ଝାରସୁଗୁଡ଼ା ଅଫିସ, ୧୩।୫: ଝାରସୁଗୁଡ଼ା ବିଧାନସଭା ଉପନିର୍ବାଚନରେ ବିଜୟ ମୁକୁଟ ପିନ୍ଧିଲେ ଦୀପାଳି ଦାସ। ବିପୁଳ ସଂଖ୍ୟାର ଭୋଟରେ ବିଜେଡି ପ୍ରାର୍ଥୀ ଦୀପାଳି ଦାସ ବିଜୟ ହାସଲ କରିଛନ୍ତି। ସେ ଭାଜପା ପ୍ରାର୍ଥୀ ଟଙ୍କଧର ତ୍ରିପାଠୀଙ୍କୁ ୪୮ ହଜାର ୭୨୧ ଭୋଟ୍ରେ ହରାଇଛନ୍ତି। ଗଣତି ଆରମ୍ଭରୁ ସମସ୍ତ ରାଉଣ୍ଡରେ ବିଜେଡି ଆଗରେ ରହିଥିଲା। ୧୯ ରାଉଣ୍ଡ ଗଣତି ଶେଷ ସୁଦ୍ଧା ବିଜେଡି ପ୍ରାର୍ଥୀ ଦୀପାଳି ଦାସ ୧,୦୭,୦୦୩ ଇଭିଏମ୍ ଭୋଟ୍ ଏବଂ ୧୯୫ ଖଣ୍ଡ ପୋଷ୍ଟାଲ ଭୋଟ୍ ମିଶାଇ ମୋଟ୍ ୧,୦୭,୧୯୮ ଖଣ୍ଡ ଭୋଟ୍ ପାଇଥିବାବେଳେ ଭାଜପା ପ୍ରାର୍ଥୀ ଟଙ୍କଧର ତ୍ରିପାଠୀ ୫୮,୩୮୪ ଇଭିଏମ୍ ଭୋଟ୍ ଏବଂ ୯୩ ଖଣ୍ଡ ପୋଷ୍ଟାଲ ଭୋଟ୍ ମିଶାଇ ମୋଟ୍ ୫୮,୪୭୭ ଖଣ୍ଡ ଭୋଟ୍ ପାଇଛନ୍ତି।
ସେହିପରି କଂଗ୍ରେସ ୪ ହଜାର ୪୯୬ ଖଣ୍ଡ ଭୋଟ ପାଇଛି। ସେଥି ମଧ୍ୟରୁ ୪୪୭୩ଟି ଇଭିଏମ୍ ଏବଂ ୨୩ ଖଣ୍ଡ ପୋଷ୍ଟାଲ ଭୋଟ୍ ମିଳିଛି। ୨୦୧୯ ନିର୍ବାଚନ ତୁଳନାରେ ବିଜୁ ଜନତା ଦଳ ଅଧିକ ଭୋଟ୍ ବ୍ୟବଧାନରେ ବିଜୟ ହାସଲ କରିଛି ।
ସୂଚନାଯୋଗ୍ୟ, ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କୁ ଗତ ଜାନୁୟାରୀ ୨୯ରେ ବ୍ରଜରାଜନଗରରେ ଗୁଳି କରି ହତ୍ୟାକରାଯାଇଥିଲା। ସେବେଠାରୁ ଝାରସୁଗୁଡ଼ା ବିଧାନସଭା ଆସନ ଖାଲି ପଡ଼ିଥିଲା ୨୦୧୯ ନିବାଚନରେ ଦୀପାଳିଙ୍କ ବାପା ତଥା ନବ କିଶୋର ଦାସ ଏହି ଆସନରେ ୪୫ ହଜାରରୁ ଅଧିକ ଭୋଟରେ ଭାଜପା ପ୍ରାର୍ଥୀ ଦୀନେଶ କୁମାର ଜୈନଙ୍କୁ ହରାଇଥିଲେ।
