ନୂଆପଡ଼ା,୪ା୧ (ମକାରୁ ବେମାଲ): ନୂଆପଡ଼ା-ଛତିଶଗଡ଼ ସୀମାନ୍ତରେ ଗୁରୁବାର ଓ ଶୁକ୍ରବାର ଓଡ଼ିଶା ଓ ଛତିଶଗଡ ଯବାନଙ୍କ ମିଳିତ ଅପରେଶନ ସମୟରେ ମାଓବାଦୀ ସହ ଗୁଳି ବିନିମୟ ହୋଇଥିଲା। ଏହି ସମୟରେ ଜଣେ ମାଓବାଦୀ ନିହତ ହୋଇଥିଲେ। ଶନିବାର କୋମ୍ବିଂ ଅପରେଶନ ସମୟରେ ବିପୁଳ ପରିମାଣରେ ମାଓବାଦୀ ସାମଗ୍ରୀ ସହ ନିହତ ମାଓବାଦୀଙ୍କ ରୋଶନଙ୍କ ମୃତଦେହ ଜବତ ହୋଇଛି ବୋଲି ନୂଆପଡା ଜିଲା ଆରକ୍ଷୀ ଅଧୀକ୍ଷକ ଗୁନ୍ଦାଳା ରେଡ୍ଡୀ ରାଘବେନ୍ଦ୍ର ସୂଚନା ଦେଇଛନ୍ତି।
ସୂଚନା ମୁତାବକ ନୂଆପଡା-ଛତିଶଗଡ ସୀମାନ୍ତରେ ମାଓବାଦୀ ଦମନ ଯୋଜନା ଜାରି ରହିଛି ା ଛତିଶଗଡ଼ ଗରିଆବନ୍ଧ ଜିଲା ଇନ୍ଦାଗାଁ ଥାନା କାଣ୍ଡସର ଗାଁ ଜଙ୍ଗଲରେ ମାଓବାଦୀ ଉପସ୍ଥିତି ଜାହିର କରିଥିବା ଗୋଇନ୍ଦା ସୂତ୍ରରୁ ଖବର ପାଇ ଅପରେଶନ ଜାରି ରହିଛି। ଏଥିରେ ଇ-୩୦ ଗରିଆବନ୍ଧ,ଏସ୍ଓଜି ନୂଆପଡ଼ା (ଓଡିଶା) ଓ ସିଆର୍ପିଏଫ୍ ୬୫ ଓ ୨୧୧ ବାଟାଲିୟନ ଗରିଆବନ୍ଧ, ଡିଆରଜି ଧନତରୀ, ୨୦୭ କୋବ୍ରା ବାଟାଲିୟନ ସାମିଲ ହୋଇ ମାଓବାଦୀଙ୍କୁ ପାଲଟା ଜବାବ ଦେବାରୁ ଛତ୍ରଭଙ୍ଗ ଦେଇଥିଲେ। ସେଠାରେ ଠାବ ହୋଇଥିବା ମାଓବାଦୀ କ୍ୟାମ୍ପରୁ ୨ଟି ବିଜିଏଲ୍ ଲଞ୍ଚର, ୨ଟି ୩୧୫ ବୋର ରାଇଫଲ, ୪ଟି ହତିଆର ଓ ବିଭିନ୍ନ ମାଓବାଦୀ ସାମଗ୍ରୀ ଜବତ କରାଯାଇଛି। ଉଦ୍ଧାର ସାମଗ୍ରୀକୁ ଗରିଆବନ୍ଧ ଜିଲା ମୁଖ୍ୟାଳୟକୁ ଅଣାଯାଇଥିବା ଏସ୍ପି ରାଘବେନ୍ଦ୍ର ସୂଚନା ଦେଇଛନ୍ତି।
