ନୂଆଦିଲ୍ଲ,୧୭।୨: ଆମେରିକୀୟ କୋଟିପତି ଜର୍ଜ ସୋରୋସ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିବା ମହଙ୍ଗା ପଡିଛି। କଂଗ୍ରେସ ନେତା ଜୟରାମ ରମେଶ ମଧ୍ୟ ଏହି ଘଟଣାରେ ଜର୍ଜ ସୋରେସଙ୍କୁ ଟାର୍ଗେଟ କରିଛନ୍ତି। ଅଦାନୀ ପ୍ରସଙ୍ଗରେ ଭାରତର ଲୋକତନ୍ତ୍ରର ପୁନରୁଦ୍ଧାର ହେଉଛି କି ନାହିଁ ଏହା ଭାରତର କଥା। ଏହା ଜର୍ଜଙ୍କ ସହିତ କୌଣସି ସମ୍ପର୍କ ନାହିଁ ବୋଲି ଜୟରାମ ଟୁଇଟ୍ କରି କହିଛନ୍ତି।
ମିଳିଥିବା ସୂଚନା ମୁତାବକ, କିଛି ଦିନତଳେ ଜର୍ଜ ସୋରୋସ ଅଦାନୀ ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ ମୋଦିଙ୍କୁ ଟାର୍ଗେଟ କରିଥିଲେ। ଜର୍ଜ କହିଥିଲେ, ମୋଦି ଆଦାନୀ ପ୍ରସଙ୍ଗରେ ନୀରବ ରହିଛନ୍ତି। ଏହି ପ୍ରସଙ୍ଗରେ ମୋଦି ପାର୍ଲାମେଣ୍ଟ ସମେତ ବିଦେଶୀ ନିବେଶକଙ୍କୁ ଜବାବ ଦେବାକୁ କହିଥିଲେ। ଏହା ଭାରତର ସଂଘୀୟ ସରକାର ଉପରେ ମୋଦିଙ୍କ ପ୍ରଭାବ କମାଇଦେବ। ଏହାଦ୍ୱାରା ଭାରତରେ ଲୋକତାନ୍ତ୍ରିକ ପରିବର୍ତ୍ତନ ହେବ ବୋଲି ଜର୍ଜ କହିଥିଲେ। ଅନ୍ୟପଟେ ଏନେଇ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ମଧ୍ୟ ଜର୍ଜଙ୍କ ଉପରେ ବର୍ଷିଛନ୍ତି। ସ୍ମୃତି କହିଛନ୍ତି, ବିଦେଶୀ ମାଟିରେ ରହି କେତେକ ଖଳ ପ୍ରକୃତି ଲୋକ ଭାରତୀୟ ଗଣତାନ୍ତ୍ରିକ ବ୍ୟବସ୍ଥାକୁ ଭାଙ୍ଗିବାକୁ ଚେଷ୍ଟା କରୁଛନ୍ତି। ଏପରିକି ଜର୍ଜ ସୋରୋସ ଭାରତର ଲୋକତନ୍ତ୍ରରେ ପ୍ରବେଶ କରିବାକୁ ଅପଚେଷ୍ଟା ଚଳାଇଛନ୍ତି। ଏହାର ଜବାବ ଦେଶବାସୀ ଦେବା ଉଚିତ ବୋଲି କେନ୍ଦ୍ର ମନ୍ତ୍ରୀ କହିଛନ୍ତି। ଏଥିସହ ସେ କହିଛନ୍ତି, ଯେଉଁ ବ୍ୟକ୍ତିଙ୍କ ପାଇଁ ଇଂଲଣ୍ଡର ବ୍ୟାଙ୍କ ବ୍ୟବସ୍ଥା କ୍ଷତିଗ୍ରସ୍ତ ହୋଇଛି। ଏପରିକି ତାଙ୍କୁ ଆର୍ଥିକ ଯୁଦ୍ଧର ଅପରାଧୀ ଭାବେ ଅଭିହିତ କରାଯାଇଛି। ସମ୍ପୃକ୍ତ ବ୍ୟକ୍ତି ଜଣକ ଭାରତର ଗଣତନ୍ତ୍ରକୁ ଭାଙ୍ଗିବାକୁ ଚ୍ୟାଲେଞ୍ଜ ଦେଉଥିବା କହି କଡା ଜବାବ ଦେଇଛନ୍ତି ସ୍ମୃତି ଇରାନୀ। ପୂର୍ବରୁ ମଧ୍ୟ ଭାରତ ବିଦେଶୀ ଶକ୍ତିକୁ ଧୂଳି ଚଟାଇଥିବା ବେଳେ ଭବିଷ୍ୟତରେ ବି ହରାଇବାରେ ସକ୍ଷମ ବୋଲି କେନ୍ଦ୍ରମନ୍ତ୍ରୀ ଇରାନୀ କହିଛନ୍ତି।
