୁ ‘ଜେକେଏମ୍ ଓଡ଼ିଶୀ ସମ୍ମାନ’ରେ ସମ୍ମାନିତ କରାଯାଇଥିଲା। ମୁଖ୍ୟ ଅତିଥି ଭାବେ ଅବସରପ୍ରାପ୍ତ ଭାରତୀୟ ପ୍ରଶାସନିକ ସେବା ଅଧିକାରୀ ଅଶୋକ ତ୍ରିପାଠୀ, ସମ୍ମାନିତ ଅତିଥି ଭାବେ କାପୋକ ଅଧ୍ୟକ୍ଷ ସଂଗ୍ରାମ କେଶରୀ ପାଇକରାୟ, ୟୁଏସ୍ଏମ୍ଭିର ପ୍ରମୁଖ ବିଜୟ କୁମାର ଜେନା ଓ ସଙ୍ଗୀତ ଗୁରୁ ରାମହରି ଦାସ ଯୋଗଦେଇଥିଲେ। ଓଡ଼ିଶୀ ନୃତ୍ୟ ଏବଂ ଓଡ଼ିଶା ସଂସ୍କୃତିକୁ ଭଲ ପାଉଥିବା ବ୍ୟକ୍ତିତ୍ୱଙ୍କ ବିଷୟରେ ଅତିଥିମାନେ ଆଲୋଚନା କରିଥିଲେ। ଡ. ଶ୍ରୀନିବାସ ଘଟୁଆରୀ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ବିଶିଷ୍ଟ ନୃତ୍ୟଶିଳ୍ପୀଙ୍କ ଦ୍ୱାରା ପ୍ରଦର୍ଶିତ ଭୈରବୀ ପଲ୍ଲବୀ, ହରଚଣ୍ଡି, ମଣି ବିମାନେ ଗୋବିନ୍ଦ, ବାଗେଶ୍ରୀ ପଲ୍ଲବୀ ବେଶ୍ ଚିତ୍ତାକର୍ଷକ ହୋଇଥିଲା। ଜ୍ୟୋତିକଳା ମନ୍ଦିରର ନୃତ୍ୟଶିଳ୍ପୀ ଆଦ୍ୟାନ୍ସିଙ୍କ ନୃତ୍ୟ ମନଲୋଭା ହୋଇଥିବା ବେଳେ କୁନିକୁନି ନୃତ୍ୟଶିଳ୍ପୀଙ୍କ ଦ୍ୱାରା ପରିବେଷିତ ଜବାକୁସୁମ, ନୀଳାଚଳ ନିବାସମୟ, ଜନନୀ ଜନ୍ମଭୂମି ମନୋରମ ଥିଲା।
