ଭଞ୍ଜନଗର,୧୦।୬(ବାବୁଲା ପ୍ରଧାନ): ରାଜ୍ୟର ସମସ୍ତ ଘରକୁ ସରକାର ପାଇପ ଯୋଗେ ବିଶୁଦ୍ଧ ପାଣି ଯୋଗାଇଦେବା ଲକ୍ଷ୍ୟ ରଖିଛନ୍ତି। ଉକ୍ତ ଲକ୍ଷ୍ୟକୁ ରଖି ରାଜ୍ୟରେ ଅନେକ ବଡ ବଡ ପାନୀୟ ଜଳ ପ୍ରକଳ୍ପ କାର୍ଯ୍ୟ ଚାଲିଛି। ଏହିଭଳି ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ପକ୍ଷରୁ ମଧ୍ୟ ପ୍ରାୟ ୧୬୦୦ କୋଟି ଟଙ୍କା ବ୍ୟୟରେ ମେଗା ପାନୀୟ ଜଳ ପ୍ରକଳ୍ପ ଚାଲିଛି। ପ୍ରକଳ୍ପ କାର୍ଯ୍ୟ ଗତବର୍ଷ ସରିବା ପାଇଁ ଚୁକ୍ତି ହୋଇଥିଲା। ଇତିମଧ୍ୟରେ ଚୁକ୍ତି ସମୟ ସରିବାର ଏକ ବର୍ଷ ବିତିବାକୁ ବସିଥିବା ବେଳେ ପ୍ରକଳ୍ପ କାମ ୪୦ ପ୍ରତିଶତରୁ ଉର୍ଦ୍ଧ୍ୱ ସରିଛି। ଆହୁରି ପ୍ରାୟ ୬୦ ପ୍ରତିଶତ କାମ ବାକି ଅଛି ସରିବାକୁ। ଅନ୍ୟପଟେ ଅନେକ ଗ୍ରାମକୁ ଏବେବି ପାଇପ ଯୋଗେ ପାଣି ଯୋଗାଣ ହୋଇପାରିନାହିଁ।
ଏଥିସହ ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ, ପଞ୍ଚାୟତରାଜ ବିଭାଗ ପକ୍ଷରୁ ଲୋକେ ବ୍ୟବହାର କରୁଥିବା ପାଣି ନିୟମିତ ପରୀକ୍ଷା କରାଯାଉନାହିଁ। କେବଳ କାଗଜକଲମରେ ହିଁ ପାଣିର ମାନ ଯାଞ୍ଚ ହେଉଥିବା ଅଭିଯୋଗ ହେଉଛି। ଏଥିସହ ଫଟା ପାଇପ ଗୁଡିକୁ ଯାଞ୍ଚ କରି ର୍ନିଦ୍ଧାରିତ ସମୟରେ ମରାମତି କରାଯାଉନାହିଁ। ତେଣୁ ଉକ୍ତ ଫଟା ପାଇପ ବାଟେ ଅନେକ ସମୟରେ ଦୁଷିତ ପାଣି ଘରକୁ ଯାଉଛି। ଲୋକେ ଉକ୍ତ ପାଣି ବ୍ୟବହାର କରି ଜଣ୍ଡିସ ସମେତ ବିଭିନ୍ନ ରୋଗରେ ଆକ୍ରାନ୍ତ ହେଉଛନ୍ତି। କିନ୍ତୁ ଲୋକେ ପାଣି ଯୋଗୁ ରୋଗରେ ଆକ୍ରାନ୍ତ ହେଉଥିବା ଜାଣିପାରୁନାହାନ୍ତି । ପ୍ରଶାସନ ଯେତେବେଳ ଯାଞ୍ଚ କରୁଛି ସେତେବେଳେ ଜଣାପଡୁଛି ସମସ୍ୟା।
ଏହିଭଳି ଭଞ୍ଜନଗର ବ୍ଲକର ବଡକୋଦଣ୍ଡା, ଛେଦାଭୂମି, ଗୁଣ୍ଡିରିବାଡ଼ି ଭଳି କିଛି ଗ୍ରାମରେ ବିଗତ କିଛିବର୍ଷ ହେବ ବାରମ୍ବାର ଜଣ୍ଡିସ, ଝାଡ଼ାବାନ୍ତି ବ୍ୟାପୁଛି। ଗତବର୍ଷ ଉକ୍ତ ଗ୍ରାମ ଗୁଡ଼ିକରେ ଜଣ୍ଡିସ ଓ ଝାଡ଼ାବାନ୍ତି ବ୍ୟାପି ଏକାଧିକ ଲୋକ ମୃତ୍ୟୁବରଣ କରିଥିଲେ। ଏଥିସହ ବହୁ ଲୋକ ଅସୁସ୍ଥ ହୋଇ ମେଡିକାଲରେ ଚିକିତ୍ସିତ ହୋଇଥିଲେ। ବିଗତ ଅନୁଭୂତିକୁ ଦେଖି ପ୍ରଶାସନ ସତର୍କ ହେବାକଥା। କିନ୍ତୁ ପ୍ରସାଶନ ଏଥିପ୍ରତି ଆଉ ଦୃଷ୍ଟି ଦେଇ ନ ଥିଲା। ତେଣୁ ଗତମାସରେ ବଡକୋଦଣ୍ଡା ଗ୍ରାମର ୬ ଜଣ ଶିଶୁ ଜଣ୍ଡିସରେ ଆକ୍ରାନ୍ତ ହୋଇଥିଲେ। ସେଥିମଧ୍ୟରୁ ଇତିମଧ୍ୟରେ ୪ ଜଣ ସୁସ୍ଥ ହୋଇଗଲେଣି। ଆଉ ଦୁଇଜଣ ଶିଶୁ ମଧ୍ୟ ଧିରେ ଧିରେ ସୁସ୍ଥ ହେଉଛନ୍ତି। କିନ୍ତୁ ବ୍ଲକ ପ୍ରଶାସନ ଏକ ମାସ ବିଳମ୍ବରେ ଜାଣିବା ପରେ ସୋମବାର ଉକ୍ତ ଗ୍ରାମ ପରିଦର୍ଶନ କରି ସ୍ଥିତି ସମୀକ୍ଷା କରିଥିଲେ। ଏହାପରେ ମଙ୍ଗଳବାର ଜିଲ୍ଲା ସୱାସ୍ଥ୍ୟ କମିଟି ସ୍ଥିତିର ସମୀକ୍ଷା କରିବା ସହ ପାଣି ପରୀକ୍ଷା ପାଇଁ ନେଇଛନ୍ତି। ଏଥିସହ ଗ୍ରାମରେ ଥିବା ସମସ୍ତ ନଳକୂପ ଗୁଡିକରେ ବ୍ଲିଚିଂ ପକାଯାଇଛି। ପାଇପ ଗୁଡ଼ିକ ମଧ୍ୟ ଯାଞ୍ଚ କରାଯାଇଛି । ଗତବର୍ଷ ଛେଦାଭୁମିରେ ଲୋକେ ଦୂଷିତ ପାଣି ବ୍ୟବହାର କରିବାରୁ ଜଣ୍ଡିସ ବ୍ୟାପିଥିଲା। ଏହାପରେ ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ପକ୍ଷରୁ ମାତ୍ର ଗୋଟିଏ ସାହିର ଗୋଟିଏ ପାଖ ପାଇପ ବିଛାଯାଇଥିଲା ପାଣି ଦେବାପାଇଁ। କିନ୍ତୁ ଉକ୍ତ ପାଇପ ବିଛାଇବାର ଇତିମଧ୍ୟରେ ଏକ ବର୍ଷ ବିତିବାକୁ ବସିଥିବା ବେଳେ ସେଥିରେ ପାଣି ଆଜି ପର୍ଯ୍ୟନ୍ତ ଦିଆଯାଇନାହିଁ। ଅନ୍ୟ ସାହି ଗୁଡିକୁ ମଧ୍ୟ ଆଜି ପର୍ଯ୍ୟନ୍ତ ପାଣି ପାଇପ ବିଛାଯାଇନାହିଁ। ଗ୍ରାମ୍ୟ ପାଇପ ଜଳ ଯୋଗାଣ ବିଭାଗର ଏହିଭଳି ଅବହେଳାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ତେଣୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାର ଆବଶ୍ୟକତା ରହିଛି। ଏନେଇ ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ଅଧୀକ୍ଷଣ ଯନ୍ତ୍ରୀଙ୍କ ମତାମତ ନେବାପାଇଁ ଉଦ୍ୟମ କରାଯାଇଥିଲା କିନ୍ତୁ ତାହା ସମ୍ଭବପର ହୋଇପାରିନାହିଁ।
Dharitri – Odisha’s No.1 Odia Daily
