ନୂଆଦିଲ୍ଲୀ,୧୬।୧: ଗତବର୍ଷ ଦେଶରେ ୪୨ ୟୁନିକର୍ନ ଷ୍ଟାର୍ଟ ଅପ୍ ସୃଷ୍ଟି ହୋଇଥିଲା। ଏହି ସଫଳତା ସହ ଭାରତ ଏକ ବିଲିୟନ ଇଣ୍ଟରନେଟ୍ ବ୍ୟବହାରକାରୀଙ୍କ ମାଇଲଖୁଣ୍ଟକୁ ସ୍ପର୍ଶ କରିବ। ଦେଶ ଖୁବ୍ଶୀଘ୍ର ୧୦୦ ୟୁନିକର୍ନ ସଫଳତା ହାସଲ କରିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କହିଛନ୍ତି। ଜାନୁୟାରୀ ୧୬କୁ ଜାତୀୟ ଷ୍ଟାର୍ଟ ଅପ୍ ଦିବସ ଭାବେ ପାଳନ କରିବାକୁ ମୋଦି ଘୋଷଣା କରିଛନ୍ତି। ପୂର୍ବରୁ ସୃଷ୍ଟି ହୋଇଥିବା ଷ୍ଟାର୍ଟ ଅଫ୍ଗୁଡ଼ିକ ମଧ୍ୟରୁ କେତେକ କମ୍ପାନୀ ବଡ଼ ହେବେ। କିନ୍ତୁ ଏକ ବର୍ଷ ମଧ୍ୟରେ ୪୨ଟି ୟୁନିକର୍ନ ସୃଷ୍ଟି ହୋଇଛନ୍ତି। ଏହିସବୁ ବିଲିୟନ ଡଲାର ବିଶିଷ୍ଟ କମ୍ପାନୀଗୁଡ଼ିକ ସୂଚାଇ ଦେଉଛନ୍ତି ଯେ, ଭାରତ ଆତ୍ମନିର୍ଭର ହୋଇଛି ଏବଂ ଆମ ଦେଶର ଆତ୍ମବିଶ୍ୱାସ ମଧ୍ୟ ବଢ଼ିଛି।
ଦେଶରେ ଷ୍ଟାର୍ଟ ଅପ୍ ଇକୋସିଷ୍ଟମକୁ ବଢାଇବା ପାଇଁ ପ୍ରଧାନମନ୍ତ୍ରୀ ମୋଦି ଶନିବାର ୧୫୦ରୁ ଅଧିକ ଷ୍ଟାର୍ଟ ଅପ୍ ସହ ଯୋଗାଯୋଗ କରିଛନ୍ତି। ଏହି ଅବସରରେ ଷ୍ଟାର୍ଟ ଅପ୍ଗୁଡ଼ିକୁ ନିଜ ଦେଶ ମଧ୍ୟରେ ସୀମିତ ନ ରଖି ଏହାର ପରିସରକୁ ବ୍ୟାପକ କରିବା ଲାଗି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି। ଏପରି କି କମ୍ପାନୀଗୁଡ଼ିକୁ ବିଶ୍ୱସ୍ତରୀୟ କରିବା ଲାଗି ଉଦ୍ୟମ କରାଯିବା ଉପରେ ସେ ପ୍ରାଧାନ୍ୟ ଦେଇଛନ୍ତି। ଭାରତର ବିବିଧତା ହେଉଛି ଆମର ଶକ୍ତି। ଏହା ହେଉଛି ଆମର ବିଶ୍ୱ ପରିଚୟ। ଏହି ବିବିଧତାର ବାର୍ତ୍ତାବହ ଭାବେ ଆମର ୟୁନିକର୍ନ ଓ ଷ୍ଟାର୍ଟ ଅପ୍ଗୁଡ଼ିକ ଦଣ୍ଡାୟମାନ ବୋଲି ମୋଦି କହିଛନ୍ତି।
ଏହି ଅବସରରେ ପ୍ରଧାନମନ୍ତ୍ରୀ ସରକାରଙ୍କ ଅଭିନବତ୍ୱ ଉପରେ ଥିବା ଅଙ୍ଗୀକାରବଦ୍ଧତାକୁ ଗୁରୁତ୍ୱ ଦେଇଛନ୍ତି। ଅଟଳ ଇନୋଭେଶନ ମିଶନ, ନୂଆ ସ୍ପେସ୍ ଟେକ୍ନୋଲୋଜି ଏବଂ ଡ୍ରୋନ୍ ଟେକ୍ନୋଲୋଜି ନୀତି ମାଧ୍ୟମରେ ବହୁବିଧି ଯୋଜନା ଓ କାର୍ଯ୍ୟକ୍ରମ ହାତକୁ ନିଆଯାଇଛି, ଯାହାକି ଷ୍ଟାର୍ଟ ଅପ୍ଗୁଡ଼ିକୁ ସମୃଦ୍ଧ କରିବା ଦିଗରେ ସହାୟକ ହୋଇପାରିବ। ପ୍ରଧାନମନ୍ତ୍ରୀ କହିଛନ୍ତି, ନୂତନ ଡ୍ରୋନ୍ ନୀତି ଫଳାଫଳ ଦେଖାଇବା ଆରମ୍ଭ କରିଛି। ସେନା, ନୌସେନା ଏବଂ ବାୟୁସେନା ପ୍ରାୟ ୫୦୦ କୋଟି ଟଙ୍କା ମୂଲ୍ୟର ଅର୍ଡର ଡ୍ରୋନ୍ କମ୍ପାନୀଗୁଡିକୁ ଦେଇସାରିଛନ୍ତି।
ସେ କହିଛନ୍ତି, ବିଶ୍ୱର ଶ୍ରେଷ୍ଠ ୫୦ ଗ୍ଲୋବାଲ ଇନୋଭେଶନ ଇଣ୍ଡେକ୍ସ ର଼୍ୟାଙ୍କିଙ୍ଗ୍ରେ ଭାରତ ଅଗ୍ରଗତି କରିଛି। ଏପରି କି ୨୦୧୩-୧୪ରେ ୪୦୦୦ ପେଟେଣ୍ଟକୁ ମଞ୍ଜୁରୀ ଦିଆଯାଇଥିବାବେଳେ ତାହା ଗତବର୍ଷ ଏହି ସଂଖ୍ୟା ବଢ଼ି ୨୮୦୦୦ରୁ ଊର୍ଦ୍ଧ୍ୱକୁ ଯାଇଥିଲା। ଏହି ସମୟ ମଧ୍ୟରେ ଟ୍ରେଡ୍ ମାର୍କ ପଞ୍ଜୀକରଣ ୭୦ ହଜାରରୁ ବଢ଼ି ଅଢ଼େଇ ଲକ୍ଷରେ ପହଞ୍ଚତ୍ଥିଲା। ଗ୍ରାମୀଣ ଅର୍ଥନୀତି ଏବଂ ନିମାଣ କ୍ଷେତ୍ର ସହ ଜଡିତ ସମସ୍ୟାର ସମାଧାନ ଦିଗରେ ଦୃଷ୍ଟିଦେବାକୁ ପ୍ରଧାନମନ୍ତ୍ରୀ ଷ୍ଟାର୍ଟ ଅପ୍ଗୁଡ଼ିକୁ ମୋଦି ପରାମର୍ଶ ଦେଇଛନ୍ତି।
