ପଦ୍ମପୁର, ୬ା୮(ଡି.ଏନ୍.ଏ.): ମହାମାରୀ କରୋନା ବିରୋଧରେ ସାରା ଦେଶ ଲଢ଼ୁଥିବା ବେଳେ ନିମ୍ନ ମଧ୍ୟବିତ୍ତ ପରିବାର ଓ କଳାକାରମାନେ ପେଟକୁ ଦାନା ପାଉନାହାନ୍ତି। ଯାତ୍ରା, ପାଲା, ଦାସକାଠିଆ, ନୃତ୍ୟ ମାଧ୍ୟମରେ ଓଡ଼ିଆ ସଂସ୍କୃତି ଓ ପରମ୍ପରାର ପ୍ରଚାର ପ୍ରସାର କରୁଥିବା କଳାକାରମାନେ ଏବେ ଅସହାୟ ହୋଇ ପଡ଼ିଛନ୍ତି। ଏହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଭଦ୍ରକ ଜିଲା ବାସୁଦେବପୁର ବ୍ଲକ ବ୍ରାହ୍ମଣୀଗାଁ ପଞ୍ଚାୟତର ବୈକୁଣ୍ଠପୁର ଗ୍ରାମରେ। ଯାତ୍ରା ତ୍ରିରଙ୍ଗାରୁ କଳାକାର ଜୀବନ ଆରମ୍ଭ କରିଥିବା ଏହି ଗ୍ରାମର ରୁନୁ ମହାପାତ୍ର ଏବେ ଜଣେ ଆଗଧାଡ଼ିର କଳାକାର। କୋଣାର୍କ ଗଣନାଟ୍ୟରେ ୨୦୦୨ ରୁ ୨୦୧୯ ଦୀର୍ଘ ୧୭ ବର୍ଷର ଅଭିନୟ ଜୀବନରେ ଡ୍ୟାନ୍ସଠାରୁ ହାସ୍ୟ ଅଭିନେତ୍ରୀ ଭାବରେ ସେ ବେଶ ପରିଚିତ। କୋଣାର୍କ ଗଣନାଟ୍ୟର ବଦ୍ନାମ ହେଲି ତୋରି ପାଇଁ, କାଇଁଚ ମାଳି, ବ୍ରହ୍ମ ଚଣ୍ଡାଳ, ଆଖି ଅବୁଝାକୁ ଲୁହ ଅବୁଝା, ଦୁଃଖ ଦେଇଗଲା ଦରଦୀ ବନ୍ଧୁ ନାଟକ ଦେଖିଥିବା ଦର୍ଶକ ରୁନୁଙ୍କର ନାଚ ଓ କମେଡ଼ି ଭୁଲି ପାରିବେନି। ତେବେ କରୋନା ମହାମାରୀ ଆରମ୍ଭ ହେବା ପରେ ଯାତ୍ରା ପରିବେଷଣ ବନ୍ଦ ହେବାରୁ ସେ ଫେରିଛନ୍ତି ନିଜ ଘରକୁ। ଘରେ ଭିନ୍ନକ୍ଷମ ବାପା ନିଶିକାନ୍ତ ରାଉତ ଓ ଅସୁସ୍ଥ ମା’ ତପତି। ସେମାନଙ୍କର ଔଷଧ ଖର୍ଚ୍ଚ ସହ ଦୁଇ ଓଳି ଖାଇବାର ଚିନ୍ତା। ଶେଷରେ ବାଛି ନେଲେ ରାସ୍ତାକଡ଼ରେ ପଲିଥିନ ଟାଣି ଏକ ଛୋଟ ଚା ଦୋକାନ ସହ ତେଲଭାଜି ଓ ବିସ୍କୁଟ ବିକିବା ପାଇଁ। ଦୈନିକ ୨୦୦ରୁ ୩୦୦ ଟଙ୍କା ରୋଜଗାର କରି ବାପା, ମା, ସ୍ବାମୀ ଓ ଛୋଟ ଝିଅର ଭରଣ ପୋଷଣ କରୁଛନ୍ତି। ସ୍ବାମୀ ଲିଟୁ ଯାତ୍ରା କଳାକାରମାନଙ୍କର ପରିଚାଳନା କରୁଥିବା ବେଳେ କାମ ବନ୍ଦ ଯୋଗୁଁ ସେ ମଧ୍ୟ ରୁନୁଙ୍କୁ ଦୋକାନରେ ସହଯୋଗ କରୁଛନ୍ତି। ଯେଉଁ କଳାକାରମାନଙ୍କୁ ଦେଖିବା ପାଇଁ ଦର୍ଶକମାନେ ଶହ ଶହ ଟଙ୍କାର ଟିକେଟ୍ କିଣି ଲମ୍ବାଧାଡ଼ି ଲଗାଉଥିଲେ ସେମାନେ ଏବେ ଫୁଟ୍ପାଥରେ ସ୍ବଳ୍ପ ରୋଜଗାରରେ ନିଜର ଜୀବିକା ନିର୍ବାହ କରିବା କଷ୍ଟକର ହୋଇପଡ଼ିଛି। ଏଭଳି ସ୍ଥିତିରେ ସରକାର ସହାୟତାର ହାତ ନ ବଢ଼ାଇଲେ କଳାକାରମାନଙ୍କର ବଞ୍ଚତ୍ବା ଦୁର୍ବିସହ ହୋଇପଡ଼ିବ ବୋଲି ରୁନୁ ନିଜର ପ୍ରତିକ୍ରିୟା ରଖିଛନ୍ତି ।
