ଅନୁଗୋଳ ଅଫିସ,୩।୪: ଅନୁଗୋଳରେ ମାତିଛନ୍ତି ଝାଡ଼ଖଣ୍ଡୀ ଲୁଟେରା ଗ୍ୟାଙ୍ଗ୍। ସାମାନ୍ୟ ଅନ୍ୟମନସ୍କ ହେଲେ ଆଖି ପିଛୁଳାକେ ସେମାନେ ମୋବାଇଲ ଫୋନ୍ ଝାମ୍ପି ନେଇ ଚମ୍ପଟ ମାରୁଛନ୍ତି। ତାଲା ବନ୍ଦ ଘରକୁ ଟାର୍ଗେଟ କରି କଳାକନା ବୁଲାଉଛନ୍ତି। ରବିବାର ସାପ୍ତହିକ ହାଟରେ ମୋବାଇଲ ଚୋରି ଉଦ୍ୟମ କରୁଥିବାବେଳେ ଗ୍ୟାଙ୍ଗର ଜଣେ ନାବାଳକ ଧରାପଡ଼ିଛନ୍ତି। ତାଙ୍କୁ ପୋଲିସ ବାଳସ୍ବଧାର ଗୃହକୁ ପଠାଇ ଦେଇଛି।
ବାହାର ରାଜ୍ୟର ଅପରାଧୀ ଗୋଷ୍ଠୀ ପାଇଁ ଅନୁଗୋଳରେ ଅସାମାଜିକ କାର୍ଯ୍ୟକଳାପ ବଢ଼ିବାରେ ଲାଗିଛି। ବିଶେଷ କରି ଝାଡ଼ଖଣ୍ଡରୁ ଆସିଥିବା ଲୁଟେରା ଗୋଷ୍ଠୀ ସହରବାସୀଙ୍କ ନିଦ ହଜାଇ ଦେଇଛନ୍ତି। ଧରାପଡ଼ିଥିବା ଉକ୍ତ ଗ୍ୟାଙ୍ଗର ନାବାଳକଙ୍କୁ ପଚରାଉଚରା ପରେ ପୋଲିସ ହାତରେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ଲାଗିଛି। ପୋଲିସ ସୂଚନା ଅନୁଯାୟୀ, ଟ୍ରେନ୍ ଏବଂ ବସ୍ରେ ଅନୁଗୋଳକୁ ବାହାର ରାଜ୍ୟରୁ ଥରକେ ୮ରୁ ୧୦ ନାବାଳକ ଲୁଟେରା ସଂଘବଦ୍ଧ ଭାବେ ଆସୁଛନ୍ତି। ସେମାନେ ଗୋଟିଏ ଜାଗାରେ ଏକାଠି ନ ରହି ଭିନ୍ନ ଭିନ୍ନ ଜାଗାରେ ଅପରାଧିକ କାର୍ଯ୍ୟକଳାପ ଘଟାଉଛନ୍ତି। ଜନଗହଳି ସୁଯୋଗରେ କିଏ ମୋବାଇଲ ଝାମ୍ପି ନେଉଛି ତ ଆଉ କିଏ ଘରେ ପଶି କଳାକନା ବୁଲାଇଛି। ସ୍ଥାନୀୟ ଅପରାଧୀ ଗୋଷ୍ଠୀ ସହ ମିଶି ବଡ଼ ବଡ଼ କାଣ୍ଡ ଭିଆଉଛନ୍ତି। ଅନୁଗୋଳରୁ ମୋବାଇଲ ଫୋନ୍ ଚୋରି କରି ଝାଡ଼ଖଣ୍ଡ, ବିହାର ଓ ପଶ୍ଚିମବଙ୍ଗରେ ବିକ୍ରି କରୁଛନ୍ତି। ଥରେ ମୋବାଇଲ ଫୋନ୍ ବାହାରକୁ ଯିବା ପରେ
ଅଭିଯୁକ୍ତଙ୍କ ନିକଟରେ ପହଞ୍ଚତ୍ବା ପୋଲିସ ପକ୍ଷେ କାଠିକର ପାଠ ହେଉଛି। ଅନେକ କ୍ଷେତ୍ରରେ ପୋଲିସ ମାମଲା ବନ୍ଦ କରିଦେଉଥିବା ଅଭିଯୋଗ ହେଉଛି।
ତେବେ ରବିବାର ସାପ୍ତାହିକ ହାଟରୁ ପରିବା କିଣୁଥିବାବେଳେ ଜଣେ ଶିମିଳିପଡ଼ା ଅଞ୍ଚଳରେ ଜଣେ ବ୍ୟକ୍ତିଙ୍କ ପକେଟରୁ ସମ୍ପୃକ୍ତ ନାବାଳକ କୌଶଳକ୍ରମେ ମୋବାଇଲ ଫୋନ୍ ନେଇଯାଇଥିଲା। ତେବେ ବ୍ୟକ୍ତିଜଣକ ପାଟି କରିବାରୁ ସେଠାରେ ଉପସ୍ଥିତ ଲୋକେ ନାବାଳକଙ୍କୁ କାବୁ କରିନେଇଥିଲେ। ସୂଚନା ପାଇ ପୋଲିସ ପହଞ୍ଚତ୍ ନାବାଳକଙ୍କୁ ହେପାଜତକୁ ନେଇଥିଲା। ତାଙ୍କ ନିକଟରୁ ଏକ ମୋବାଇଲ ଫୋନ୍ ଜବତ କରାଯାଇଛି। ଏହି ଗ୍ୟାଙ୍ଗରେ ଅନ୍ୟ କେଉଁମାନଙ୍କ ସମ୍ପୃକ୍ତି ରହିଛି, ତାହା ଜାଣିବା ପାଇଁ ପୋଲିସ ତନାଘନା ଆରମ୍ଭ କରିଛି।
