ରସୁଲପୁର(ଡି.ଏନ୍.ଏ.)/ଭୁବନେଶ୍ୱର,୧୨।୪(ବ୍ୟୁରୋ)ବହୁଚର୍ଚ୍ଚିତ ରମାଦେବୀ ବିଶ୍ୱବିଦ୍ୟାଳୟ ଛାତ୍ରୀ ଝରାଫୁଲ ନାୟକ(୨୨)ଙ୍କ ସନ୍ଦେହଜନକ ମୃତ୍ୟୁ ଘଟଣାରେ ଆଉ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି। ସେ ହେଉଛନ୍ତି ମୁଖ୍ୟ ଅଭିଯୁକ୍ତ ତଥା ଝରାଫୁଲଙ୍କ ପୁରୁଷ ବନ୍ଧୁ ରାକେଶ ସ୍ବାଇଁଙ୍କ ସହଯୋଗୀ ଅମରେଶ ରାଉତ। ଘଟଣାର ତଦନ୍ତ ପାଇଁ ଯାଜପୁର ଜିଲା ପୋଲିସ ପକ୍ଷରୁ ଦୁଇଟି ଟିମ୍ ଗଠନ କରାଯାଇଛି। ଗୋଟିଏ ଟିମ୍ ଅମରେଶଙ୍କୁ ଭୁବନେଶ୍ୱର ଏୟାରଫିଲ୍ଡ ଥାନା ଅଞ୍ଚଳରୁ ସ୍ଥାନୀୟ ପୋଲିସ ସହାୟତାରେ ଶନିବାର ଗିରଫ କରିଥିଲା। ତାଙ୍କୁ ରବିବାର ଯାଜପୁର ଜିଲା ଦୌରା ଜଜ୍ଙ୍କ କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ଯାଜପୁର ଜେଲକୁ ପଠାଇ ଦିଆଯାଇଛି।
ମିଳିଥିବା ସୂଚନା ଅନୁଯାୟୀ, ଏୟାରଫିଲ୍ସ ଥାନା ଅନ୍ତର୍ଗତ ସୁନ୍ଦରପଦା ହାଟରେ ଅମରେଶଙ୍କ ଏକ ଫାଷ୍ଟଫୁଡ୍ ଦୋକାନ ରହିଛି। ତାଙ୍କୁ ପଚରାଉଚୁରା ବେଳେ ଝରାଫୁଲଙ୍କ ମୃତ୍ୟୁ ସମ୍ପର୍କରେ ପୋଲିସକୁ କେତେକ ତଥ୍ୟ ମିଳିଛି। ତଦନ୍ତ ଚାଲିଥିବାରୁ ପୋଲିସ ସେ ସମ୍ପର୍କରେ କିଛି କହୁନାହିଁ। ସୂଚନାଥାଉ କି, ଭୁବନେଶ୍ୱର ଖଣ୍ଡଗିରି ଥାନା ଧର୍ମବିହାର ଅଞ୍ଚଳରେ ଥିବା ଶିବସାଇ ଓଏ ଗେଷ୍ଟହାଉସ୍ର ୨୦୧ ନମ୍ବର ରୁମ୍ରେ ଗତ ଜାନୁୟାରୀ ୨୬ ରାତିରେ ଝରାଫୁଲ ଓ ରାକେଶ ରହିଥିଲେ। ସେଠାରେ ଝରାଫୁଲଙ୍କ ସନ୍ଦେହଜନକ ମୃତ୍ୟୁ ଘଟିଥିଲା। ରାକେଶ ଓ ତାଙ୍କ ସହଯୋଗୀ ମୃତଦେହକୁ ଆଣି ଯାଜପୁର ଜିଲା କୁଆଖିଆ ଥାନା ରାଜେନ୍ଦ୍ରପୁର ପଞ୍ଚାୟତର ଦିଆଲଖଣ୍ଡି ରାସ୍ତାପାର୍ଶ୍ୱରେ ପିଙ୍ଗିଥିବା ପୋଲିସ ସିସିଟିଭି ଫୁଟେଜ୍ରୁ ଜାଣିବାକୁ ପାଇଥିଲା। ପୋଲିସ ରାକେଶଙ୍କୁ ଗିରଫ କରିଥିବାବେଳେ ତାଙ୍କ ସହଯୋଗୀ ତଥା ସମ୍ପର୍କୀୟ ଭାଇ ଶକ୍ତି ଶେଖର ଫେରାର ରହିଛନ୍ତି। ତାଙ୍କୁ ଧରିବାରେ ପୋଲିସ ସଫଳ ହୋଇପାରୁନାହିଁ। ହେଲେ ତଦନ୍ତ ବେଳେ ଘଟଣାରେ ଅମରେଶଙ୍କ ସମ୍ପୃକ୍ତି ସମ୍ପର୍କରେ ଜଣାପଡ଼ିଥିଲା। ଅମରେଶ ଉକ୍ତ ଗେଟ୍ହାଉସ୍ର ୨୦୧ ନମ୍ବର ରୁମ୍ ବୁକ୍ କରିଥିଲେ। ହୋଟେଲ କର୍ମଚାରୀମାନଙ୍କୁ ପଚରାଉଚୁରା ବେଳେ ପୋଲିସ ଏକଥା ଜାଣିପାରିଥିଲା। ଏପରି କି ଗେଷ୍ଟହାଉସ୍ର ସିସିଟିଭି ଫୁଟେଜ୍ ଯାଞ୍ଚ ସମୟରେ ଅମରେଶ ହୋଟେଲ ରୁମ୍କୁ ଆସିଥିବା ଜଣାପଡ଼ିଥିଲା। ସେ ଝରାଫୁଲ ଓ ରାକେଶଙ୍କ ବ୍ୟାଗକୁ ହୋଟେଲ ରୁମ୍କୁ ବୋହି ନେଇଥିବା ସିସିଟିଭି କଏଦ୍ ହୋଇରହିଛି। ପୋଲିସ ତାଙ୍କୁ ସେହିଦିନରୁ ଖୋଜି ଆସୁଥିଲା। କିନ୍ତୁ ସେ ସୁନ୍ଦରପଦା ହାଟରେ ଥିବା ଫାଷ୍ଟଫୁଡ୍ ଦୋକାନକୁ ବନ୍ଦ କରି ଫେରାର ହୋଇଯାଇଥିଲେ। ମୋବାଇଲ ଫୋନକୁ ଟ୍ରାକିଂ କରି ପୋଲିସ ଅମରେଶଙ୍କ ଗତିବିଧିକୁ ଅନୁଧ୍ୟାନ କରିଆସୁଥିଲା। ଇତିମଧ୍ୟରେ ସେ ଲୁଚି ଲୁଚି ରାୟଗଡ଼ା, କନ୍ଧମାଳ ଓ କୋରାପୁଟ୍ ଜିଲାର ବିିଭିନ୍ନ ସ୍ଥାନରେ ରହିଆସିଥିଲେ। କିଛିଦିନ ତଳେ ସେ ସୁନ୍ଦରପଦା ଅଞ୍ଚଳକୁ ଆସିଥିବା ବିଶେଷ ସୂତ୍ରରୁ ଖବର ପାଇ ପୋଲିସ ଟିମ୍ ତାଙ୍କୁ ଗିରଫ କରିଥିଲା।
ଘଟଣାକୁ ନେଇ ଯାଜପୁର ଜିଲା କୁଆଖିଆ ଥାନାରେ ଜାନୁୟାରୀ ୨୭ ତାରିଖରେ ଏକ ହତ୍ୟା ମାମଲା (ନଂ.୩୨/୨୧) ରୁଜୁ ହୋଇଛି। ଘଟଣାକୁ ଅଢ଼େଇ ମାସ ବିତିଯାଇଥିଲେ ମଧ୍ୟ ପୋଲିସ ମୃତ୍ୟୁର ରହସ୍ୟ ଖୋଲିପାରିନାହିଁ। ଏପରି କି ଶବ ବ୍ୟବଚ୍ଛେଦ ଓ ଭିସେରା ରିପୋର୍ଟକୁ ସାର୍ବଜନୀନ କରୁନାହିଁ, ଯାହାକି ଘଟଣାକୁ ଅଧିକ ରହସ୍ୟମୟ କରିଦେଇଛି।
